បរទេស៖ នេះបើយោងតាមការចេញផ្សាយរបស់ GiveMeSport បានអោយដឹងថាកីឡាករ Garnacho នឹងផ្តល់អាទិភាពដល់ការផ្លាស់ប្តូរនៅក្នុងក្របខ័ណ្ឌកំពូលរបស់អង់គ្លេសនៅរដូវក្តៅនេះ មុនពេលជម្រើសទៅបរទេស ខណៈដែលគាត់មានបំណងបង្ហាញខ្លួនឯងនៅក្នុងក្របខ័ណ្ឌ Premier League បន្ទាប់ពីធ្លាក់ចេញពីជម្រើសរបស់ Ruben Amorim ។ ក្លឹប United ចង់លក់កីឡាករវ័យ ២០ឆ្នាំអោយបានឆាប់តាមដែលអាចធ្វើទៅបាន ហើយដូច្នេះពួកគេអាចនឹងត្រូវបង្ខំឱ្យបញ្ចុះតម្លៃលក់ពី ៧០លានផោនអោយមកត្រឹមតែ ៤០លានផោន ដើម្បីសម្រួលដល់ការផ្ទេរមួយនេះ។
ក្លឹប Chelsea និង Aston Villa ធ្លាប់ត្រូវបានរាយការណ៍ថាកំពុងចាប់អារម្មណ៍លើ Garnacho ហើយគាត់ទំនងជាមិនខ្វះក្លឹបចង់បាននោះទេ ប្រសិនបើគាត់ផ្តល់ឪកាសដ៏ក្លឹបនៅ Premier League ផ្សេងទៀត។ ការចាប់អារម្មណ៍ពីបរទេសក៏មានដូចជាក្លឹប Napoli និងក្លឹប Bayer Leverkusen ដែលដឹកនាំដោយលោក Erik ten Hag។
កីឡាករ Garnacho ត្រូវបានគេមើលឃើញថាចង់ចាកចេញពី Old Trafford ចាប់តាំងពីគាត់បាននិយាយជាសាធារណៈប្រឆាំងនឹង Amorim សម្រាប់ការដាក់គាត់លេងជាកីឡាករបម្រុងអំឡុងពេល Man Utd ចាញ់ក្រុម Tottenham Hotspur វគ្គផ្តាច់ព្រ័ត្រ Europa League កាលពីខែមុន ដែលបង្កើនការប្រេះឆារវាងអ្នកទាំងពីរ។
កីឡាករ Garnacho បានចូលរួមជាមួយ United តាំងពីអាយុ ១៦ឆ្នាំពី Atletico Madrid ហើយបានចូលលេងក្នុងក្រុមដំបូងយ៉ាងឆាប់រហ័ស ហើយបានស៊ុតបញ្ចូលទីក្នុងការប្រកួតសំខាន់របស់បិសាចក្រហមក្រោមការដឹកនាំរបស់លោក Ten Hag នៅពេលគាត់មានអាយុ ១៨ឆ្នាំ និងក្លាយជាការកីឡាករអចិន្ត្រៃយ៍នៅក្នុងក្រុមឈុតធំនាឆ្នាំ២០២៣។ ប៉ុន្តែអាជីពរបស់ខ្សែបម្រើស្លាបរូបនេះបានប្រែក្លាយជាជូរចត់ក្រោមការដឹកនាំរបស់ Amorim ។
ទាំងក្លឹប និងកីឡាករនឹងសង្ឃឹមថាបញ្ហានេះនឹងត្រូវបានដោះស្រាយយ៉ាងឆាប់រហ័ស ខណៈដែល Garnacho ដាក់គោលដៅដើម្បីលេងការប្រកួតមុនបើករដូវកាលនៅខែក្រោយសម្រាប់ក្លឹបណាមួយដែលជាគោលដៅបន្ទាប់របស់គាត់៕
