បរទេស៖ ម្ចាស់ជើងឯក World Cup បានផ្តាច់ទំនាក់ទំនងជាមួយ Paris Saint-Germain នៅរដូវក្តៅឆ្នាំ២០២៤ នៅពេលដែលកុងត្រារបស់គាត់បានផុតសុពលភាព។ ក្នុងរយៈពេលជាច្រើនឆ្នាំដែលមានព័ត៌មានជាប់ទាក់ទងជាមួយក្លឹបយក្ស La Liga គឺ Real Madrid កីឡាករ Mbappe បានក្លាយជាកីឡាករចុងក្រោយ “Galactico” នៅ Santiago Bernabeu ។
នេះបើយោងតាមការចេញផ្សាយរបស់ L’Equipe បានអោយដឹងថា Mbappe បានជម្រុញអោយមានការចាកចេញពីក្លឹបយក្សនៅបារាំង ក្រោយមានការខកចិត្តជាមួយនឹងក្រុមទិញកីឡាករកាលពី ២ឆ្នាំមុន។ គាត់ចង់អោយក្លឹប PSG ចង់នាំយកកីឡាករ Robert Lewandowski និង Bernardo Silva ប៉ុន្តែក្លឹបមិនអាចនាំយកមកបាន។ ស្របពេលមានការចាប់អារម្មណ៍ពីក្លឹប Liverpool នៅ Premier League ដោយក្លឹបហ៊ានចំណាយរហូតដល់ ២០០លានអឺរ៉ូសម្រាប់ការផ្ទេរយក Mbappe។
អតីតកីឡាករជម្រើសជាតិបារាំង និងជាអ្នកឈ្នះពានរង្វាន់ World Cup ឆ្នាំ១៩៩៨ លោក Christophe Dugarry បានប្រាប់ Rothen s’enflamme អំពីអាកប្បកិរិយាគួរឱ្យសង្ស័យពីតារាឆ្នើមម្នាក់ថា៖ “កីឡាករ Mbappe គាត់ស្ទើរតែបានចុះហត្ថលេខាជាមួយក្លឹប Liverpool ទៅហើយ ដោយសារតែគាត់មិនអាចនាំយកកីឡាករដែលគាត់ចង់បានមកកាន់ PSG។ គាត់បានសន្យាជាមួយ Lewandowski និង Silva ប៉ុន្តែវាមិនបានកើតឡើង ហើយបានធ្វើអោយគាត់ត្រៀមខ្លួនក្នុងការចាកចេញទៅ Liverpool”។
“ប៉ុន្តែអ្នកជាអ្វី? អ្នកជាកីឡាករ គ្រូបង្វឹក នាយកកីឡា ជាប្រធាន? តើអ្នកជាអ្វី? ខ្ញុំមិនដែលឃើញវាទេ។ ខ្ញុំសន្យានឹងអ្នក ខ្ញុំមានឱកាសបានលេងជាមួយកីឡាករដ៏អស្ចារ្យ ខ្ញុំបានឃើញអាកប្បកិរិយារបស់គេ ខ្ញុំមិនដែលឃើញកីឡាករធ្វើបែបនោះទេ”។
កីឡាករ Mbappe បានលេងជាមួយ Lionel Messi និង Neymar ក្នុងឆ្នាំ២០២២ ប៉ុន្តែគេមើលឃើញថាក្លឹប PSG នៅតែបរាជ័យក្នុងការឈ្នះពាន Champions League។ ឥឡូវនេះគាត់កំពុងដេញតាមក្តីស្រម៉ៃនៅក្នុងប្រទេសអេស្ប៉ាញ៕
