កត្តាទាំងនេះ បង្ហាញពីភាគរយខ្ពស់ដែល Vinicius នឹងចាកចេញពី Real Madrid

បរទេស៖ នេះបើយោងតាមការចេញផ្សាយរបស់ Sport បានអោយដឹងថាកីឡាករ Luka Modric បានឈ្លោះប្រកែកជាមួយនឹងកីឡាករ Vinicius កំឡុងពេលពួកគេប្រកួតឈ្នះ ៣-២ លើក្រុម Leganes កាលពីពេលថ្មីៗនេះ។ កីឡាករ Vinicius ត្រូវបានគេនិយាយថាបានចាកចេញពីបន្ទប់ផ្លាស់សំលៀកបំពាក់ដោយមិនបាននិយាយជាមួយមិត្តរួមក្រុមរបស់គាត់ ហើយរបាយការណ៍បានអះអាងថាគាត់បានក្លាយជាមនុស្សផ្សេងគ្នាចាប់តាំងពីការបាត់បង់ពាន Ballon d’Or ទៅកាន់ខ្សែបម្រើ Rodri របស់ Manchester City ។ មនុស្សជាច្រើននៅក្នុងក្រុមត្រូវបានគេនិយាយថាកំពុងអស់ការអត់ធ្មត់ជាមួយនឹងអាកប្បកិរិយារបស់គាត់ទាំងនៅលើ និងក្រៅទីលាន។

ចាប់តាំងពីមានការមិនពេញចិត្តនោះ កីឡាករ Vinicius បានជួបនឹងបញ្ហាទម្រង់លេងរបស់គាត់។ គាត់មិនបានស៊ុតបញ្ចូលទីនៅ La Liga ចាប់តាំងពីថ្ងៃទី៩ ខែវិច្ឆិកា ហើយគាត់អាចស៊ុតបញ្ចូលទីតែ ២ប្រកួតប៉ុណ្ណោះ ក្នុងចំណោះ ៩ប្រកួតដែលគាត់បានបង្ហាញក្នុងអំឡុងឆ្នាំ២០២៥។ ឥឡូវនេះ ក្លឹប Madrid ត្រូវបានបញ្ជាក់ថាកំពុងចរចារកុងត្រាថ្មីជាមួយកីឡាករសញ្ជាតិប្រេស៊ីល ប៉ុន្តែការផ្តល់ជូនដំបូងរបស់ពួកគេត្រូវបានបដិសេធ ហើយប្រភពមួយចំនួននៅក្នុងក្លឹបបាននិយាយថាការលក់រូបគាត់នឹងក្លាយជាផលប្រយោជន៍ដ៏ល្អបំផុតរបស់មនុស្សគ្រប់គ្នា។

ក្លឹបនៅអារ៉ាប៊ីសាអូឌីតដែលមិនបញ្ចេញឈ្មោះត្រូវបានគេនិយាយថាសុខចិត្តចំណាយរហូតដល់ ៣០០លានអឺរ៉ូ សម្រាប់កីឡាករ Vinicius ហើយអាចផ្តល់ឱ្យគាត់នូវកិច្ចសន្យារយៈពេលប្រាំឆ្នាំដែលមានតម្លៃ ២០០លានអឺរ៉ូក្នុងមួយរដូវកាល។ ដោយសារតែពេលនេះក្លឹប Madrid មានកីឡាករ Kylian Mbappe និង Rodrygo ដែលអ្នកទាំងពីរអាចលេងក្នុងតំណែងរបស់កីឡាករ Vinicius។

ក្លឹប Real Madrid នឹងត្រូវប្រកួតជាមួយក្លឹប Man City នៅក្នុងការប្រកួត Champions League ដ៏ធំនៅពាក់កណ្តាលសប្តាហ៍។ កីឡាករ Vinicius ស្ទើរតែប្រាកដថានឹងអាចបង្ហាញខ្លួនក្នុងការប្រកួតនោះ៕