បរទេស៖ នេះបើយោងតាមការបញ្ជាក់របស់នាយកកីឡាលោក Cristiano Giuntoli បានអោយដឹងថាអ្នកចាត់ការក្លឹប Juventus លោក Thiago Motta បន្តទទួលបានការគាំទ្រយ៉ាងពេញទំហឹងពីក្លឹប ទោះបីជាមានការខកចិត្តនាពេលថ្មីៗនេះនៅក្នុងការប្រកួតក្នុងស្រុក និងអឺរ៉ុបក៏ដោយ។
ក្លឹប Juventus បានរងការខកចិត្តក្នុងការប្រកួត Coppa Italia ក្រោមដៃ Empoli ដោយការស៊ុតបាល់ ១១ម៉ែត្រ។ កាលពីដើមខែនេះ ពួកគេក៏ត្រូវបាន PSV Eindhoven ទម្លាក់ចេញពី Champions League ផងដែរ។
លោក Giuntoli បានប្រាប់ Sky Sport Italy ថា៖ “យើងជឿជាក់លើគម្រោងដែលបានចាប់ផ្តើមនៅរដូវក្តៅនេះ ជាគម្រោងមួយដែលបង្កើតតម្លៃដោយផ្តល់ឱកាសដល់កីឡាករវ័យក្មេងជាច្រើន ហើយយើងមានទំនុកចិត្តថាវានឹងនាំមកនូវការពេញចិត្តយ៉ាងខ្លាំងដល់យើងនាពេលអនាគត។ លោក Motta មិនស្ថិតក្រោមការពិភាក្សាទេ”។
លោកបានបន្តទៀតថា៖ “ការប្រកួតកាលពីម្សិលមិញគឺស្ទើរតែមិនអាចពន្យល់បានដោយសារយើងបានឈ្នះពាននេះ ៤ដងជាប់គ្នា ដូច្នេះយើងមានការខកចិត្តនិងអាក់អន់ចិត្ត”។
លោកបានបន្តថា៖ “យ៉ាងណាក៏ដោយ យើងនៅតែជឿជាក់ថាគម្រោងនេះកំពុងដើរលើផ្លូវត្រូវ។ ការរងរបួសជាច្រើនបានបង្កការលំបាក ប៉ុន្តែយើងដឹងថាយើងកំពុងដើរលើផ្លូវត្រូវ ហើយជឿថាវានឹងនាំមកនូវជោគជ័យនាពេលអនាគត”៕
