បរទេស៖ នេះបើយោងតាមការចេញផ្សាយរបស់ Footmercato បានអោយដឹងថាក្រុម Manchester United បានពន្លឿនកិច្ចពិភាក្សាក្នុងរយៈពេលពីរថ្ងៃចុងក្រោយនេះ ខណៈដែលពួកគេកំណត់គោលដៅចុះហត្ថលេខាលើខ្សែប្រយុទ្ធ Eintracht Frankfurt កីឡាករ Hugo Ekitike។ បិសាចក្រហមត្រូវបានគេរាយការណ៍ថាបានបង្កើនការពិភាក្សាជាមួយភ្នាក់ងាររបស់កីឡាកររូបនេះ ហើយបានធ្វើការទាក់ទងជាមួយក្លឹបទាក់ទងនឹងលក្ខខណ្ឌនៃកិច្ចព្រមព្រៀងសម្រាប់កីឡាករសញ្ជាតិបារាំង។
ខ្សែប្រយុទ្ធរូបនេះកំពុងក្លាយជាគោលដៅកំពូលក្នុងបញ្ជីចង់បានរបស់លោក Ruben Amorim ក្នុងទីផ្សារដោះដូរកីឡាកររដូវក្តៅនេះ បន្ទាប់ពីការតស៊ូយ៉ាងលំបាករបស់ Rasmus Hojlund និង Joshua Zirkzee នៅតំបន់ប្រយុទ្ធនាប៉ុន្មានខែចុងក្រោយនេះ។ ក្លឹប United ត្រូវតែឆ្លៀតពេលដើម្បីនាំយកកីឡាករដែលត្រឹមត្រូវ បើទោះបីជាត្រូវប្រឈមមុខនឹងការចំណាយលុយច្រើននៅក្នុងក្លឹបក៏ដោយ។
គោលដៅកីឡាករ Viktor Gyokeres ត្រូវបានរាយការណ៍ថាបានជូនដំណឹងដល់អតីតអ្នកចាត់ការ Amorim អំពីការសម្រេចចិត្តរបស់គាត់ក្នុងការមិនជួបជុំជាគ្រូបង្វឹករូបនេះម្តងទៀតនៅ Old Trafford ដោយ Arsenal ត្រូវបានគេជឿថានឹងស្ថិតនៅក្នុងជម្រើសដែលគាត់ចង់ចុះហត្ថលេខាជាមួយជាង។ កត្តានេះបានក្លាយជាសារៈសំខាន់បន្ថែមទៀតលើការផ្លាស់ប្តូរសម្រាប់ Ekitike ដែលត្រូវបានកោតសរសើរដោយគូប្រជែងនៅ Premier League និងនៅអឺរ៉ុបផងដែរ។
កីឡាករ Ekitike ធ្លាប់ជាអតីតកីឡាកររបស់ PSG ជាកន្លែងដែលគាត់បានចូលរួមជាលក្ខណៈខ្ចីជើងក្នុងឆ្នាំ២០២២ មុនពេលចាកចេញទៅស្នាក់នៅបណ្តោះអាសន្ននៅក្លឹប Frankfurt ត្រឹមតែពាក់កណ្តាលរដូវកាលប៉ុណ្ណោះបន្ទាប់ពីបានចុះហត្ថលេខាជាមួយ Parisians ជាអចិន្ត្រៃយ៍។ កីឡាករជម្រើសជាតិបារាំង U21 បានចូលរួមជាមួយ Frankfurt ជាអចិន្ត្រៃយ៍ក្នុងតម្លៃ ១៦.៥លានអឺរ៉ូ កាលពីរដូវក្តៅមុន ប៉ុន្តែបន្ទាប់ពីស៊ុតបាន ២២គ្រាប់ក្នុងការប្រកួតទាំងអស់ ក្លឹបអាល្លឺម៉ង់ត្រូវបានគេដឹងថាបានទាមទារ ១០០លានអឺរ៉ូសម្រាប់ការផ្ទេរកីឡាកររូបនេះ។
កីឡាករ Ekitike ទំនងនឹងផ្លាស់ប្តូរនៅរដូវក្តៅនេះ ហើយទំនងជារីករាយនឹងឱកាសលេងនៅ Premier League ប្រសិនបើការផ្លាស់ទៅអង់គ្លេសសម្រេចបាន។
ក្លឹប បិសាចក្រហមមិនប្រកួតប្រជែងក្នុង Club World Cup នៅរដូវក្តៅនេះទេ ដូច្នេះនឹងមានពេលវេលាគ្រប់គ្រាន់ដើម្បីធ្វើឱ្យប្រាកដថាពួកគេទទួលបានការផ្ទេរ។ បន្ទាប់ពីការបញ្ចប់ក្នុងចំណាត់ថ្នាក់លេខ១៥ ដ៏គួរឱ្យសោកសៅក្នុងក្របខ័ណ្ឌ Premier League និង Europa League វគ្គផ្តាច់ព្រ័ត្រចាញ់ក្រុម Tottenham Hotspur ធ្វើអោយលោក Amorim ដឹងថាការកែលម្អគឺត្រូវការជាចាំបាច់សម្រាប់យុទ្ធនាការបន្ទាប់ ប្រសិនបើគាត់ចង់ឃើញគម្រោងរៀបចំក្រុម United ឡើងវិញ៕
