បរទេស៖ យោងតាមទូរទស្សន៍ ESPN បានឱ្យដឹងថា កីឡាករ Mainoo មានអារម្មណ៍មិនសូវសប្បាយចិត្តកាន់តែខ្លាំងឡើង ដោយសារតែកង្វះឱកាសបង្ហាញខ្លួនក្រោមការដឹកនាំរបស់គ្រូបង្វឹកលោក Ruben Amorim ហើយថែមទាំងបានស្នើសុំផ្លាស់ប្ដូរក្នុងលក្ខខណ្ឌខ្ចីជើងមុនពេលទីផ្សារដោះដូរកីឡាករបានបិទ។ សំណើនោះត្រូវបានបដិសេធ ប៉ុន្តែទ្វារអាចនឹងបើកឡើងវិញនៅខែមករា។ ការជំរុញរបស់កីឡាករ Mainoo មិនមែនជាការសម្រេចចិត្តភ្លាមៗនោះទេ។ កីឡាករវ័យក្មេងរូបនេះ និងក្រុមការងាររបស់គាត់បានថ្លឹងថ្លែងពីស្ថានភាពរបស់គាត់អស់ជាច្រើនខែ មុនពេលនិយាយជាផ្លូវការទៅកាន់លោក Amorim និងនាយកបាល់ទាត់លោក Jason Wilcox។ ក្តីបារម្ភរបស់ពួកគេគឺសាមញ្ញណាស់៖ ការទទួលបានពេលវេលាលេងមានកំណត់នៅក្លិប United អាចនឹងរារាំងការអភិវឌ្ឍរបស់គាត់ និងបំផ្លាញឱកាសរបស់គាត់ក្នុងការចូលរួមក្នុងក្រុមរបស់លោក Thomas Tuchel សម្រាប់ World Cup នៅរដូវក្តៅក្រោយ។
ពាក្យចចាមអារ៉ាមអំពីការមិនសប្បាយចិត្តបានកើតឡើងចាប់តាំងពីដើមឆ្នាំនេះ។ គេរាយការណ៍ថា Mainoo មានអារម្មណ៍មិនស្រួលចិត្តដំបូងនៅពេលដែលដំណឹងបានលេចចេញថា United អាចនឹងលក់គាត់ ឬមិត្តរួមក្រុមថ្នាលយុវជន Alejandro Garnacho ដើម្បីកាត់បន្ថយសម្ពាធនៃច្បាប់ស្តីពីប្រាក់ចំណេញ និងនិរន្តរភាព (PSR)។ នៅពេលនោះ Mainoo បានស្វែងរកដំបូន្មានពីអតីតកីឡាករម្នាក់ ប៉ុន្តែបានជ្រើសរើសនៅស្ងៀម។ លុះដល់ចុងរដូវក្តៅ ការខកចិត្តរបស់គាត់ក៏បានផ្ទុះឡើង ដែលជំរុញឱ្យមានសំណើខ្ចីជើង។ ក្លិប Napoli បានក្លាយជាគោលដៅដ៏គួរឱ្យចាប់អារម្មណ៍ ប៉ុន្តែ United បានបដិសេធការផ្លាស់ប្តូរនេះ។ អ្នកនៅជិតដិតនឹងក្លិបជឿថា កិច្ចព្រមព្រៀងនេះអាចនឹងត្រូវបានពិនិត្យឡើងវិញនៅខែមករា ប្រសិនបើតួនាទីរបស់ Mainoo មិនប្រសើរឡើង ទោះបីជាត្រូវតែរកបានកីឡាករជំនួសដែលសមរម្យសម្រាប់ United ក៏ដោយ។
លើសពីបញ្ហាពេលវេលាលេង គឺបញ្ហាជុំវិញកុងត្រា។ Mainoo បានចុះកិច្ចសន្យាថ្មីកាលពីឆ្នាំ ២០២៣ ដែលចងជើងគាត់នៅកីឡដ្ឋាន Old Trafford រហូតដល់ឆ្នាំ ២០២៧ ហើយក្លិបមានជម្រើសបន្តកិច្ចសន្យារយៈពេលមួយឆ្នាំទៀត។ បន្ទាប់ពីការលេងដ៏លេចធ្លោរបស់គាត់នៅ Euro 2024 ការចរចាដំបូងបានចាប់ផ្តើមអំពីការដំឡើងប្រាក់ខែរបស់គាត់ដើម្បីឆ្លុះបញ្ចាំងពីប្រជាប្រិយភាពរបស់គាត់ដែលកំពុងកើនឡើង។ ប៉ុន្តែចាប់តាំងពីលោក Sir Jim Ratcliffe ចូលកាន់តួនាទីគ្រប់គ្រង ការសន្ទនាទាំងនោះក៏បានផ្អាក។ ជាមួយនឹងរបបគ្រប់គ្រងរបស់លោក Ratcliffe ដែលដាក់ការគ្រប់គ្រងយ៉ាងតឹងរ៉ឹងលើប្រាក់ឈ្នួល អនាគតរបស់ Mainoo ហាក់ដូចជាមិនច្បាស់លាស់ទាំងក្នុង និងក្រៅទីលានប្រកួត។
ការអវត្តមានរបស់ Mainoo ពីក្រុមជម្រើសជាតិ Three Lions របស់លោក Tuchel កាលពីពេលថ្មីៗនេះ មិនសូវជាមានការភ្ញាក់ផ្អើលទេ ដោយសារតែកង្វះពេលវេលាលេងរបស់គាត់។ ទោះជាយ៉ាងណាក៏ដោយ សម្រាប់កីឡាករវ័យជំទង់រូបនេះ វាគឺជាការប៉ះទង្គិចយ៉ាងធ្ងន់ធ្ងរ។ កាលពីជាងមួយឆ្នាំមុន គាត់ត្រូវបានគេលើកសរសើរថាជាមេទ័ពតំបន់បម្រើនាពេលអនាគតសម្រាប់ក្រុមជម្រើសជាតិអង់គ្លេស ប៉ុន្តែឥឡូវនេះគាត់កំពុងឈរនៅខាងក្រៅក្រុម៕
