បរទេស៖ នេះបើយោងតាមការចេញផ្សាយរបស់អ្នកយកព័ត៌មាន Diario AS លោក Eduardo Burgos បានអោយដឹងថាកីឡាករ Fernandez បានបដិសេធការផ្លាស់ប្តូរទៅ Atletico Madrid រួចហើយ។ មិត្តរួមក្រុមអាហ្សង់ទីនជាច្រើននាក់បានព្យាយាមបញ្ចុះបញ្ចូលគាត់ឱ្យចូលរួមជាមួយក្រុមរបស់លោក Diego Simeone អំឡុងពេលសម្រាកអន្តរជាតិ ប៉ុន្តែមិនទាន់បានល្បួងគាត់ឱ្យចាកចេញពីកីឡដ្ឋាន Stamford Bridge នៅឡើយ។ កីឡាករ Fernandez ត្រូវបានបញ្ជាក់ថាគាត់ចូលចិត្តនៅទីក្រុងឡុងដ៏ ហើយគាត់ក៏នៅតែបើកចំហរចំពោះជម្រើសផ្សេងទៀតដូចគ្នា។
កីឡាករ Fernandez គឺជាផ្នែកមួយនៃក្រុមជម្រើសជាតិអាហ្សង់ទីន ក្នុងការប្រកួតយកឈ្នះលើក្រុមអ៊ុយរូហ្គាយ និងប្រេស៊ីលអំឡុងពេលសម្រាកអន្តរជាតិ។ កីឡាកររបស់ Chelsea រូបនេះស្ថិតក្នុងក្រុមជាមួយតារាឆ្នើមរបស់ក្លឹប Atletico Madrid ដូចជា Rodrigo de Paul, Nahuel Molina Julian Alvarez, Angel Correa និង Giuliano Simeone ដោយត្រូវបានបញ្ជាក់ថាពួកគេបានបញ្ចុះបញ្ចូល Fernandez ផ្ទេរមកកាន់ក្លឹបនៅប្រទេសអេស្ប៉ាញ។
ក្លឹប Real Madrid ក៏ត្រូវបានគេជឿថាចង់បានកីឡាករ Fernandez ប៉ុន្តែ Chelsea មិនចង់ឱ្យសមាជិកក្រុមឈ្នះ World Cup រូបនេះចាកចេញនោះទេ។ កីឡាករ Fernandez កំពុងរីករាយនឹងរដូវកាលដ៏ល្អបំផុតរបស់គាត់សម្រាប់ Chelsea ហើយកុងត្រារបស់គាត់ជាមួយក្លឹបមានសុពលភាពដល់ឆ្នាំ២០៣២ នៅពេលដែលគាត់មានអាយុ ៣១ឆ្នាំ។
ក្លឹប Chelsea និងកីឡាករ Fernandez នឹងត្រលប់មកវិញបន្ទាប់ពីសម្រាកអន្តរជាតិ ដោយត្រូវប្រកួតជាមួយក្រុម Tottenham នៅថ្ងៃទី៣ ខែមេសា៕
