បរទេស៖ នេះបើយោងតាមការចេញផ្សាយរបស់ Sky Sport Germany បានអោយដឹងថានាយកផ្នែកកីឡារបស់ Leipzig លោក Marcel Schafer បានផ្តួចផ្តើមការសន្ទនាជាមួយ Andrea Berta ដែលជាប្រធានផ្នែកកីឡារបស់ក្លឹប Arsenal ពាក់ព័ន្ធនឹងការផ្ទេរមួយ។ ជាមួយនឹង Leipzig ត្រូវការប្រាក់ចំណូលបន្ទាប់ពីមិនបានលេងនៅ Champions League នារដូវកាលក្រោយ ដូច្នេះក្រុម Bundesliga ត្រូវបានរំពឹងថានឹងបើកចំហរក្នុងការលក់តារាឆ្នើមរបស់ពួកគេ។
ខណៈពេលដែលកិច្ចសន្យារបស់កីឡាករ Sesko មានបញ្ចូលនៅលក្ខខណ្ឌផ្តាច់កុងត្រា តាមរបាយការណ៍បង្ហាញថាក្លឹបកំពុងមានបំណងចង់លក់គាត់ក្នុងតម្លៃលើស ៨០លានអឺរ៉ូ។ កិច្ចព្រមព្រៀងបច្ចុប្បន្នរបស់ខ្សែប្រយុទ្ធរូបនេះដំណើរការរហូតដល់ខែមិថុនា ឆ្នាំ២០២៩ ដោយធ្វើឱ្យក្លឹប Leipzig មានជំហររឹងមាំក្នុងការចរចា ប៉ុន្តែតម្រូវការសាច់ប្រាក់របស់ពួកគេអាចជំរុញឱ្យពួកលក់គាត់អោយបានលឿន។
កីឡាករ Sesko បង្ហាញខ្លួនបាន ៣២ដងក្នុង Bundesliga ដោយរកបាន ១៣គ្រាប់និងបញ្ជូនបាល់អោយរួមក្រុមបញ្ចប់ទីបាន ៥ដង។ ការរួមបញ្ចូលគ្នានៃល្បឿន សមត្ថភាពបាល់លើអាកាស និងជំនាញបច្ចេកទេសរបស់គាត់ ធ្វើឱ្យគាត់ក្លាយជាអនាគតខ្សែប្រយុទ្ធដ៏គួរឱ្យទាក់ទាញសម្រាប់ Arteta ខណៈដែលគាត់ចង់បញ្ចូលនៅកីឡាករដែលមានភាពស្វាហាប់បន្ថែមទៀតទៅក្នុងជួរមុខរបស់ Arsenal ។
ខណៈពេលដែល Sesko ហាក់ដូចជាអាទិភាពកំពូលរបស់ Arteta ក្រុម Arsenal នៅតែសកម្មទៅលើខ្សែប្រយុទ្ធផ្សេងទៀត ខណៈដែលពួកគេធ្វើការវាយតម្លៃសម្រាប់ខ្សែប្រយុទ្ធដែលមានសមត្ថភាព។ ក្លឹបនៅភាគខាងជើងទីក្រុងឡុងដ៏បន្តតាមដាន Viktor Gyokeres នៃ Sporting CP ខណៈដែលខ្សែប្រយុទ្ធស៊ុយអែតអាចផ្ទេរបានក្នុងតម្លៃ ៦០-៧០លានអឺរ៉ូ។
បន្ថែមពីលើនេះ ខ្សែប្រយុទ្ធ Dusan Vlahovic របស់ Juventus ក៏ស្ថិតក្នុងរ៉ាដារបស់ពួកគេផងដែរ។ ខ្សែប្រយុទ្ធសញ្ជាតិស៊ែប៊ីបានបង្ហាញពីបំណងចង់ផ្លាស់ចេញពីទីក្រុង Turin ហើយត្រូវបានគេរាយការណ៍ថានឹងចាប់យកឪកាសក្នុងការទៅចូលរួមជាមួយ Arsenal។ ទោះបីជាគាត់មានតម្លៃ ៥០លានអឺរ៉ូនៅក្នុងទីផ្សារក៏ដោយ ក៏កីឡាករវ័យ ២៥ឆ្នាំរូបនេះអាចទម្លាក់តម្លៃខ្លួនដោយសារតែកិច្ចសន្យារបស់គាត់នឹងផុតកំណត់នៅឆ្នាំ២០២៦ និងអាទិភាពផ្លាស់ប្តូររបស់ Juventus ។
មហិច្ឆតារបស់ Arsenal នៅតែមានកម្រិតខ្ពស់ ហើយការនាំយកខ្សែប្រយុទ្ធលំដាប់កំពូលគឺជាអាទិភាពមួយដើម្បីជួយក្លឹបប្រកួតប្រជែងដណ្តើមពានរង្វាន់ធំៗនៅរដូវកាលក្រោយ។ មិនថាវាជា Sesko, Gyokeres ឬ Vlahovic ទេ ក្រុមកាំភ្លើងធំកំពុងធ្វើការផ្លាស់ប្តូរដើម្បីធានាថាពួកគេមានអ្នកស៊ុតបញ្ចូលទីដ៏គួរឱ្យទុកចិត្តនៅចំបេះដូងនៃតំបន់ប្រយុទ្ធ បន្ទាប់ពីបានស៊ូទ្រាំនឹងយុទ្ធនាការដែលគ្មានពានរង្វាន់៕
