បរទេស៖ ខ្សែប្រយុទ្ធឆ្នើមរបស់ក្លឹបបិសាចក្រហមបានត្រលប់មកកាន់ Manchester Unite ក្រោយចាកចេញកាលពីឆ្នាំ២០០៦។ គាត់ គឺជាផ្នែកមួយនៃការរៀបចំរចនាសម្ព័ន្ធបុគ្គលិកគ្រូបង្វឹករបស់លោក Ten Hag បន្ទាប់ពីគាត់បានចុះកុងត្រាថ្មីដល់ឆ្នាំ ២០២៦។ Van Nistelrooy និងមិត្តរួមជាតិហូឡង់លោក Rene Hake បានចុះហត្ថលេខារយៈពេលពីរឆ្នាំជាមួយបិសាចក្រហម។
អ្នកចាត់ការទូទៅរបស់ United បាននិយាយថា៖ “ខ្ញុំរីករាយដែល Rene និង Ruud បានយល់ព្រមចូលរួមក្នុងគម្រោងរបស់យើង ដោយបន្ថែមនូវបទពិសោធន៍ ចំណេះដឹង និងថាមពលថ្មីដល់បុគ្គលិក។ ឥឡូវនេះគឺជាពេលវេលាដ៏ល្អមួយក្នុងការរៀបចំក្រុមគ្រូបង្វឹកថ្មី ខណៈពេលពួកយើងសម្លឹងរកការកសាងសមិទ្ធិផលក្នុងរយៈពេលពីរឆ្នាំកន្លងមក ហើយជំរុញឱ្យទៅកម្រិតបន្ទាប់”។
Van Nistelrooy បានទទួលជោគជ័យនៅក្លឹប PSV ប៉ុន្តែគាត់បានសម្រេចចិត្តចាកចេញពីក្លឹបកាលពីឆ្នាំមុន។ គាត់បានបដិសេធឱកាសក្នុងការក្លាយជាគ្រូបង្វឹករបស់ក្លឹប Burnley ដើម្បីអាចមកចូលរួមជាមួយក្រុមលោក Ten Hag ដែលបន្តដឹកនាំក្លឹប Manchester United ក្នុងនាមជាគ្រូបង្វឹក។ លោក Hake បានស្គាល់ Ten Hag អស់រយៈពេលជិត 2 ទស្សវត្សមកហើយ ដោយដំបូងពួកគេបានធ្វើការរួមគ្នានៅក្លឹប Twente ។ លោក Steve McLaren និង Darren Fletcher នឹងនៅតែជាផ្នែកមួយនៃបុគ្គលិករបស់លោក Ten Hag ទោះបីជាលោក Mitchell van der Gaag បានចាកចេញដើម្បីបន្តអាជីពជាគ្រូបង្វឹករបស់ខ្លួន ហើយលោក Benni McCarthy ក៏បានចាកចេញផងដែរ។
Van Nistelrooy នៅតែជាខ្សែប្រយុទ្ធដ៏ឆ្នើមម្នាក់របស់ក្លឹប Man Utd។ គាត់បានស៊ុតបញ្ចូលទីបាន ១៥០ គ្រាប់នៅក្នុងការប្រកួតទាំងអស់ចន្លោះឆ្នាំ ២០០១ ដល់ ២០០៦ ដោយបានឈ្នះ Premier League, FA Cup និង League Cup ។ ទោះបីជាយ៉ាងណាក៏ដោយ គាត់បានចាកចេញពីក្លឹប ដោយសារតែមិនស្ថិតនៅក្នុងជម្រើសរបស់ Sir Alex Ferguson បន្ទាប់ពីមានការខ្វែងគំនិតគ្នាជាមួយកីឡាករ Cristiano Ronaldo នៅលើទីលានហ្វឹកហាត់។
កីឡាកររបស់ United ដែលមិនបានចូលរួមការប្រកួត Euro ២០២៤ ឬ Copa America បានចាប់ផ្តើមហ្វឹកហាត់មុនបើករដូវកាល ហើយកំពុងត្រៀមលក្ខណៈសម្រាប់ការប្រកួតមិត្តភាពលើកដំបូងរបស់ពួកគេជាមួយក្លឹប Rosenborg នៅទីក្រុង Trondheim ប្រទេសន័រវេស នាថ្ងៃចន្ទ។ ក្លឹបបិសាចក្រហមនឹងត្រូវបើកទ្វាទទួលស្វាគមន៍ក្លឹប Fulham នៅថ្ងៃទី១៦ ខែសីហា សម្រាប់ការប្រកួតបើកឆាក Premier League៕
