បរទេស៖ នេះបើយោងតាមការចេញផ្សាយរបស់ TBR Football បានអោយដឹងថាក្លឹប Arsenal បានបញ្ចុះបញ្ចូលកីឡាករប៉ូឡូញ Jakob Kiwior ដោយជោគជ័យឱ្យគាត់បន្តស្នាក់នៅក្លឹបរហូតដល់ខែមករា បើទោះបីជាមានការចាប់អារម្មណ៍ពីក្លឹបអឺរ៉ុបមួយចំនួនក៏ដោយ។ ក្រុមកាំភ្លើងធំបានធានាខ្សែការពារវ័យ ២៣ ឆ្នាំថាប្រសិនបើគាត់ចង់ចាកចេញក្នុងទីផ្សារដោះដូរកីឡាកររដូវរងា ខាងក្លឹបនឹងអនុញ្ញាតឱ្យគាត់ស្វែងរកឱកាសផ្សេងទៀត។
កីឡាករ Kiwior បាននឹងកំពុងពិចារណាក្នុងការវិលត្រលប់ទៅកាន់ Serie A វិញនៅរដូវក្តៅនេះ ដោយក្លឹបយក្សអ៊ីតាលីជាច្រើនរួមមាន AC Milan, Inter Milan, Juventus, Roma និង Bologna បង្ហាញចំណាប់អារម្មណ៍ក្នុងការផ្ទេរយកគាត់។ បន្ថែមពីលើក្រុមអ៊ីតាលី ក៏មានក្លឹប Chelsea ត្រូវបានគេរាយការណ៍ថាចង់បានកីឡាករ Kiwior ផងដែរ។ ហើយក្លឹប Aston Villa និង Brighton នៅ Premier League ក៏កំពុងតាមដានស្ថានភាពរបស់កីឡាករផងដែរ៕
