បរទេស៖ នេះបើយោងតាមការចេញផ្សាយរបស់លោក Fabrizio Romano បានអោយដឹងថាខ្សែប្រយុទ្ធវ័យ ១៩ឆ្នាំ ដែលទើបចាកចេញពីក្លឹប West Ham ដោយសារតែផុតកុងត្រា បានកំពុងតែទាក់ទាញភ្នែករបស់ក្លឹប Man City ខណៈដែលក្លឹបចង់នាំយកមកកាន់ Etihad ដោយគ្មានតម្លៃខ្លួន។ កីឡាករជម្រើសជាតិអង់គ្លេសអាយុក្រោម ២០ឆ្នាំ ត្រូវបានដោះលែង បន្ទាប់ពីគាត់មិនអាចឈានដល់ការបន្តកុងត្រាថ្មី។ ការចាកចេញរបស់កីឡាករ Mubama បានបង្ហាញពីការបញ្ចប់ទំនាក់ទំនងដ៏យូរអង្វែងជាមួយក្លឹបនៅទីក្រុងឡុងដ៍ ជាកន្លែងដែលគាត់ទទួលបានការអភិវឌ្ឍន៍ចាប់តាំងពីចូលរួមជាមួយក្រុមយុវជនរបស់ West Ham។
លោក Romano បានបន្ថែមទៀតថាក្លឹប Man City កំពុងធ្វើការឆ្មក់ចរចាជាមួយកីឡាករ Mubama ខណៈកំពុងទទួលបានការចាប់អារម្មណ៍ពីក្លឹប Lyon និង Famalicao ដូចគ្នា។ ក្នុងនោះត្រូវបានគេមើលឃើញថាយុវជនរូបនេះអាចនឹងត្រូវដាក់អោយខ្ចីជើងនៅក្នុងខែមករា ឫក៏រដូវក្តៅក្រោយ ដើម្បីទទួលបានបទពិសោធន៍ និងការអភិវឌ្ឍន៍ជំនាញ។ Man City ចាត់ទុក Mubama ថាជាយុវជនដែលមានទេពកោសល្យ អាចទទួលបានការណែនាំ និងឪកាសក្លាយជាកីឡាករសំខាន់សម្រាប់ក្លឹបនាពេលអនាគត។
ក្នុងការបង្ហាញខ្លួន ១៨ដងអោយក្លឹប West Ham គាត់បានស៊ុតបញ្ចូលទី ១គ្រាប់ និងបញ្ជូនបាល់អោយមិត្តរួមក្រុមបញ្ចប់ទីបានម្តង ប៉ុន្តែកីឡាករ Mubama មិនអាចមានអនាគតនៅក្លឹបញញួរធំនោះទេ។ ទោះបីជាយ៉ាងណាក៏ដោយ ទម្រង់លេងរបស់គាត់នៅកម្រិតយុវជនគឺគួរអោយចាប់អារម្មណ៍ជាង ខណៈដែលគាត់បានស៊ុតបញ្ចូលទីបាន ៤០គ្រាប់ក្នុងការបង្ហាញខ្លួន ៥៧ដង សម្រាប់ក្រុមអាយុក្រោម ១៨ឆ្នាំរបស់ក្លឹប West Ham និងបានស៊ុតបញ្ចូលទី ១៨គ្រាប់ ក្នុងការបង្ហាញខ្លួន ៣៤ដងអោយក្រុមអាយុក្រោម ២១ឆ្នាំ។
ជាមួយនឹងការចាកចេញរបស់ Julian Alvarez ទៅកាន់ក្លឹប Atletico Madrid បន្ទាប់ពីការខកចិត្តរបស់គាត់ក្នុងការលេងជាជម្រើសទី២ ពីក្រោយកីឡាករ Erling Haaland ដូច្នេះវានៅសល់ចន្លោះប្រហោងសម្រាប់កីឡាករ Mubama មកបំពេញបាន។ កំណត់ត្រាស៊ុតបញ្ចូលទីដ៏អស្ចារ្យរបស់គាត់នៅកម្រិតយុវជនបង្ហាញថាគាត់មានទេពកោសល្យ និងសក្តានុពលដើម្បីជោគជ័យក្នុងកម្រិតខ្ពស់បំផុត។ ទោះជាយ៉ាងណាក៏ដោយ គាត់ត្រូវតែសម្របខ្លួនទៅនឹងទម្រង់លេងរបស់ក្លឹប City ហើយប្រសិនបើគាត់អាចចាប់យកឱកាសនេះបាន កីឡាករ Mubama អាចក្លាយជាកីឡាករឆ្នើមម្នាក់ក្នុងជំនាន់របស់ខ្លួន៕
