បរទេស៖ លោក Ten Hag បានបញ្ចប់តួនាទីរបស់ខ្លួនបន្ទាប់ពីចាញ់ក្រុម West Ham United ក្នុងលទ្ធផល ២-១ ជាការប្រកួតដែលមានភាពចម្រូងចម្រាស។ ការកាត់សេចក្តីនៃការប្រកួតបានកើតចេញពីការស៊ុតបាល់ពិន័យ ១១ម៉ែត្រ ដែលជាការពិន័យកើតឡើងរវាងការប៉ះទង្គិចរវាង De Ligt និងខ្សែប្រយុទ្ធ Danny Ings។ ដំបូងឡើយ អាជ្ញាកណ្តាលនៃការប្រកួតលោក David Coote បានបដិសេធមិនផ្តល់បាល់ពិន័យទេ ប៉ុន្តែបន្ទាប់ពីការពិនិត្យឡើងវិញដែលជំរុញដោយមន្ត្រី VAR លោក Michael Oliver នោះ ការទាត់បាល់មួយគ្រាប់ត្រូវបានអោយក្រុម West Ham។ កីឡាករ Ings បានស៊ុតពីចម្ងាយ ១២យ៉ាត់ដើម្បីទទួលបាន ៣ពិន្ទុសម្រាប់ West Ham ខណៈពេលដែលផ្តល់ជាសម្ពាធចុងក្រោយសម្រាប
ក្រុមលោក Ten Hag នៅ Old Trafford ។ គួរកត់សម្គាល់ថា Howard Webb ដែលជាប្រធានអាជ្ញាកណ្តាលសម្រាប់ PGMOL (Professional Game Match Officials Limited) ក្រោយមកបានសម្តែងថាការសម្រេចចិត្តពិន័យគឺជាកំហុសមួយរបស់ Oliver ដោយសារការប៉ះទង្គិចរវាង De Ligt និង Ings មិនគ្រប់គ្រាន់ដើម្បីផ្តល់បាល់ពិន័យនោះទេ។
កីឡាករ De Ligt មានការខកចិត្តយ៉ាងខ្លាំង បាននិយាយការពារសកម្មភាពរបស់គាត់នៅលើទីលាន ដោយសង្កត់ធ្ងន់ថាគាត់ជឿថាគាត់មិនបានធ្វើអ្វីខុសទេ។ នៅក្នុងសេចក្តីថ្លែងការណ៍មួយដែលត្រូវបានដកស្រង់ដោយកាសែតហូឡង់ De Telegraaf កីឡាករ De Ligt បានសម្តែងការខកចិត្តរបស់គាត់ថា៖ “ជាធម្មតាខ្ញុំតែងតែរិះគន់ខ្លួនឯង ហើយខ្ញុំអាចមានការរំខានពីរឿងដែលខ្ញុំធ្វើមិនបានល្អ។ ប៉ុន្តែនៅទីនេះខ្ញុំមិនអាចធ្វើអ្វីបានអំពីវាទេ មិនអាចបន្ទោសខ្លួនឯងចំពោះរឿងនេះទេ គណៈកម្មាធិការអាជ្ញាកណ្តាលក៏បានប្រាប់យើងថាវាមិនមែនជាការពិន័យនោះទេ”។
ដោយឆ្លុះបញ្ចាំងពីការចាកចេញរបស់ Ten Hag កីឡាករ De Ligt បានសម្តែងការសោកសៅដែលផែនការរបស់ពួកគេសម្រាប់ភាពជោគជ័យរួមគ្នានៅ United ត្រូវបញ្ចប់មុនអាយុ។
គាត់បានបន្ថែមថា៖ “គាត់បាននាំខ្ញុំទៅ Manchester គោលដៅគឺដើម្បីទទួលបានភាពជោគជ័យរួមគ្នាជាមួយ Erik។ គាត់មិនមានសំណាងទេ។ យើងលេងបានល្អក្នុងការប្រកួតជាច្រើន ប៉ុន្តែយើងមិនបានប្រើឱកាសដែលយើងទទួលបាននោះទេ។ វាគួរឱ្យអាម៉ាស់ណាស់ដែលវាត្រូវតែបញ្ចប់ដូចនេះ។ ការបណ្តេញចេញតែងតែជាការពិបាក។ យើងបានពិភាក្សារឿងមួយចំនួន”។
នៅពេលដែល United ឆ្ពោះទៅមុខក្រោមការដឹកនាំថ្មី ការផ្តោតអារម្មណ៍ឥឡូវនេះបានផ្លាស់ប្តូរទៅលើលោក Ruben Amorim ដែលទើបត្រូវបានតែងតាំងឱ្យដឹកនាំបិសាចក្រហម។ អ្នកចាត់ការសញ្ជាតិព័រទុយហ្គាល់មកពីក្លឹប Sporting Lisbon ជាមួយនឹងកេរ្តិ៍ឈ្មោះសម្រាប់ភាពប៉ិនប្រសប់ខាងបច្ចេកទេស និងជំនាញក្នុងការអភិវឌ្ឍន៍យុវជនដែលមានទេពកោសល្យ ដែលតាមអ្វីដែលគណៈគ្រប់គ្រង់របស់ក្លឹប United សង្ឃឹមនឹងនាំមកនូវស្ថេរភាព និងភាពជោគជ័យ។
De Ligt បាននិយាយថា៖ “គាត់ធ្វើបានល្អនៅ Sporting សង្ឃឹមថាគាត់ក៏អាចនាំយើងទៅកម្រិតបន្ទាប់ដែរ។ Amorim មិនមែនជាគ្រូបង្វឹកដំបូងរបស់ខ្ញុំទេ ហើយគាត់នឹងមិនមែនជាគ្រូបង្វឹកចុងក្រោយរបស់ខ្ញុំទេ។ ខ្ញុំមិនត្រឹមតែផ្លាស់ទៅ Manchester United សម្រាប់ Ten Hag ប៉ុណ្ណោះទេ។ ខ្ញុំគិតថា វានៅតែជាក្លឹបដ៏ធំបំផុតមួយនៅក្នុងពិភពលោក។ ខ្ញុំត្រូវតែធ្វើរបស់ខ្លួនឯង ហើយលេងឱ្យបានល្អ។ ខ្ញុំមានអារម្មណ៍ថាសមណាស់ឥឡូវនេះ ហើយអ្វីៗដំណើរការទៅបានល្អ។ សង្ឃឹមថាខ្ញុំអាចបន្តវាទៀត”។
ក្លឹបបិសាចក្រហមនឹងរៀបចំសម្រាប់ការប្រកួតបន្ទាប់របស់ពួកគេក្នុង Premier League ដែលលោក Amorim នឹងបង្ហាញខ្លួនជាលើកដំបូងនៅថ្ងៃទី២៤ ខែវិច្ឆិកាទល់នឹងក្រុម Ipswich Town នៅ Portman Road ។ វាជាការចាប់ផ្តើមនៃការងារថ្មី សម្រាប់ទាំងអ្នកគ្រប់គ្រង និងក្លឹប ជាមួយនឹងអ្នកគាំទ្រចង់មើលថាតើ Amorim អាចធ្វើអោយក្រុមមានភាពរស់រវើកឡើងវិញដែរឬទេ បន្ទាប់ពីរយៈពេលដ៏ច្របូកច្របល់មួយ៕
