បរទេស៖ កីឡាករ Saúl Ñíguez បានចំណាយពេលដ៏ល្អបំផុតអស់ ១៣ ឆ្នាំ នៅ Atlético Madrid ដោយបានរីកចម្រើនឡើងពីកីឡាករវ័យក្មេង លេងនៅក្រុមទីពីររបស់ពួកគេ មុនពេលក្លាយជាកីឡាករស្នូលក្នុង La Liga។ គាត់ជាផ្នែកមួយនៃក្រុមដែលបានឈ្នះពានលីគអេស្ប៉ាញក្នុងឆ្នាំ ២០២១ មុនពេលទីបំផុតត្រូវបានគ្រូបង្វឹក Diego Simeone ដាក់ឲ្យអង្គុយ។ ប៉ុន្តែជម្លោះរបស់កីឡាករវ័យ ៣០ ឆ្នាំរូបនេះមិនមែនជាមួយអ្នកចាត់ការនោះទេ ប៉ុន្តែបែរជាកើតឡើងទៅលើអតីតនាយកកីឡារបស់គាត់ទៅវិញ គឺ Berta។
Saúl អះអាងថា គាត់បានជជែកដោយ ស្មោះត្រង់បំផុត ជាមួយ Simeone ដែលបានប្រាប់គាត់ថា គាត់លែងជាផ្នែកមួយនៃផែនការរបស់គាត់ទៀតហើយ ប៉ុន្តែមាន ភាពជូរចត់ នៅពីក្រោយរបៀបដែលគាត់បានចាកចេញពីក្លិប ដោយសារតែសកម្មភាពរបស់ Berta។ កីឡាករជម្រើសជាតិអេស្ប៉ាញដែលមាន ១៩ ប្រកួតរូបនេះបាន ចោទប្រកាន់ លោក Berta ថាមិនស្មោះត្រង់ ហើយថែមទាំងបានរកឃើញ ភស្តុតាងនៃការកុហក របស់នាយករូបនេះក្នុងឆ្នាំចុងក្រោយនៃការស្នាក់នៅរបស់គាត់នៅ Madrid ដែលរួមមានការខ្ចីជើង ២ លើកទៅ Chelsea និង Sevilla។
ពេលនិយាយជាមួយប្រព័ន្ធផ្សព្វផ្សាយអេស្ប៉ាញ ខ្សែបម្រើរូបនេះបានទម្លាយពីទំនាក់ទំនងរបស់គាត់ជាមួយប្រធាន Arsenal លោក Berta ឥឡូវនេះ។ គាត់បាននិយាយថា៖
«ខ្ញុំជាកីឡាករដែលធំធាត់នៅក្លិប ហើយខ្ញុំបានព្យាយាមជួយក្លិបជានិច្ច ទោះបីជាមានអ្នករិះគន់ខ្ញុំថាមិនព្រមបន្ថយប្រាក់ខែក៏ដោយ»។
«ខ្ញុំបានបន្ថយប្រាក់ខែរបស់ខ្ញុំនៅពេល Atlético សុំខ្ញុំ ខ្ញុំបានទទួលកំណត់ត្រាសន្យានៅពេលដែលពួកគេស្នើ ហើយសូម្បីតែឥឡូវនេះ ខ្ញុំបានធ្វើអ្វីៗដើម្បីធ្វើឲ្យអ្វីៗកាន់តែងាយស្រួលសម្រាប់ពួកគេ។ ខ្ញុំបាននិយាយថា ‘បាទ’ ទៅគ្រប់រឿងទាំងអស់ជានិច្ច។ គាត់ (Berta) មិនបានស្មោះត្រង់ជាមួយខ្ញុំទាំងស្រុងទេ។ ខ្ញុំថែមទាំងបានឃើញភស្តុតាងទៀតផង។ បន្ទាប់មក គាត់បានប្រាប់ខ្ញុំថាគាត់មិនបានកុហក ប៉ុន្តែខ្ញុំបានឃើញភស្តុតាង។ ខ្ញុំបានប្រាប់គាត់កុំឲ្យកុហកខ្ញុំ»។
«រឿងទាំងអស់នោះបានធ្វើឲ្យខ្ញុំឈឺចាប់។ ពីព្រោះប្រសិនបើគាត់បានធ្វើរឿងត្រឹមត្រូវជាមួយខ្ញុំ គាត់នឹងអង្គុយនិយាយជាមួយខ្ញុំ យើងនឹងនិយាយទល់មុខគ្នា។ យើងនឹងរកឃើញដំណោះស្រាយ»។
Saúl បានចាកចេញពី Atleti ជាអចិន្ត្រៃយ៍នៅរដូវក្តៅនេះ ដោយចូលរួមជាមួយក្លិបប្រេស៊ីល Flamengo ជាកិច្ចព្រមព្រៀងរយៈពេល ៣ ឆ្នាំ។ ទន្ទឹមនឹងនេះ លោក Berta បានចាកចេញទៅទីក្រុងឡុងដ៍ ជាកន្លែងដែលលោកឥឡូវនេះមើលការខុសត្រូវប្រតិបត្តិការនៅ Arsenal ជំនួសលោក Edu Gaspar។ ក្នុងអំឡុងពេលរដូវក្តៅ លោក Berta បានចូលរួមក្នុងការនាំយកកីឡាករ Viktor Gyokeres, Eberechi Eze, Christian Mosquera, Martin Zubimendi និង Piero Hincapie មកកាន់ក្លិប។ ក្រុមនៅ Emirates នឹងសង្ឃឹមថា នាយករបស់ពួកគេនឹងមិនប្រកាន់យកវិធីសាស្ត្រស្រដៀងគ្នាចំពោះអាជីពរបស់កីឡាករទាំងនេះឡើយ ដោយផ្អែកលើពាក្យសម្តីដ៏ធ្ងន់ធ្ងររបស់អតីតសហការីរបស់គាត់ម្នាក់នេះ។
នៅពេលលោក Berta ត្រូវបានតែងតាំង សហប្រធាន Josh Kroenke បានលើកសរសើរលោក Berta យ៉ាងខ្លាំង ដោយថ្លែងថា៖ «នរណាដែលស្គាល់បាល់ទាត់ដឹងថា Andrea គឺជាឥស្សរជនដ៏គួរឲ្យចាប់អារម្មណ៍មួយរូប។ គាត់មានចំណេះដឹងទូលំទូលាយអំពីកីឡានេះ មានកំណត់ត្រាដ៏អស្ចារ្យ បណ្តាញទំនាក់ទំនងរឹងមាំ និងបំណងប្រាថ្នាមិនចេះឆ្អែតក្នុងការកសាងក្រុមឈ្នះ»។
លោក Kroenke បន្តថា៖ «Andrea នឹងជាការបន្ថែមដ៏អស្ចារ្យដល់ក្លិបរបស់យើង។ គាត់យល់ពីតម្លៃរបស់យើង និងអ្វីដែលយើងតំណាងឲ្យ ហើយយើងមិនសង្ស័យទេថាគាត់នឹងជួយយើងជំរុញបន្ត និងឈានដល់ជំហានបន្ទាប់ក្នុងការដេញតាមដណ្តើមពានរង្វាន់ធំៗ»។
ទោះបីជា Saúl មានការឈឺចាប់ដោយសារសកម្មភាពរបស់ Berta ក៏ដោយ ក៏ជំពូកនៃអាជីពរបស់គាត់នេះត្រូវបាន បិទ រួចហើយ ដូចជាជាមួយលោក Berta ដែរ។ អ្នកទាំងពីរធ្លាប់ឈ្នះពានរង្វាន់ជាច្រើនជាមួយគ្នានៅប្រទេសអេស្ប៉ាញ ហើយនៅពេលដែលរឿងរ៉ាវបានស្ងប់ស្ងាត់ អាចនឹងមានកន្លែងសម្រាប់ ការផ្សះផ្សា ផងដែរ៕
