បរទេស៖ កីឡាករ Dembele ត្រូវបានប្រគល់ពាន Golden Ball ដ៏មានកិត្យានុភាព បន្ទាប់ពីបានជួយក្រុម PSG បង្កើតប្រវត្តិសាស្ត្រក្នុងរដូវកាល ២០២៤-២៥។ ក្លឹបយក្សនៃក្របខ័ណ្ឌ Ligue 1 បានឈ្នះពានក្នុងស្រុកមួយទៀតកាលពីរដូវកាលមុន រួមជាមួយនឹងជោគជ័យនៅក្នុងពាន Coupe de France និងជ័យជម្នះក្នុងពាន Champions League ជាលើកដំបូង។
កីឡាករ Dembele បានស៊ុតបញ្ចូលទី ៣៥ គ្រាប់ និងបញ្ជូនបាល់ឱ្យមិត្តរួមក្រុមស៊ុតបាន ១៦ គ្រាប់ក្នុងយុទ្ធនាការដ៏គួរឱ្យចងចាំមួយ ខណៈដែលកីឡាករវ័យ ២៨ ឆ្នាំរូបនេះបានបង្ហាញខ្លួនថាពិតជាមានសមត្ថភាពខ្ពស់បន្ទាប់ពីចាកចេញពីក្រុម Barcelona ដែលគាត់បានលេងជាមួយ Messi និងបានត្រឡប់ទៅប្រទេសកំណើតរបស់គាត់វិញក្នុងឆ្នាំ ២០២៣។
ឥឡូវនេះគាត់គឺជាកីឡាករមួយរូបក្នុងចំណោមកីឡាករតែ ១០ រូបប៉ុណ្ណោះដែលបានបញ្ចប់ការឈ្នះពានរង្វាន់ធំៗចំនួនបី។ កីឡាករ Dembele បានឈ្នះពាន World Cup ជាមួយក្រុមជម្រើសជាតិបារាំងក្នុងឆ្នាំ ២០១៨, ពាន Champions League ក្នុងឆ្នាំ ២០២៥ ហើយឥឡូវនេះមានពាន Ballon d’Or នៅលើប្រវត្តិរូបដ៏អស្ចារ្យរបស់គាត់។
បុរសដំបូងគេដែលសម្រេចបានស្នាដៃនោះគឺរឿងព្រេងរបស់ក្រុម Manchester United និងជម្រើសជាតិអង់គ្លេស លោក Sir Bobby Charlton។ គាត់ត្រូវបានតាមពីក្រោយដោយកីឡាករឆ្នើមរបស់អាល្លឺម៉ង់ Gerd Muller និង Franz Beckenbauer។ ខ្សែប្រយុទ្ធអ៊ីតាលី Paolo Rossi គឺជាអ្នកបន្ទាប់ ខណៈដែលម្ចាស់ជ័យលាភី World Cup ឆ្នាំ ១៩៩៨ កីឡាករ Zidane បានបញ្ចប់ការឈ្នះពានបីរបស់គាត់ក្នុងឆ្នាំ ២០០២។
កីឡាករឆ្នើមរបស់ប្រេស៊ីល Rivaldo និង Ronaldinho ដែលបានបង្ហាញទម្រង់លេងយ៉ាងល្អសម្រាប់ក្រុម Barcelona ក្នុងអាជីពរបស់ពួកគេរៀងៗខ្លួន ក៏មាននៅក្នុងបញ្ជីនេះផងដែរ រួមជាមួយជនរួមជាតិ Kaka។ ម្ចាស់ពាន Ballon d’Or ៨ សម័យកាល កីឡាករ Messi បានឈ្នះពាន World Cup ជាមួយក្រុមជម្រើសជាតិអាហ្សង់ទីនក្នុងឆ្នាំ ២០២២។
ឥឡូវនេះ Dembele ស្ថិតក្នុងចំណោមកីឡាករអមតៈ ដោយគាត់ត្រូវតែបង្ហាញថាបទដ្ឋានបុគ្គលដ៏អស្ចារ្យរបស់គាត់អាចត្រូវបានរក្សា ហើយថាគាត់អាចបន្តប្រកួតប្រជែងជាមួយកីឡាករដូចជា Yamal, Kylian Mbappe និង Erling Haaland សម្រាប់ពាន Ballon d’Or នាពេលអនាគត។
