បរទេស៖ នេះបើយោងតាមការចេញផ្សាយរបស់លោក Florian Plettenberg អ្នកសារព័ត៌មានរបស់ Sky Sports Germany បានអោយដឹងថាកីឡាករ Jobe Bellingham អាចដើរតាមគន្លងរបស់បងប្រុស Jude ដោយផ្ទេរទៅកាន់ក្លឹបនៅអាឡឺម៉ង់ក្នុងរដូវក្តៅនេះ ខណៈដែលគាត់ត្រូវបានគេរាយការណ៍ថាបានពិភាក្សាជាមួយក្រុម RB Leipzig របស់ Bundesliga។ ក្លឹប Leipzig បានប្រមូលព័ត៌មានទាំងអស់ទាក់ទងនឹងខ្សែបម្រើដែលមានកិច្ចព្រមព្រៀងជាមួយ Sunderland រហូតដល់ឆ្នាំ២០២៨។ បច្ចុប្បន្នក្រុមអាល្លឺម៉ង់បានចាត់ទុកកញ្ចប់ផ្ទេរកីឡាករ Bellingham ថាមានតម្លៃថ្លៃពេក ប៉ុន្តែពួកគេក៏បានកំណត់វាជាអាទិភាពក្នុងការនាំយកគាត់ទៅកាន់ Bundesliga នៅមុនរដូវកាល ២០២៥-២៦។
ក្រៅពីក្លឹប RB Leipzig ក្លឹបយក្សអាល្លឺម៉ង់ Borussia Dortmund ក៏ចាប់អារម្មណ៍ក្នុងការចុះហត្ថលេខាលើកីឡាកររូបនេះផងដែរ។ BVB ជឿជាក់ថាពួកគេនឹងអាចបញ្ចុះបញ្ចូលកីឡាករវ័យក្មេងឱ្យចូលរួមជាមួយក្លឹប ដែលបងប្រុសរបស់គាត់ឈ្មោះ Jude ធ្លាប់បានចំណាយពេលជាច្រើនឆ្នាំនៅទីនោះ មុនពេលផ្លាស់ទៅ Real Madrid នៅរដូវក្តៅឆ្នាំ២០២៣។
កីឡាករវ័យ ១៩ឆ្នាំបានចាប់អារម្មណ៍នៅភាគឦសាន ហើយមើលទៅនឹងផ្លាស់ទៅក្លឹបថ្មីនៅរដូវក្តៅ ប្រសិនបើក្លឹបឆ្មាខ្មៅ Sunderland ខកខានការឡើងមកកាន់ក្របខណ្ឌ Premier League។ ក្រុមយក្សរបស់អង់គ្លេសដូចជា Manchester United និង Chelsea ក៏ស្ថិតក្នុងចំណោមក្លឹបដែលចង់ចុះហត្ថលេខាយកខ្សែបម្រើរូបនេះដូចគ្នា។
សម្រាប់ពេលនេះ Bellingham នៅតែផ្តោតលើរដូវកាលបច្ចុប្បន្នរបស់គាត់ ហើយដែលអាចនឹងឃើញគាត់ក្នុងការប្រកួតថ្ងៃសៅរ៍ ជាមួយក្រុម Millwall ក្នុងការប្រកួត Championship៕
