បរទេស៖ Hatton មានអាយុ ៤៦ ឆ្នាំ នៅពេលដែលគាត់បានទទួលមរណភាពកាលពីថ្ងៃអាទិត្យ។ អ្នកប្រដាល់ដ៏ល្បីល្បាញរូបនេះត្រូវបានគេរកឃើញថាស្លាប់នៅក្នុងផ្ទះរបស់គាត់នៅទីក្រុង Tameside តំបន់ Greater Manchester។ បន្ទាប់ពីការស្លាប់របស់គាត់ ក្រុម Man City បានចេញសេចក្តីថ្លែងការណ៍ដើម្បីចូលរួមរំលែកទុក្ខ។ អតីតកីឡាករក្លិប Man City លោក Kompany ក៏បានបង្ហោះនៅលើបណ្តាញសង្គមដើម្បីចូលរួមរំលែកទុក្ខដល់ Hatton ផងដែរ។
ដោយបានបង្ហោះនៅលើបណ្តាញសង្គម X (ពីមុនហៅថា Twitter) លោក Kompany បានបង្ហោះរូបថតរបស់គាត់និង Hatton ពីពេលដែលគាត់នៅជាកីឡាកររបស់ City។ អតីតខ្សែការពាររូបនេះបានសរសេរ៖ «យើងនឹងនឹកអ្នក Ricky។ គំនិតរបស់យើងគឺនៅជាមួយក្រុមគ្រួសារនិងមិត្តភក្តិ។ សូមឱ្យវិញ្ញាណក្ខន្ធអ្នកបានទៅកាន់សុគតិភពទៅចុះ អ្នកប្រដាល់ក្នុងរឿងព្រេង»។
We’ll miss you Ricky. Our thoughts are with the family and friends. Rest in piece legend 🙏🏾 💔 pic.twitter.com/CDK5QbRpUl
— Vincent Kompany (@VincentKompany) September 14, 2025
ដោយបានចាប់ផ្តើមអាជីពរបស់គាត់ក្នុងឆ្នាំ ១៩៩៧ កីឡាករ Hatton បានកាន់កាប់ជើងឯកពិភពលោកជាច្រើនទាំងនៅក្នុងប្រភេទទម្ងន់ super-lightweight និង welterweight។ គាត់បានល្បីល្បាញបន្ទាប់ពីលើកពានជើងឯក British super-lightweight ក្នុងឆ្នាំ ២០០០។ ប្រាំឆ្នាំក្រោយមកក្នុងឆ្នាំ ២០០៥ គាត់បានកត់ត្រានូវសមិទ្ធផលដ៏អស្ចារ្យបំផុតក្នុងអាជីពរបស់គាត់ ខណៈដែលគាត់បានយកឈ្នះអ្នកប្រដាល់ដ៏ល្បីល្បាញ Kostya Tszyu ដើម្បីក្លាយជាម្ចាស់ជើងឯកពិភពលោកនៅកីឡដ្ឋាន MEN Arena ក្នុងទីក្រុង Manchester។ ការប្រកួតដ៏ល្បីល្បាញផ្សេងទៀតក្នុងអំឡុងពេលអាជីពរបស់គាត់គឺការប្រកួតទល់នឹង Floyd Mayweather និង Manny Pacquiao ក្នុងឆ្នាំ ២០០៧ និង ២០០៩ រៀងៗខ្លួន។ គាត់បានចូលនិវត្តន៍ពីកីឡានេះក្នុងឆ្នាំ ២០១២ ប៉ុន្តែត្រូវបានគ្រោងនឹងត្រលប់មកវិញនៅចុងឆ្នាំនេះ។
មុនការប្រកួត Manchester derby នៅល្ងាចថ្ងៃអាទិត្យនេះ វាត្រូវបានបញ្ជាក់ថា ក្រុម City នឹងធ្វើការគោរពវិញ្ញាណក្ខន្ធរយៈពេលមួយនាទីដើម្បីជាកិត្តិយសដល់ Hatton នៅកីឡដ្ឋាន Etihad Stadium។ ក្រុមទាំងពីរនឹងពាក់បូពណ៌ខ្មៅដើម្បីរំលឹកដល់អ្នកប្រដាល់ដែលបានទទួលមរណភាពផងដែរ៕
