បរទេស៖ យោងតាមសារព័ត៌មានអេស្ប៉ាញ Sport កីឡាករ Julian Alvarez មានប្រការដោះលែង (release clause) តម្លៃ ៥០០ លានអឺរ៉ូ ហើយនៅជាប់កិច្ចសន្យាជាមួយ Atletico រហូតដល់ឆ្នាំ ២០៣០។ Barcelona រំពឹងថា Atletico នឹងប្រើប្រាស់ប្រការនោះជាលេស ហើយមិនទំនងជាចរចាក្នុងតម្លៃទាបជាង ២០០ លានអឺរ៉ូ នោះទេ។
ទោះជាយ៉ាងណា Barcelona ជឿជាក់ថា លក្ខខណ្ឌផ្ទាល់ខ្លួននឹងមិនមែនជាបញ្ហានោះទេ ដោយសារ Alvarez ជាអ្នកគាំទ្រក្លឹបតាំងពីកុមារភាព ដែលទទួលបានការបំផុសគំនិតពីមិត្តរួមក្រុមអាហ្សង់ទីនគឺកីឡាករ Lionel Messi។ ខ្សែប្រយុទ្ធរូបនេះត្រូវបានកំណត់ថាជាអ្នកស្នងតំណែងរបស់ខ្សែប្រយុទ្ធប៉ូឡូញ Robert Lewandowski ដែលការចាកចេញរបស់លោកអាចនឹងជួយសម្រួលស្ថានភាពហិរញ្ញវត្ថុរបស់ Barcelona និងអនុញ្ញាតឲ្យពួកគេដេញថ្លៃ Alvarez ដោយមិនបំពានច្បាប់ចំណាយរបស់ La Liga។
Alvarez បានរីករាយនឹងការចាប់ផ្តើមរដូវកាលដ៏រឹងមាំ ដោយរកបាន ៦ គ្រាប់ និងបញ្ជូនបាល់ ១ គ្រាប់ ក្នុងការប្រកួត ៧ លើក រួមទាំងការស៊ុតបញ្ចូលទី ២ គ្រាប់ទល់នឹង Real Madrid ក្នុងជំនួបដឺប៊ីកាលពីសប្តាហ៍មុន។ ភាពចម្រូងចម្រាសខ្លះបានកើតឡើងនៅពេលដែលរូបគេហាក់ដូចជាមិនសប្បាយចិត្តបន្ទាប់ពីត្រូវបានប្តូរចេញដោយគ្រូបង្វឹក Atletico លោក Diego Simeone ក្នុងការប្រកួតទល់នឹង Mallorca។ ទោះជាយ៉ាងណា Alvarez បានច្រានចោលរាល់ការលើកឡើងពីភាពប្រេះឆា ដោយបញ្ជាក់ថាអ្វីៗគ្រប់យ៉ាងគឺល្អរវាងរូបគេនិងគ្រូបង្វឹក។
ជាមួយនឹងការបោះឆ្នោតប្រធានាធិបតីកាន់តែខិតជិត ប្រធានក្លឹប Barcelona លោក Joan Laporta កំពុងស្វែងរកការចុះហត្ថលេខាលើកីឡាករល្បីៗដើម្បីលើកស្ទួយស្មារតីអ្នកគាំទ្រ។ ខណៈដែល Alvarez នៅតែជាគោលដៅកំពូល ជម្រើសមួយទៀតដែលកំពុងពិចារណាគឺខ្សែប្រយុទ្ធ Erling Haaland របស់ Manchester City។ ទន្ទឹមនឹងនេះ គ្រូបង្វឹក Hansi Flick ត្រូវបានគេនិយាយថាពេញចិត្តនឹងខ្សែប្រយុទ្ធ Serhou Guirassy របស់ Borussia Dortmund ជាជម្រើសជំនួសដ៏សក្តានុពល។
Barcelona ត្រូវត្រៀមខ្លួនទទួលស្វាគមន៍ក្រុមការពារតំណែងជើងឯក Paris Saint-Germain ក្នុងក្របខ័ណ្ឌ Champions League។ ខណៈពេលនោះ Alvarez និង Atletico Madrid នឹងព្យាយាមត្រឡប់ទៅរកផ្លូវឈ្នះវិញក្នុងពានរង្វាន់នេះ នៅពេលដែលពួកគេត្រូវប្រឈមមុខនឹង Eintracht Frankfurt នៅថ្ងៃអង្គារ៕
