បរទេស៖ ក្លឹប Arsenal អាចនឹងបង្វែរការចាប់អារម្មណ៍របស់ពួកគេទៅលើកកីឡាករ Bruno Guimaraes និងកីឡាករ Douglas Luiz ចំពេលមានការព្រួយបារម្ភអំពីការផ្ទេរយកកីឡាករ Martin Zubimendi របស់ Real Sociedad មកកាន់អង់គ្លេស។
នេះបើយោងតាមការចេញផ្សាយរបស់ Evening Standard បានអោយដឹងថាក្រុមកាំភ្លើងធំចង់ចុះហត្ថលេខាលើខ្សែបម្រើយ៉ាងហោចណាស់ម្នាក់នៅរដូវក្តៅនេះ ហើយក្នុងនោះកីឡាករ Zubimendi បានស្ថិតនៅក្នុងរ៉ាដារបស់ពួកគេអស់មួយរយៈហើយ។ ប្រភពដដែលបានអោយដឹងថាកីឡាករវ័យ ២៥ឆ្នាំរូបនេះមានការស្ទាក់ស្ទើរក្នុងការចាកចេញពីក្លឹប ចំពោះពេលមានការចាប់អារម្មណ៍ពីសំណាក់ក្លឹប Bayern Munich និង Barcelona។ ដោយសារការផ្ទេរនេះមានភាពលំបាក ធ្វើអោយលោក Mikel Arteta អាចប្តូរទៅពិចារណាលើកីឡាករ Guimaraes របស់ក្លឹប Newcastle United និងកីឡាករ Luiz របស់ក្លឹប Villa វិញ ប៉ុន្តែក្លឹបទាំងពីរមានការស្ទាក់ស្ទើរក្នុងការលក់ លុះត្រាតែក្លឹបទទួលបាននៅសំណើរដ៏ធំមួយ៕
