បរទេស៖ កីឡាករ Messi បានបង្កើតប្រវត្តិសាស្ត្រជាកីឡាករ Inter Miami ដំបូងគេដែលឈ្នះពានរង្វាន់ Golden Boot របស់លីគក្នុងរដូវកាលទីពីររបស់គាត់ ហើយជាកីឡាករសញ្ជាតិ អាហ្សង់ទីន ទីពីរដែលបានឈ្នះពាននេះ បន្ទាប់ពីកីឡាករ Valentín “Taty” Castellanos ដែលបានស៊ុតបញ្ចូលទី ១៩ គ្រាប់ សម្រាប់ក្រុម New York City FC កាលពីឆ្នាំ ២០២១។ ការរកបាន ២៩ គ្រាប់ របស់គាត់ក៏បានដាក់គាត់ក្នុងចំណោមយុទ្ធនាការស៊ុតបញ្ចូលទីដ៏ច្រើនបំផុតនៅក្នុងប្រវត្តិសាស្ត្រលីគផងដែរ។ មានតែកីឡាករ Josef Martínez (៣១ គ្រាប់ក្នុងឆ្នាំ ២០១៨) និង Carlos Vela (៣៤ គ្រាប់ក្នុងឆ្នាំ ២០១៩) ប៉ុណ្ណោះដែលធ្លាប់រកបានច្រើនជាងនេះក្នុងរដូវកាលឈ្នះពាន Golden Boot ចាប់តាំងពីឆ្នាំ ២០០៥។ មធ្យមភាគគ្រាប់បាល់ ១.០៣ គ្រាប់ក្នុងមួយប្រកួត របស់ Messi តាមពីក្រោយត្រឹមតែមធ្យមភាគ ១.១០ គ្រាប់ របស់ Vela ពីយុទ្ធនាការឆ្នាំ ២០១៩ នោះ ខណៈដែលគ្រាប់បាល់ ២៨ គ្រាប់ ដែលមិនមែនជាបាល់ពិន័យ (Non-penalty goals) របស់គាត់បានបង្កើតកំណត់ត្រាថ្មីមួយក្នុងក្របខ័ណ្ឌ MLS សម្រាប់រដូវកាលតែមួយ ដោយនាំមុខកំណត់ត្រាចាស់ ៣ គ្រាប់។
Messi បានស៊ុតបញ្ចូលទី Hat-trick លើកដំបូងរបស់គាត់ក្នុងរដូវកាលនេះនៅថ្ងៃប្រកួតចុងក្រោយ (Decision Day) ប៉ុន្តែគាត់បានបង្កើតកំណត់ត្រាថ្មីមួយក្នុងនាមជាកីឡាករដំបូងគេក្នុងប្រវត្តិសាស្ត្រលីគដែលរកបាន ១០ ប្រកួត ដែលរកបាន ច្រើនជាងមួយគ្រាប់ (multi-goal games)។ កីឡាករ Stern John (Columbus Crew, ១៩៩៨), Mamadou Diallo (Tampa Bay Mutiny, ២០០០), និង Zlatan Ibrahimović (LA Galaxy, ២០១៩) ពីមុនធ្លាប់ជាអ្នករក្សាកំណត់ត្រាស្មើគ្នាដោយរកបាន ៨ ប្រកួត។
គ្រាប់បាល់ ២៩ គ្រាប់ ក្នុងលីគរបស់ Messi ជាប់ចំណាត់ថ្នាក់ទី ១០ នៅក្នុងអាជីពដ៏អស្ចារ្យរបស់គាត់ ដោយរដូវកាលដែលគាត់រកបានគ្រាប់បាល់ច្រើនបំផុតគឺ ៥០ គ្រាប់ សម្រាប់ក្រុម Barcelona ក្នុងយុទ្ធនាការឆ្នាំ ២០១១-១២។
ការរួមចំណែកដល់គ្រាប់បាល់ ៤៨ គ្រាប់ (២៩ គ្រាប់ និង ១៩ Assists) របស់ Messi ក្នុងរដូវកាលនេះជាប់ចំណាត់ថ្នាក់លេខ ២ ក្នុងប្រវត្តិសាស្ត្រ MLS គឺតាមពីក្រោយតែរដូវកាលដ៏លេចធ្លោរបស់ Carlos Vela កាលពីឆ្នាំ ២០១៩ ប៉ុណ្ណោះ ដែលគាត់រកបាន ៣៤ គ្រាប់ និង ១៥ Assists។ គាត់ក៏ជាកីឡាករទីពីរដែលបាននាំមុខគេក្នុងលីគទាំងក្នុងការស៊ុតបញ្ចូលទី និងការបញ្ជូនបាល់ (Assists) បន្ទាប់ពីកីឡាករ Sebastian Giovinco រកបាន ២២ គ្រាប់ និង ១៥ Assists ក្នុងរដូវកាលឆ្នាំ ២០១៥។
ក្រុម Inter Miami នឹងចាប់ផ្តើមការប្រកួតវគ្គ “Best-of-three series” របស់ពួកគេទល់នឹងក្រុម Nashville SC នៅថ្ងៃ សុក្រ នេះ៕
