បរទេស៖ អតីតកីឡាករជម្រើសជាតិអ៊ីតាលី Mario Balotelli បានបង្ហើបថាបច្ចុប្បន្នគាត់កំពុងថ្លឹងថ្លែងការផ្តល់ជូនជាច្រើនពីក្លឹប ខណៈដែលគាត់ស្វែងរកការផ្លាស់ប្តូរបន្ទាប់សម្រាប់អាជីពបាល់ទាត់។ ខ្សែប្រយុទ្ធវ័យ ៣៤ឆ្នាំរូបនេះមិនទាន់មានក្លឹបលេងក្រោយចាកចេញពីក្លឹបទូរគី Adana Demispor នៅរដូវក្តៅ ក្រោយគាត់បានធ្វើការស៊ុតបញ្ចូលទី ៧គ្រាប់ក្នុងការបង្ហាញខ្លួន ១៦ប្រកួតក្នុងលីកក្នុងរដូវកាលមុន។
ថ្មីៗនេះគាត់មានព័ត៌មានចចាមអារ៉ាមក្នុងការផ្ទេរទៅកាន់ក្លឹប Corinthians នៅប្រទេសប្រេស៊ីល ហើយកីឡាករ Balotelli បានបង្ហោះនៅក្នុងបណ្តាញសង្គម Instagram ដើម្បីដោះស្រាយពាក្យចចាមអារ៉ាមដែលកំពុងបន្តនិងការរំពឹងទុកជុំវិញអនាគតរបស់គាត់។
កីឡាករ Balotelli បានបង្ហោះនៅលើ Instagram ថា៖ “ខ្ញុំបានកត់សម្គាល់ឃើញថា នាពេលថ្មីៗនេះ មានរឿងជាច្រើនដែលទាក់ទងអំពីខ្ញុំ។ រឿងតែមួយគត់ដែលខ្ញុំធ្វើគឺប្រឹងប្រែង ហ្វឹកហាត់ និងត្រៀមខ្លួនសម្រាប់កន្លែងណាដែលខ្ញុំទៅលេង។ ឆាប់ៗនេះខ្ញុំនឹងនិយាយ និងបំភ្លឺរឿងនេះ”។
“អ្វីដែលសំខាន់សម្រាប់ខ្ញុំ គឺការហ្វឹកហាត់ និងការរក្សាភាពស្ងប់ស្ងាត់។ ខ្ញុំបានទទួលសំណើជាច្រើន ហើយខ្ញុំកំពុងស្វែងរកគម្រោងដ៏ល្អបំផុតសម្រាប់ខ្ញុំ។ កាសែត ក្រុមមនុស្ស បន្តបង្កើតពាក្យចចមាអារ៉ាម… ម្តងហើយម្តងទៀត”៕
