បរទេស៖ យោងតាមកាសែត The Telegraph បានឲ្យដឹងថា ក្លឹប Celtic បានរៀបចំ បញ្ជីសម្រាំងបេក្ខជនបីនាក់ (three-man shortlist) សម្រាប់ជំនួសតំណែងលោក Brendan Rodgers គឺ៖ លោក Ange Postecoglou, លោក Robbie Keane, និងលោក Kieran McKenna។ អតីតគ្រូបង្វឹកក្រុម Tottenham លោក Postecoglou ដែលត្រូវបានបណ្តេញចេញបន្ទាប់ពីដឹកនាំក្លឹបឈ្នះពាន Europa League កាលពីខែឧសភា នៅតែជា ឥស្សរជនដែលគួរឱ្យគោរពនៅក្លឹប Celtic ហើយនឹងក្លាយជាការតែងតាំងដ៏ពេញនិយម បើទោះបីជាការដឹកនាំក្រុម Nottingham Forest រយៈពេល ៣៩ ថ្ងៃ របស់លោក បរាជ័យ ក៏ដោយ។ ក្នុងរយៈពេលពីរឆ្នាំ (២០២១-២០២៣) លោកបានជួយក្រុម Hoops ឈ្នះពាន លីគពីរ, League Cup ពីរ និង Scottish Cup មួយ។ ឈ្មោះដ៏ពេញនិយមមួយទៀតនៅក្នុងបញ្ជីរបស់ Celtic គឺលោក Robbie Keane ដែលជាអតីតតារាឆ្នើមក្រុមជម្រើសជាតិ សាធារណរដ្ឋអៀរឡង់។ អាជីពជាគ្រូបង្វឹករបស់លោក Keane បានរីកចម្រើនគួរឱ្យភ្ញាក់ផ្អើល បន្ទាប់ពីទទួលបានភាពជោគជ័យនៅប្រទេស អ៊ីស្រាអែល ជាមួយក្រុម Maccabi Tel Aviv លោកឥឡូវនេះកំពុងដឹកនាំក្រុម Ferencvaros នៅក្នុងប្រទេស ហុងគ្រី ជាទីដែលលោកបាន លើកពានលីគ រួចទៅហើយ។ ចំណែកឯលោក Kieran McKenna ដែលជាអ្នកចាត់ការក្រុម Ipswich Town ក៏នៅតែស្ថិតក្នុងការចាប់អារម្មណ៍របស់ក្លឹប Celtic ផងដែរ។ លោក McKenna ដែលមានវ័យត្រឹមតែ ៣៩ ឆ្នាំ បានកសាងកេរ្តិ៍ឈ្មោះគួរឱ្យចាប់អារម្មណ៍ ដោយដឹកនាំក្រុម Ipswich ឡើងពីលីគលំដាប់ទីបី ទៅកាន់ Premier League ជាមួយនឹងការ ឡើងតំណែងបន្តបន្ទាប់។
ឧបសគ្គផ្នែកហិរញ្ញវត្ថុ៖ ក្លឹប Ipswich នឹងទាមទារ សំណងធ្ងន់ធ្ងរពីក្លឹប Celtic ដើម្បីអនុញ្ញាតឱ្យលោក McKenna ចាកចេញ។ ដោយសារកុងត្រារបស់លោកនៅសល់រហូតដល់ឆ្នាំ ២០២៨ កិច្ចព្រមព្រៀងណាមួយអាចនឹងត្រូវចំណាយអស់ ជាង ៥ លានផោន ដែលជាថ្លៃដែលក្លឹប Celtic ទំនងជា មិនអនុញ្ញាត សម្រាប់អ្នកចាត់ការឡើយ។
លោក Martin O’Neill ដែលមានវ័យ ៧៣ ឆ្នាំ នឹងបោះជំហានចូលរួមជាមួយអតីតខ្សែបម្រើ Shaun Maloney ដើម្បីដឹកនាំក្រុមក្នុងរយៈពេលពីរបីសប្តាហ៍ដ៏ ច្របូកច្របល់ នេះ។ លោក O’Neill បានបញ្ជាក់យ៉ាងច្បាស់ថា លោកមិនមានបំណងដឹកនាំរយៈពេលយូរនោះទេ ហើយបានបង្ហាញពី ទម្រង់អ្នកចាត់ការ ដែល Celtic កំពុងស្វែងរកសម្រាប់ការតែងតាំងបន្ទាប់របស់ពួកគេ។
លោក O’Neill បានមានប្រសាសន៍ថា៖ «ពួកគេកំពុងស្វែងរកអ្នកចាត់ការអចិន្ត្រៃយ៍… ខ្ញុំត្រូវបានគេហៅឱ្យមកធ្វើការងារជាអ្នកចាត់ការបណ្តោះអាសន្ន ហើយនោះជាអ្វីដែលវានឹងកើតឡើង»។ លោកបានបន្តថា៖ «ខ្ញុំនឹងនិយាយថាទេ [ចំពោះការបន្ត] ខ្ញុំគិតថាខ្ញុំនឹងចូលនិវត្តន៍។ ពួកគេកំពុងស្វែងរក អ្នកចាត់ការក្មេងដែលមានសមត្ថភាពបង្ហាញឱ្យឃើញ ដែលមានប្រវត្តិការងារល្អ»។
ទោះជាយ៉ាងណាក៏ដោយ កាសែត The Telegraph បានរាយការណ៍ថា ទោះបីជាការអះអាងរបស់លោក O’Neill យ៉ាងណាក៏ដោយ លោក Postecoglou ប្រហែលជា ជម្រើសដែលក្រុមប្រឹក្សាភិបាលពេញចិត្ត ប្រសិនបើអាចឯកភាពលើលក្ខខណ្ឌនានា។
ការចាកចេញភ្លាមៗរបស់លោក Rodgers បានធ្វើឲ្យក្លឹប Celtic ភ្ញាក់ផ្អើល បន្ទាប់ពីការបរាជ័យ ៣-១ ទល់នឹងក្រុម Hearts។ ការតែងតាំងលោក O’Neill ត្រូវបានគេមើលឃើញថាជា ដំណោះស្រាយបណ្តោះអាសន្ន (stopgap) ដើម្បីរក្សាស្ថិរភាពក្រុមមុនការប្រកួតដ៏ធំពីរ៖ ការប្រកួតលីគទល់នឹងក្រុម Falkirk នៅថ្ងៃពុធ និងការប្រកួតវគ្គពាក់កណ្តាលផ្តាច់ព្រ័ត្រ Scottish League Cup ទល់នឹងក្រុម Rangers នៅថ្ងៃអាទិត្យ។
