បរទេស៖ ខ្សែបម្រើស្លាបសញ្ជាតិអង់គ្លេសត្រូវបានគេបញ្ជូនទៅកាន់ក្លឹប Borussia Dortmund ក្នុងលក្ខខណ្ឌខ្ចីជើង បន្ទាប់ពីគាត់មានបញ្ហាជាមួយនឹងលោក Erik ten Hag។ ក្លឹបនៅអាឡឺម៉ង់បានជួយគាត់អោយមានភាពរឹងមាំឡើងវិញ ខណៈដែលគាត់បានជួយក្រុម Dortmund អោយឡើងដល់វគ្គផ្តាច់ព្រ័ត្រ Champions League បន្ទាប់ពីប្រកួតយកឈ្នះក្រុម PSG នៅវគ្គពាក់កណ្តាលផ្តាច់ព្រ័ត្រ។ នៅពេលត្រឡប់ទៅកាន់ Carrington វិញ នៅចុងបញ្ចប់នៃការខ្ចីជើងរបស់គាត់ គាត់បានបង្ហាញភាពខុសគ្នាជាមួយនឹងលោក Ten Hag ហើយពេលនេះគាត់ត្រូវបានដាក់បញ្ចូលទៅក្នុងយុទ្ធនាការថ្មីរបស់ក្រុម។ ទោះបីជាយ៉ាងណាក៏ដោយ អ្វីៗគឺមិនល្អទេ ហើយ Sancho នៅតែអាចចាកចេញសម្រាប់ការប្រកួតប្រជែងថ្មី។
នេះបើយោងតាមការចេញផ្សាយរបស់ The Daily Mail បានឱ្យដឹងថាក្លឹប Dortmund ចាប់អារម្មណ៍ក្នុងការនាំយកគាត់ត្រឡប់មកវិញ ប៉ុន្តែពួកគេប្រឈមនឹងឧបសគ្គផ្នែកហិរញ្ញវត្ថុទាក់ទងនឹងប្រាក់ឈ្នួលរបស់គាត់ និងតម្លៃផ្ទេរ 40លានផោន ដែលទាមទារដោយ United ។ ក្លឹប Juventus ក៏នៅតែជាគោលដៅដ៏មានសក្ដានុពលមួយដែរ ប៉ុន្តែក្លឹប PSG ក៏បានបង្ហាញការចាប់អារម្មណ៍របស់ខ្លួនសម្រាប់កីឡាករ Sancho។ ក្លឹប Liverpool ធ្លាប់ចាប់អារម្មណ៍គាត់មុនពេលគាត់ផ្ទេរមកកាន់ Old Trafford។
របាយការណ៍បាននិយាយបន្ថែមទៀតថា លទ្ធភាពនៃការចូលរួមជាមួយក្លឹប Liverpool បានធ្វើឱ្យកីឡាករ Sancho ចាប់អារម្មណ៍នៅពេលនោះ ចំណែកឯខាងក្លឹប PSG នៅតែស្ថិតនៅក្បែរខាងដដែរ។ ក្លឹប Bayern Munich ក៏បានធ្វើការសាកសួរផងដែរ ប៉ុន្តែក្លឹបចាប់អារម្មណ៍ចង់ដាក់គាត់លេងក្នុងតំណែងជាខ្សែការពារស្លាប់ឆ្វេង ដែលវាមិនសមទៅនឹងតំណែងរបស់ Sancho នាពេលបច្ចុប្បន្ន។
ក្លឹប United ហាក់ដូចជាបើកចំហរក្នុងការផ្ទេរ Sancho នៅរដូវក្តៅនេះ ប្រសិនបើពួកគេទទួលបានការផ្តល់ជូនជិតដល់តម្លៃ ៤០ លានផោន។ ទោះជាយ៉ាងណាក៏ដោយគាត់បានហោះហើរទៅកាន់សហរដ្ឋអាមេរិកសម្រាប់ការប្រកួត Pre-Season ហើយនឹងសង្ឃឹមថាគាត់នឹងធ្វើឱ្យមានការចាប់អារម្មណ៍ នៅពេលដែលប្រកួតជាមួយក្រុម Arsenal នៅថ្ងៃសៅរ៍នេះ៕
