បរទេស៖ ក្រុមប្រឹក្សាក្រុង Milan បានបោះឆ្នោតអនុម័តការលក់កីឡដ្ឋាន San Siro និងតំបន់ជុំវិញរបស់ខ្លួនទៅឲ្យក្លឹប AC Milan និង Inter Milan នៅម៉ោង ៣:៤៥ នាទីព្រឹក បន្ទាប់ពីការពិភាក្សាដ៏វែងឆ្ងាយ។ សេចក្តីសម្រេចនេះបានអនុម័តដោយមានសំឡេងគាំទ្រ ២៤ ទល់នឹង ២០ ហើយវាតម្រូវឲ្យមានការអនុម័តពីក្រុមប្រឹក្សាក្រុង បន្ទាប់ពីអភិបាលក្រុងបានយល់ព្រមលក់ដីនេះទៅឲ្យក្លឹបទាំងពីរក្នុងតម្លៃ ១៩៧ លានអឺរ៉ូ។ ផែនការនេះមានគោលបំណងឲ្យកីឡដ្ឋានថ្មីរួចរាល់ត្រឹមឆ្នាំ ២០៣១ ទាន់ពេលវេលាសម្រាប់ការប្រកួតជើងឯកទ្វីបអឺរ៉ុប (European Championship) នៅឆ្នាំបន្ទាប់។
ក្លឹបទាំងពីរបានចេញសេចក្តីថ្លែងការណ៍រួមថា៖ “AC Milan និង FC Internazionale Milano បង្ហាញពីការពេញចិត្តរបស់ពួកគេចំពោះការអនុម័តរបស់ក្រុមប្រឹក្សាក្រុងលើការលក់ San Siro និងតំបន់ជុំវិញ៖ ជាជំហានប្រវត្តិសាស្ត្រ និងជាការសម្រេចចិត្តសម្រាប់អនាគតរបស់ក្លឹប និងទីក្រុង។” ក្លឹបនានាកំពុងទន្ទឹងរង់ចាំជំហានបន្ទាប់ក្នុងដំណើរការដែលនឹងនាំពួកគេទៅសាងសង់កីឡដ្ឋានថ្មីដែលបំពេញតាមស្តង់ដារអន្តរជាតិខ្ពស់បំផុត និងត្រូវបានកំណត់ថាជារូបតំណាងស្ថាបត្យកម្មថ្មីសម្រាប់ទីក្រុង Milan។
ក្លឹបទាំងពីរគ្រោងនឹងវិនិយោគប្រហែល ១,២ ពាន់លានអឺរ៉ូ ដើម្បីមិនត្រឹមតែសាងសង់កីឡដ្ឋានថ្មីប៉ុណ្ណោះទេ ប៉ុន្តែក៏បង្កើតតំបន់កម្សាន្តសម្រាប់អ្នកគាំទ្រផងដែរ។ គម្រោងអភិវឌ្ឍន៍នេះត្រូវបានបែងចែកជា ៥ តំបន់ ដែលនឹងរួមបញ្ចូលទាំងកីឡដ្ឋាន សារមន្ទីរ ហាងលក់ទំនិញ សណ្ឋាគារ ទីលានបាល់ទាត់ និងច្រើនទៀត។ AC Milan និង Inter បានប្រគល់ការងារនេះឲ្យក្រុមហ៊ុនស្ថាបត្យកម្មពីរគឺ Foster & Partners សម្រាប់ការរៀបចំផែនការទីក្រុង និង Manica សម្រាប់ការសាងសង់កីឡដ្ឋាន។ នៅពេលបញ្ចប់ តំបន់ San Siro ដែលបានអភិវឌ្ឍន៍ឡើងវិញត្រូវបានគេរំពឹងថានឹងបង្កើតកំណើនសេដ្ឋកិច្ច ៣,១ ពាន់លានអឺរ៉ូ ផលិតផលក្នុងស្រុកសរុប (GDP) ១,៤ ពាន់លានអឺរ៉ូ និងបង្កើតការងារ ១៦,៣៥០ កន្លែងត្រឹមឆ្នាំ ២០៣៥។
ការសាងសង់កីឡដ្ឋានថ្មីនឹងពាក់ព័ន្ធនឹងការ រុះរើស្ទើរតែទាំងស្រុង នូវកីឡដ្ឋានដ៏ល្បីល្បាញ Stadio Giuseppe Meazza។ ប្រហែល ៩១ ភាគរយ នៃកីឡដ្ឋាន រួមទាំងកន្លែងឈរទស្សនាជាន់ទីមួយ ទីបី និងផ្នែកខ្លះនៃជាន់ទីពីរនឹងត្រូវដកចេញ។ ផ្នែកដែលនៅសល់នឹងត្រូវបានរក្សាទុកនិងអភិវឌ្ឍន៍ឡើងវិញដើម្បីបង្កើតជាសួនច្បារ និងផ្លូវសម្រាប់អ្នកថ្មើរជើង។
ជាមួយនឹងការខិតខំរបស់ Milan និង Inter អស់រយៈពេលជិត ១០ ឆ្នាំដើម្បីមានកីឡដ្ឋានផ្ទាល់ខ្លួន ការអនុម័តរបស់ក្រុមប្រឹក្សាក្រុងបាននាំក្លឹបទាំងពីរមួយជំហានកាន់តែជិតក្នុងការសម្រេចផែនការរបស់ពួកគេ។ ទន្ទឹមនឹងនេះ Inter នឹងទទួលស្វាគមន៍ក្រុម Slavia Praha នៅថ្ងៃអង្គារ ហើយក្រុម Rossoneri (AC Milan) នឹងបន្តសកម្មភាពរបស់ពួកគេទល់នឹង Juventus នៅចុងសប្តាហ៍៕
