បរទេស៖ យោងតាមសារព័ត៌មាន Foot Mercato បានឱ្យដឹងថា ថ្នាក់ដឹកនាំក្លិប Manchester City បានកំណត់យកកីឡាករ Bradley Barcola របស់ក្លិប Paris Saint-Germain ជាផែនការបម្រុងរបស់ពួកគេ ប្រសិនបើពួកគេបាត់បង់កីឡាករ Savinho។ កីឡាករជម្រើសជាតិបារាំងវ័យត្រឹមតែ ២២ ឆ្នាំរូបនេះ គឺស័ក្តិសមនឹងតម្រូវការរបស់លោក Guardiola សម្រាប់តំណែងខ្សែបម្រើស្លាប មានល្បឿនលឿន មានភាពបត់បែន និងមានភាពក្លាហានក្នុងការគ្រប់គ្រងបាល់។
ក្លិប PSG មិនចង់ឱ្យគាត់ចាកចេញនោះទេ ទោះបីជាមានការផ្សារភ្ជាប់ជាមួយក្លិប Liverpool ក៏ដោយ ជាពិសេសបន្ទាប់ពីគាត់បានបង្ហាញទម្រង់លេងដ៏ល្អនៅទីក្រុងប៉ារីស។ ប៉ុន្តែប្រសិនបើក្លិប City បានដាក់សំណើផ្លូវការមួយ ស្ថានភាពអាចនឹងផ្លាស់ប្តូរយ៉ាងខ្លាំង។ នៅទីបំផុត ការផ្លាស់ប្តូរនេះមិនបានកើតឡើងទេ ដោយកីឡាករ Savinho នៅជាមួយក្លិបដដែល ហើយ Barcola ក៏បន្តនៅលីគ Ligue 1 ផងដែរ។
កីឡាករ Savinho ទើបតែក្លាយជាកីឡាករផ្លូវការរបស់ក្លិប City កាលពីរដូវក្តៅមុន បន្ទាប់ពីត្រូវបានទិញយកពីក្លិប Girona ដែលជាផ្នែកមួយនៃបណ្តាញ City Football Group។ ទោះបីជាគាត់ជាកីឡាករថ្មីម្នាក់នៅកីឡដ្ឋាន Etihad ក៏ដោយ គាត់បានបង្ហាញសមត្ថភាពរបស់គាត់យ៉ាងឆាប់រហ័ស ដោយបានបង្ហាញខ្លួនចំនួន ៤៨ ប្រកួតនៅគ្រប់កម្មវិធីទាំងអស់។ ខណៈដែលគាត់រកបានតែបីគ្រាប់ក៏ដោយ លោក Guardiola ពេញចិត្តចំពោះសមត្ថភាពរបស់គាត់ក្នុងការវាយបំបែកខ្សែការពារ និងផ្តល់ជម្រើសយ៉ាងចាំបាច់ក្នុងការវាយលុក។ កីឡាករសញ្ជាតិប្រេស៊ីលរូបនេះនៅសល់កិច្ចសន្យាបីឆ្នាំទៀត ដែលធ្វើឱ្យក្លិប City មិនចាំបាច់ប្រញាប់ប្រញាល់ក្នុងការពិចារណាសំណើណាមួយឡើយ។
កីឡាករ Savinho មិនទាន់បានបង្ហាញខ្លួនក្នុងរដូវកាលនេះទេ ដោយសាររបួសមុនរដូវកាល ប៉ុន្តែគេរំពឹងថានឹងត្រលប់មកលេងវិញនៅពេលដែលក្លិប Manchester United មកសួរសុខទក្ខដល់កីឡដ្ឋាន Etihad ក្នុងការប្រកួត Derby នៅថ្ងៃអាទិត្យនេះ។ លោក Guardiola នឹងស្វាគមន៍ការបន្ថែមថាមពលនៅតំបន់ស្លាប ជាពិសេសនៅពេលដែលកីឡាករផ្សេងទៀតក្នុងក្រុមរងរបួស៕
