បរទេស៖ លោក Mourinho ដែលបានចាប់ផ្តើមអាជីពជាអ្នកចាត់ការរបស់លោកនៅក្លឹប Benfica ក្នុងឆ្នាំ ២០០០ ប៉ុន្តែបានចាកចេញបន្ទាប់ពីដឹកនាំបានត្រឹមតែ ១០ ប្រកួតប៉ុណ្ណោះ បន្ទាប់ពីមានជម្លោះជាមួយប្រធានក្លឹប បានវិលត្រឡប់មកវិញក្នុងក្តីសុបិន្តនៅក្នុងការប្រកួតដែលបានយកឈ្នះលើក្រុម AVS ក្នុងលទ្ធផល ៣-០ កាលពីថ្ងៃសៅរ៍។ អ្នកចាត់ការវ័យ ៦២ ឆ្នាំរូបនេះបានមកជំនួសតំណែងលោក Bruno Lage នៅក្រុម Benfica បន្ទាប់ពីសញ្ជាតិព័រទុយហ្គាល់ដូចគ្នានេះត្រូវបានបណ្តេញចេញ បន្ទាប់ពីចាញ់យ៉ាងគួរឱ្យភ្ញាក់ផ្អើលទល់នឹងក្រុម Qarabag នៅក្នុងក្របខ័ណ្ឌ Champions League កាលពីថ្ងៃអង្គារ។
ខណៈដែលលោក Mourinho រីករាយនឹងការវិលត្រឡប់មកកាន់ Benfica វិញ លោកបានទទួលស្គាល់ថា ការងារនៅក្រុមជម្រើសជាតិព័រទុយហ្គាល់ ដែលលោកអះអាងថា លោកធ្លាប់បានបដិសេធកាលពីមុន គឺជាតួនាទីដែលនឹងធ្វើឱ្យលោកត្រលប់មកផ្ទះវិញ បន្ទាប់ពីអាជីពដ៏ជោគជ័យនៅក្នុងបាល់ទាត់ក្លឹប។
ថ្លែងបន្ទាប់ពីការប្រកួតដែលក្រុម Benfica ទទួលបានជ័យជម្នះលើក្រុម AVS កាលពីចុងសប្តាហ៍ លោក Mourinho បានប្រាប់ Sky Sports News ថា៖ “ខ្ញុំនិយាយត្រង់ ខ្ញុំតែងតែគិតថាខ្ញុំនឹងត្រលប់ទៅព័រទុយហ្គាល់វិញ។ ប៉ុន្តែខ្ញុំតែងតែគិតថាខ្ញុំនឹងត្រលប់មកកាន់ក្រុមជម្រើសជាតិវិញ។ ខ្ញុំដឹងថាការងារនៅក្រុមជម្រើសជាតិនឹងកើតមានឡើងមិនយូរមិនឆាប់ទេ។ វាកើតមានឡើងមុន ប៉ុន្តែខ្ញុំមិនអាចទទួលយកបាន។ ខ្ញុំកំពុងគិតថាថ្ងៃណាមួយវានឹងកើតឡើង។ ខ្ញុំគិតថាវាជាផលវិបាកធម្មជាតិនៃអាជីពរបស់ខ្ញុំ។ [ប៉ុន្តែ] វាបានកើតឡើងទៅជា Benfica ទៅវិញ ដែលជាក្លឹបយក្ស”។
ការតែងតាំងលោក Mourinho នៅ Benfica បានធ្វើឱ្យលោកត្រលប់មកដឹកនាំវិញមិនដល់មួយខែផង បន្ទាប់ពីលោកត្រូវបានបណ្តេញចេញពីក្លឹប Fenerbahce បន្ទាប់ពីចាញ់ក្នុងការប្រកួតវគ្គ play-offs នៃក្របខ័ណ្ឌ Champions League ទល់នឹងក្រុម Benfica។ លោកបានទទួលស្គាល់ថាការដឹកនាំក្រុម Super Lig គឺជា “កំហុស” មួយ។
លោក Mourinho គ្រោងនឹងវិលត្រឡប់មកកាន់កីឡដ្ឋាន Estadio da Luz វិញ នៅពេលដែលក្រុម Benfica ទទួលស្វាគមន៍ក្រុម Rio Ave ក្នុងក្របខ័ណ្ឌ Primeira Liga នៅថ្ងៃអង្គារ។ លោកនឹងទៅកន្លែងចាស់មួយទៀត នៅពេលដែលក្រុម Benfica ធ្វើដំណើរទៅកាន់អតីតក្លឹបរបស់លោកគឺ Chelsea ក្នុងក្របខ័ណ្ឌ Champions League នៅថ្ងៃទី ៣០ ខែកញ្ញា៕
