លឺថាក្លឹប Man Utd ចាប់អារម្មណ៍កីឡាកររបស់ក្លឹប Barcelona

បរទេស៖ នេះបើយោងតាមការចេញផ្សាយរបស់ Sport បានអោយដឹងថាក្លឹបបិសាចក្រហមបានសម្លឹងឃើញការចុះហត្ថេលេខារយកកីឡាករ Raphinha ពីក្លឹប Barcelona នៅរដូវក្តៅនេះ ខណៈដែលពួកគេពិចារណាក្នុងការចែកផ្លូវជាមួយកីឡាករ Antony និង Jadon Sancho។ ក្លឹបយក្សកាតាឡានត្រូវការដាក់លក់កីឡាករ ដើម្បីអាចចុះឈ្មោះកីឡាករដែលពួកគេទិញចូលបាននៅរដូវក្តៅនេះ។ ប្រសិនជាក្លឹបនៅ Premier League យល់ព្រមនៅតម្លៃ ៦០លានអឺរ៉ូដែលទាមទារ នោះក្លឹប Barca អាចនឹងពិចារណាក្នុងការលក់កីឡាករសញ្ជាតិប្រេស៊ីល។

កីឡាករ Raphinha ក៏មានព័ត៌មានចចាមអារ៉ាមក្នុងការផ្ទេរទៅកាន់ក្លឹប Al-Nassr នៅ Saudi Pro League ទោះបីជាយ៉ាងណាក៏ដោយអតីតកីឡាកររបស់ក្លឹប Leeds បានបញ្ជាក់ថាគាត់មិនមានផែនការក្នុងការចាកចេញពី Camp Nou នៅក្នុងរដូវក្តៅនេះទេ បើទោះបីជាគាត់ត្រូវកាត់បន្ថយពេលវេលាលេងនៅក្លឹបចាប់តាំងពីកីឡាករ Lamine Yamal បង្ហាញទម្រង់លេងយ៉ាងល្អកាលពីរដូវកាលមុន។ កីឡាករ Antony ក៏ទទួលបាការចាប់អារម្មណ៍ពីសំណាក់ដែលក្លឹប Ronaldo កំពុងលេង ហើយ Sport បានបន្ថែមទៀតថាគាត់កាន់តែខិតជិតក្នុងការចាកចេញពី Old Trafford ខណៈក្លឹបម្ចាស់ជើងឯង Ligue 1 គឺក្លឹប Paris Saint-German ក៏បង្ហាញការចាប់អារម្មណ៍ទៅលើកីឡាករ Sancho ផងដែរ។

មុនពេលទីផ្សារដោះដូរកីឡាករបិទនៅថ្ងៃទី៣០ ខែសីហា ក្លឹប Barcelona មានបំណង់ចង់នាំយកកីឡាករថ្មីមកកាន់ក្លឹប ខណៈដែលពួកគេកំពុងសម្លឹងរកមើលការផ្ទេរកីឡាករ Nico Williams របស់ក្លឹប Athletic Club និងខ្សែបម្រើស្លាប Kingsley Coman របស់ក្លឹប Bayern Munich ប៉ុន្តែទោះជាយ៉ាងណាការចុះហត្ថលេខាថ្មីបន្ថែមទៀតនឹងអាចធ្វើទៅបានលុះត្រាតែមានការលក់ចេញនៅកន្លែងមួយចំនួន ដែលនេះបានផ្តល់ក្តីសង្ឃឹមសម្រាប់ក្លឹប United ក្នុងការនាំយកកីឡាករ Raphinha មកកាន់អង់គ្លេស។

ក្រុមរបស់ Erik ten Hag នឹងចាប់ផ្តើមយុទ្ធនាការ Premier League ឆ្នាំ២០២៤-២៥ របស់ពួកគេនៅថ្ងៃសុក្រ ដោយពួកគេត្រូវប៉ះជាមួយក្រុម Fulham ខណៈក្រុមលោក Hansi Flick ជួបនឹងក្លឹប Valencia មួយថ្ងៃក្រោយមកក្នុងការប្រកួតបើកឆាក La Liga របស់ពួកគេ។ វានៅតែត្រូវមើលថាតើ Raphinha នឹងបង្ហាញខ្លួនក្នុងការប្រកួតដំបូងនៃរដូវកាលថ្មីរបស់ Barca ដែរឬទេ៕