បរទេស៖ នេះបើយោងតាមការចេញផ្សាយរបស់ Sky Sports បានអោយដឹងថាកីឡាករ McTominay បានក្លាយជាគោលដៅផ្ទេរសម្រាប់ក្លឹប Fulham នៅក្នុងរដូវក្តៅនេះ ខណៈក្លឹបមួយនេះគ្រោងនឹងពង្រឹងនៅសំណើររបស់ខ្លួនទៅកាន់ក្លឹប Manchester United សម្រាប់ការផ្ទេរកីឡាករសញ្ជាតិស្កុតឡេន។ ក្រុមរបស់ Marco Silva បានយល់ព្រមលើកិច្ចព្រមព្រៀងជាមួយក្លឹប Arsenal រួចហើយសម្រាប់ការផ្ទេរកីឡាករ Emile Smith Rowe ហើយនៅពេលនេះពួកគេចង់ចុះហត្ថលេខាយកខ្សែបម្រើរបស់ក្លឹប United ជាកីឡាករបន្ទាប់។
ក្លឹប United មានឆន្ទៈក្នុងការបញ្ចេញកីឡាករជាច្រើននៅរដូវក្តៅនេះ ដោយក្នុងនោះក៏មានកីឡាករ McTominay ផងដែរ បន្ទាប់ពីលោក Sir Jim Ratcliffe ចូលមកដឹកនាំក្លឹប ក្នុងនាមជាម្ចាស់ភាគហ៊ុនមួយផ្នែក។ ក្លឹបបិសាចក្រហមបានទិញកីឡាករ Joshua Zirkzee និង Leny Yoro រួចហើយ ហើយក៏សង្ឃឹមថានឹងនាំយក Noussair Mazraoui ពី Bayern Munich ផងដែរ។
អនាគតរបស់កីឡាករ McTominay នៅក្លឹបហាក់ដូចជាមិនទាន់ច្បាស់លាស់សម្រាប់រដូវកាលថ្មី បើទោះបីជាលោក Erik ten Hag បាននិយាយថាគាត់ចង់ឱ្យខ្សែបម្រើរូបនេះបន្តនៅ Old Trafford។ គាត់បានប្រាប់អ្នកសារព័ត៌មានក្នុងដំណើរទេសចរណ៍មុនបើករដូវកាលរបស់ក្លឹបថា៖ “យើងមានកីឡាករល្អខ្លាំងណាស់ ដូច្នេះតែងតែមានការចាប់អារម្មណ៍ពីក្លឹបផ្សេងៗ។ នៅពេលដែលអ្នកស៊ុតបញ្ចូលទីបាន 10 គ្រាប់ក្នុងមួយរដូវកាល ហើយថែមទាំងលេងបានល្អសម្រាប់ស្កុតឡេន នោះវានឹងមានការចាប់អារម្មណ៍។ ប៉ុន្តែយើងចង់រក្សាគាត់ទុក ព្រោះគាត់ជាកីឡាករសំខាន់សម្រាប់ក្រុមរបស់យើង។ អ្វីដែលគាត់អាចរួមចំណែកបាន ដូចដែលយើងបានឃើញកាលពីរដូវកាលមុននៅពេលដែលពួកយើងមានកីឡាករចំនួន ៦នាក់ គាត់អាចលេងនៅក្នុងតំណែងដ៏សំខាន់ ហើយគាត់ជាកីឡាករដែលគួរអោយចាប់អារម្មណ៍ខ្លាំងសម្រាប់ក្រុម”។
កិច្ចសន្យារបស់កីឡាករ McTominay នៅ Old Trafford មានសុពលភាពដល់ឆ្នាំ២០២៥ ដែលវាមានន័យថាក្លឹបបិសាចក្រហមត្រូវធ្វើការសម្រេចចិត្តដ៏ធំទៅលើអនាគតរបស់កីឡាករ Scott McTominay។ ខ្សែបម្រើរូបនេះកំពុងស្ថិតក្នុងក្រុមដំបូងសម្រាប់ Pre-Season របស់ពួកគេនៅសហរដ្ឋអាមេរិក៕
