បរទេស៖ លោក Ferguson បានចូលរួមជាមួយក្លឹប Manchester United ពីក្លឹប Aberdeen ក្នុងឆ្នាំ ១៩៨៦ហើយបានបន្តក្លាយជាវីរបុរស របស់ក្លឹប និងក្របខ័ណ្ឌ Premier League ក្នុងអំឡុងពេល ២៧ឆ្នាំរបស់គាត់ជាគ្រូបង្វឹករបស់បិសាចក្រហម។ អ្នកចាត់ការសញ្ជាតិស្កុតឡេនបានឈ្នះពានរង្វាន់ Premier League ចំនួន ១៣ដង, Champions Leagues ចំនួន ២ដង និង FA Cup ចំនួន ៥ដងក្នុងអំឡុងពេលរបស់គាត់នៅ Old Trafford ហើយត្រូវបានគេចាត់ទុកថាជាគ្រូបង្វឹកដ៏អស្ចារ្យបំផុតម្នាក់។
លោក Ferguson ឥឡូវនេះបានបង្ហើបថាគាត់មានឱកាសផ្លាស់ទៅប្រទេសអង់គ្លេសមុនឆ្នាំ១៩៨៦ទៀត ខណៈដែលគាត់ទទួលបានការចាប់អារម្មណ៍ពីក្លឹប Arsenal, Tottenham Hotspur និង Wolverhampton Wanderers ។ ទោះជាយ៉ាងណាក៏ដោយ លោកត្រូវបានប្រាប់ដោយប្រធានក្លឹប Aberdeen លោក Dick Donald ឱ្យចាកចេញ ប្រសិនបើក្លឹប United ទំនាក់ទំនងមក។
ថ្លែងទៅកាន់ Ally McCoist នៅលើ TNT Sports លោក Ferguson បាននិយាយថា៖ “ខ្ញុំបានបដិសេធ Arsenal ខ្ញុំបានបដិសេធ Wolverhampton Wanderers ហើយខ្ញុំបានបដិសេធ Tottenham ។ ហេតុផលគឺ Dick Donald … ខ្ញុំបាននិយាយទៅកាន់គាត់ថា “ប្រហែលជាវាដល់ពេលហើយ (ដើម្បីចាកចេញ។ ) គាត់និយាយថា “កុំនិយាយបែបនោះ អ្នកមានការរៀបចំដ៏អស្ចារ្យនៅទីនេះ អ្នកគួរតែទៅក្លឹបតែមួយប៉ុណ្ណោះ គឺ Man Utd”។
នៅពេលត្រូវបានសួរថាតើការទៅ Old Trafford គឺជាការសម្រេចចិត្តត្រង់ឬអត់នោះ Ferguson បានឆ្លើយតបថា៖ “ពិតណាស់។ ខ្ញុំមិនអាចទៅដល់ទីនោះបានលឿននោះទេ”។
ថ្មីៗនេះ វីរបុរសវ័យ ៨២ឆ្នាំរូបនេះត្រូវបានត្រូវបានសហម្ចាស់ថ្មីរបស់ក្លឹប United បានបញ្ចប់នៅតំណែងទូតសុឆន្ទៈពីក្លឹប ក្នុងការប៉ុនប៉ងកាត់បន្ថយការចំណាយ៕
