បរទេស៖ កីឡាករ Harry Maguire បានចូលរួមជាមួយក្រុម United ក្នុងឆ្នាំ ២០១៩ ពីក្រុម Leicester ក្នុងតម្លៃ ៨០ លានផោន (១០៦ លានដុល្លារ) ដែលជាតម្លៃកំណត់ត្រាពិភពលោកសម្រាប់ខ្សែការពារនៅពេលនោះ។ គាត់បានឆ្លងកាត់រដូវកាលឡើងចុះជាច្រើន ហើយត្រូវបានតែងតាំងជាប្រធានក្រុមនៅខែមករា ២០២០។ បើទោះបីជាបាត់បង់តំណែងចាប់ផ្តើមក្រោមការដឹកនាំរបស់លោក Erik ten Hag និងត្រូវបានដកតំណែងប្រធានក្រុមនៅឆ្នាំ ២០២៣ ក៏ដោយ ក៏គាត់បានតស៊ូប្រយុទ្ធត្រឡប់មកកាន់ក្រុមវិញ ហើយបានក្លាយជាកីឡាករសំខាន់សម្រាប់គ្រូបង្វឹក Ruben Amorim ដោយស៊ុតបញ្ចូលទីបានគ្រាប់ដ៏សំខាន់ទល់នឹង Lyon, Leicester និង Ipswich កាលពីរដូវកាលមុន។ ការតែតបាល់បញ្ចូលទីរបស់គាត់នៅនាទីទី ៨៥ នៅកីឡដ្ឋាន Anfield បានបង្កើនកិត្តិនាមរបស់គាត់ជា Cult-hero យ៉ាងខ្លាំង។
លោក Amorim បាននិយាយថា៖ «Harry Maguire ពិតជាសំខាន់សម្រាប់យើង ហើយបានសំខាន់នៅថ្ងៃនេះ។ គាត់គឺជាឧទាហរណ៍ដ៏អស្ចារ្យ បើគិតពីអ្វីគ្រប់យ៉ាងដែលគាត់បានឆ្លងកាត់ គឺជាឧទាហរណ៍ដ៏ល្អសម្រាប់ក្មេងៗគ្រប់រូប»។
ទោះជាយ៉ាងណាក៏ដោយ គ្រូបង្វឹករូបនេះ មិនមានឆន្ទៈ ក្នុងការពិភាក្សាថាតើក្លឹបមានផែនការបន្តកិច្ចសន្យាថ្មីជាមួយ Maguire ឬអត់នោះទេ ដោយកិច្ចសន្យាបច្ចុប្បន្នរបស់គេនឹងផុតកំណត់នៅខែ មិថុនា ខាងមុខ។
លោក Amorim បាននិយាយនៅក្នុងសន្និសីទសារព័ត៌មានកាលពីថ្ងៃសុក្រថា៖ «យើងពិតជាសប្បាយរីករាយជាមួយ Harry ប៉ុន្តែវាមិនមែនជាពេលវេលាដើម្បីនិយាយអំពីនោះទេ។ ការនិយាយបែបនេះផ្តល់គំនិតថា យើងកំពុងគិតឆ្ងាយណាស់ យើងត្រូវគិតអំពីពេលនេះ។ យើងពិតជាសប្បាយរីករាយជាមួយ Harry គាត់ពិតជាសំខាន់សម្រាប់យើង ប៉ុន្តែយើងគ្រាន់តែត្រូវផ្តោតលើការប្រកួតបន្ទាប់ប៉ុណ្ណោះ»។
លោក Amorim បានសរសើរលោក Maguire ហើយនិយាយថាគាត់ស័ក្តិសមបំផុតក្នុងការលេងក្នុងប្រព័ន្ធ ខ្សែការពារ ៣ នាក់ ប៉ុន្តែលោកក៏បាន ជំរុញ ខ្សែការពាររូបនេះឱ្យកែលម្អសមត្ថភាពរបស់ខ្លួនជាមួយ បាល់ ផងដែរ។
លោក Amorim បានបន្ថែមថា៖ «វាល្អសម្រាប់គាត់ក្នុងការលេងជាមួយខ្សែការពារកណ្តាល ៣ នាក់ ខ្ញុំគិតថាគាត់មានអារម្មណ៍ស្រួលជាង។ ដោយសារតែគាត់លេងនៅកណ្តាល គាត់មិនចាំបាច់ទៅខាងស្លាបច្រើនពេកទេ ដូច្នេះពេលខ្លះអ្នកជួយកីឡាករដោយរបៀបដែលអ្នកលេង។ ខ្ញុំពិតជារីករាយណាស់។ គាត់មិនក្មេងទេ ប៉ុន្តែគាត់អាចរៀនបានច្រើន គាត់អាចកែលម្អបាន»។
«ខ្ញុំគិតថាគាត់អាចល្អជាងនេះទៅទៀតជាមួយបាល់ ព្រោះគាត់មានគុណភាពនោះ ហើយគាត់ត្រូវបង្ហាញវា។ គាត់គឺជាកីឡាករដ៏ធំសម្រាប់យើង ខ្ញុំពិតជាសប្បាយចិត្ត ប៉ុន្តែការប្រកួតនោះបានកន្លងផុតទៅហើយ គ្រាប់បាល់នោះបានកន្លងផុតទៅហើយ ហើយឥឡូវនេះសូមមើលទៅមុខសម្រាប់បច្ចុប្បន្ន និងអនាគត»។
លោក Amorim បានពន្យល់ថា Maguire និង Mason Mount បានទទួល របួសតិចតួច (picked up knocks) ចាប់តាំងពីការឈ្នះនៅកីឡដ្ឋាន Anfield មក។ នេះមានន័យថា អតីតមិត្តរួមក្រុមជម្រើសជាតិ អង់គ្លេស ទាំងពីរនាក់នេះអាចនឹង អវត្តមាន សម្រាប់ការប្រកួតរបស់ United ទល់នឹងក្រុម Brighton and Hove Albion នៅថ្ងៃសៅរ៍។
គ្រូបង្វឹកក៏បានប្រកាសថា កីឡាករ Lisandro Martinez កំពុងមានការរីកចម្រើនល្អ ៨ ខែ បន្ទាប់ពីរបួស ACL (សរសៃពួរជង្គង់ដាច់) ប៉ុន្តែនៅតែមានពេលខ្លះទៀតទើបអាចត្រលប់មកចូលរួមជាមួយក្រុមវិញ។
ក្រុម United បានចាញ់ ៣ ប្រកួតចុងក្រោយ របស់ពួកគេនៅផ្ទះទល់នឹងក្រុម Brighton ហើយលោក Amorim បានសង្កត់ធ្ងន់លើសារៈសំខាន់នៃការ បំភ្លេច ជ័យជម្នះរបស់ពួកគេនៅ Liverpool និងការកត់ត្រាជ័យជម្នះក្នុងលីគ Premier League លើកទីបីជាប់ៗគ្នា។
លោក Amorim បាននិយាយថា៖ «វានឹងក្លាយជាការប្រកួតដ៏លំបាកមួយ។ Brighton ពិតជាសប្បាយក្នុងការមើល ពួកគេពិតជាល្អក្នុងការកសាងការលេង ពួកគេពិតជាខ្លាំងក្នុងការវាយបក (transitions) នៅក្នុងគ្រប់ទិដ្ឋភាពនៃការប្រកួត។ ពួកគេកំពុងធ្វើបានល្អនៅការស៊ុតបាល់ពីតំបន់គ្រោះថ្នាក់ (set pieces) ក្នុងរដូវកាលនេះ ដូច្នេះពួកគេគឺជាក្រុមដែលមានភាពពេញលេញ។ យើងត្រូវមានភាពឆ្លាតវៃពិតប្រាកដ ហើយប្រឈមមុខនឹងការប្រកួតនោះជាមួយនឹងការផ្តោតអារម្មណ៍ពិតប្រាកដលើអ្វីគ្រប់យ៉ាងដែលយើងធ្វើ ពីព្រោះពួកគេគឺជាក្រុមដ៏រឹងមាំមួយ»។
«យើងប្រើប្រាស់ស្មារតីល្អនៃការឈ្នះការប្រកួត យើងដឹងថាវាជាចុងសប្តាហ៍ដ៏ល្អសម្រាប់យើង ប៉ុន្តែការផ្តោតអារម្មណ៍របស់យើងគឺទៅលើការប្រកួតបន្ទាប់។ នោះគឺជារឿងកន្លងផុតទៅហើយ ហើយយើងត្រូវយល់ថា បាល់ទាត់ផ្លាស់ប្តូរច្រើន ជាពិសេសក្លឹបប្រភេទនេះ ដូច្នេះយើងមិនគិតអំពីការប្រកួតចុងក្រោយទេ យើងកំពុងគិតអំពីការប្រកួតនេះ ហើយវានឹងពិបាកខ្លាំងណាស់ក្នុងការឈ្នះ»៕
