បរទេស៖ វីរបុរស Premier League លោក Alan Shearer បានអះអាងថា ក្រុម Manchester City របស់លោក Pep Guardiola លែងជាក្រុមដែលមិនអាចចាញ់ហើយ ដោយសារគូប្រជែងរបស់ពួកគេឥឡូវនេះជឿជាក់ថាពួកគេអាចយកឈ្នះលើអតីតក្រុមជើងឯកបាន។ ការធ្លាក់ចុះនេះបានចាប់ផ្តើមតាំងពីក្នុងរដូវកាលមុន បន្ទាប់ពីកីឡាករ Rodri បានរងរបួស ACL ដែលបានធ្វើឱ្យគាត់អវត្តមានពីការប្រកួតភាគច្រើននៃយុទ្ធនាការ ២០២៤-២៥។ ការអវត្តមានរបស់ខ្សែបម្រើរូបនេះបានធ្វើឱ្យក្រុម Cityzens (ឈ្មោះហៅក្រៅរបស់ Man City) ជួបការលំបាកយ៉ាងខ្លាំង ដោយពួកគេបានចាញ់ការប្រកួតលីគចំនួន ៩ លើក ដែលជាចំនួនច្រើនបំផុតក្នុងយុគសម័យលោក Guardiola ហើយបានបញ្ចប់ដោយមានគម្លាត ១៣ ពិន្ទុ ពីក្រុមជើងឯក Liverpool។
បន្ទាប់ពីបានធ្វើការផ្លាស់ប្តូរក្រុមដ៏ធំនៅក្នុងទីផ្សារដោះដូរកីឡាករខែមករា និងរដូវក្តៅ City សង្ឃឹមថាពួកគេនឹងចាប់ផ្តើមរដូវកាលថ្មីដោយភាពរីករាយជាថ្មី។ ពួកគេបានចាប់ផ្តើមយុទ្ធនាការដោយជ័យជម្នះ ៤-០ យ៉ាងចាស់ដៃលើក្រុម Wolves ក្នុងការប្រកួតបើកឆាក ប៉ុន្តែបានបរាជ័យទល់នឹងក្រុម Spurs និង Brighton។
ថ្លែងទៅកាន់ Betfair វីរបុរសរបស់ក្លិប Newcastle បាននិយាយថា៖ «ខ្ញុំមិនអាចនិយាយបានថាលោក Pep បានបាត់បង់សមត្ថភាពរបស់គាត់នោះទេ ប៉ុន្តែខ្ញុំអាចនិយាយបានថាក្រុមរបស់គាត់បានបាត់បង់ចង្វាក់នៃការឈ្នះ។ គ្មានការងឿងឆ្ងល់ទេថា រដូវកាលមុនបានធ្វើឱ្យពួកគេឈឺចាប់ និងខូចខាត ហើយពួកគេកាន់តែងាយស្រួលក្នុងការប្រកួតជាមួយជាងកាលពីពីររដូវកាលមុន។ យើងបានឃើញពីអ្វីដែលការរងរបួសរបស់ Rodri កាលពីឆ្នាំមុន ហើយគ្មានការងឿងឆ្ងល់ទេដែលទំនុកចិត្តរបស់ពួកគេបានធ្លាក់ចុះ។ ខ្ញុំក៏គិតថា ‘កត្តាគំរាមកំហែង’ របស់ពួកគេក៏អាចបានបាត់បង់ដែរ ដោយសារតែអ្វីដែលបានកើតឡើងកាលពីឆ្នាំមុន។ ក្រុមដទៃបានដឹងថាមិនមែនពួកគេមិនអាចចាញ់នោះទេ ពួកគេអាចឈ្នះប្រសិនបើពួកគេវាយលុកលើ Man City អ្នកអាចស៊ុតបញ្ចូលទីបានប្រសិនបើអ្នកមានជំនឿថានឹងអាចប្រកួតជាមួយពួកគេ។ ប្រហែលជា ១៨ ខែមុន ក្រុមដទៃខ្លាច City ស្ទាក់ស្ទើរក្នុងការវាយលុកពួកគេ និងត្រៀមខ្លួនអង្គុយការពារយ៉ាងជ្រៅ។ ឥឡូវនេះ ក្រុមដទៃជឿជាក់ថាពួកគេអាចប្រកួតជាមួយ Man City ហើយយកឈ្នះពួកគេ»។
ក្រុម Cityzens នឹងត្រលប់មកសកម្មភាពវិញនៅក្នុងក្របខណ្ឌ Premier League នៅថ្ងៃអាទិត្យនេះ នៅពេលដែលពួកគេទទួលស្វាគមន៍ក្រុមគូប្រជែង Manchester United នៅក្នុងជំនួប derby នៅកីឡដ្ឋាន Etihad។ វាអាចជាការប្រកួតដែលលោក Guardiola និងក្រុមត្រូវតែឈ្នះឱ្យបាន៕
