បរទេស៖ យោងតាមរបាយការណ៍បានឱ្យដឹងថា ខ្សែបម្រើស្លាបរបស់ក្លិប Athletic បានរងរបួស ហើយត្រូវបានប្ដូរចេញមុនចប់តង់ទីមួយ ក្នុងពេលប្រកួតជម្រុះ World Cup ទល់នឹងក្រុមតួកគីកាលពីថ្ងៃអាទិត្យ។ ក្លិបបានចេញសេចក្តីថ្លែងការណ៍ផ្លូវការមួយដើម្បីបញ្ជាក់ពីស្ថានភាពរបួសរបស់គាត់ ដោយបញ្ជាក់ថាជា របួសសាច់ដុំកំភួនជើងកម្រិតមធ្យម។
បន្ទាប់ពីទីផ្សារដោះដូរដ៏គួរឱ្យភ្ញាក់ផ្អើល ដែលការផ្ទេរទៅក្លិប Barcelona របស់គាត់ត្រូវបានក្លិប Athletic រារាំង ហើយកិច្ចសន្យារបស់គាត់ត្រូវបានបន្តរហូតដល់ឆ្នាំ ២០៣៥ កីឡាករ Williams បានចាប់ផ្តើមយុទ្ធនាការរបស់គាត់សម្រាប់ក្លិប Athletic នេះបានយ៉ាងល្អ។ គាត់បានស៊ុតបញ្ចូលទីមួយគ្រាប់ និងបញ្ជូនបាល់ឱ្យមិត្តរួមក្រុមស៊ុតបានពីរលើក ក្នុងការប្រកួត La Liga បីប្រកួត។ ទោះជាយ៉ាងណាក៏ដោយ ឥឡូវនេះក្លិប Athletic កំពុងជួបបញ្ហាហើយ។ បន្ទាប់ពីការសម្រាកអន្តរជាតិ ពួកគេមានការប្រកួតសំខាន់ៗចំនួន ៦ ក្នុងរយៈពេល ១៨ ថ្ងៃ។ យោងតាមសារព័ត៌មាន Onda Cero បានឱ្យដឹងថា ខ្សែបម្រើស្លាបរូបនេះនឹងមិនអាចចូលលេងក្នុងការប្រកួតទល់នឹងក្លិប Alaves នៅសប្តាហ៍នេះបានទេ ហើយមិនច្បាស់លាស់សម្រាប់ការប្រកួតទល់នឹងក្លិប Arsenal នៅថ្ងៃទី ១៦ ខែកញ្ញា និងក្លិប Valencia បួនថ្ងៃក្រោយមក។
កីឡាករវ័យ ២៣ ឆ្នាំរូបនេះ ដែលបានចុះហត្ថលេខាលើកិច្ចសន្យារយៈពេលវែង បន្ទាប់ពីមានពាក្យចចាមអារ៉ាមថាចង់ផ្លាស់ទៅកាន់ក្លិប Barcelona កាលពីរដូវក្តៅនេះ បានស៊ុតបញ្ចូលទីបានមួយគ្រាប់ និងបញ្ជូនបាល់ឱ្យមិត្តរួមក្រុមស៊ុតបានពីរលើក ក្នុងការបង្ហាញខ្លួនបីលើកនៅ La Liga ក្នុងរដូវកាលនេះ។ គាត់ក៏បានបញ្ជូនបាល់ឱ្យកីឡាករ Pedri រកគ្រាប់បាល់បើកឆាកក្នុងការប្រកួតដែលឈ្នះ ៦-០ ទល់នឹងក្រុមតួកគីផងដែរ។
ក្លិប Athletic នឹងបន្តដំណើរការរបស់ពួកគេនៅលីគ La Liga នៅថ្ងៃទី ១៣ ខែកញ្ញា ដោយត្រូវប្រកួតទល់នឹងក្លិប Alaves។ បច្ចុប្បន្នពួកគេស្ថិតនៅចំណាត់ថ្នាក់លេខ ២ ក្នុងតារាង ដោយមាន ៩ ពិន្ទុពីការប្រកួត ៣ លើក។ ពួកគេមានពិន្ទុស្មើនឹងក្រុមដែលឈរលើកំពូលតារាង Real Madrid ប៉ុន្តែមានគ្រាប់ស៊ុតបញ្ចូលបានតិចជាងទើបធ្វើឱ្យពួកគេស្ថិតនៅពីក្រោយក្រុម Los Blancos៕
