បរទេស៖ បន្ទាប់ពីបានដើរតួនាទីយ៉ាងសំខាន់ក្នុងភាពជោគជ័យរបស់ PSG ទាំងនៅលីគ Ligue 1 និង Champions League កាលពីរដូវកាលមុន ក្លិបបានបដិសេធចំណាប់អារម្មណ៍ពីក្លិប Bayern Munich, Arsenal និង Chelsea នៅរដូវក្តៅនេះ ដើម្បីធានាថាគាត់នៅតែជាផ្នែកដ៏សំខាន់នៃគម្រោងរបស់លោក Luis Enrique នៅក្នុងរដ្ឋធានីរបស់បារាំង។ ក្លិបយក្សបារាំងមិនចង់ឱ្យក្លិបផ្សេងៗដាក់សំណើទិញយកកីឡាកររូបនោះទេ ហេតុដូច្នេះហើយពួកគេបានចាប់ផ្តើមចរចាជាមួយភ្នាក់ងាររបស់កីឡាករ ដោយសង្ឃឹមថានឹងឈានដល់កិច្ចព្រមព្រៀងក្នុងប៉ុន្មានខែខាងមុខនេះ។ PSG មានគោលបំណងចងជើងកីឡាកររូបនេះជាមួយនឹងកិច្ចសន្យាដែលនឹងបន្តរហូតដល់ឆ្នាំ ២០៣០។
កីឡាករវ័យ ២៣ ឆ្នាំរូបនេះបានលេង ៣៤ ប្រកួតនៅលីគ Ligue 1 ក្នុងរដូវកាល ២០២៤-២៥ ដោយស៊ុតបាន ១៤ គ្រាប់ និងបញ្ជូនបាល់ឱ្យមិត្តរួមក្រុមស៊ុតបាន ១១ គ្រាប់។ ទោះបីជាមានទម្រង់លេងខ្លាំងក៏ដោយ ពេលខ្លះគាត់ត្រូវបានប្ដូរឱ្យអង្គុយកៅអីបម្រុងក្នុងការប្រកួតសំខាន់ៗ ដោយសារកីឡាករជម្រើសដំបូងដូចជា Ousmane Dembele និង Desire Doue ត្រូវបានគេពេញចិត្តជាង។ រដូវកាលនេះ Barcola បានក្លាយជាកីឡាករជម្រើសដំបូងក្នុងការប្រកួតទាំង ៤ របស់ PSG ហើយដោយសារតែ Ousmane Dembele និង Desire Doue រងរបួស គាត់នឹងកាន់តែមានសារៈសំខាន់ក្នុងប៉ុន្មានសប្តាហ៍ខាងមុខទៀត។
ក្លិប PSG បានថ្កោលទោសសហព័ន្ធបាល់ទាត់បារាំង បន្ទាប់ពីកីឡាករ Dembele និង Doue រងរបួសពេលបំពេញភារកិច្ចជម្រើសជាតិ។ កីឡាករទាំងពីរនាក់ត្រូវបានដកចេញពីការប្រកួតដោយសាររបួសសាច់ដុំធ្ងន់ធ្ងរ មុនការប្រកួតសំខាន់ៗរបស់ក្លិប។ ក្លិបបានសម្តែងការខកចិត្តចំពោះអ្វីដែលពួកគេបានចាត់ទុកថាជា «ការខ្វះការពិគ្រោះយោបល់ទាំងស្រុង» ពីសហព័ន្ធទាក់ទងនឹងសម្បទារបស់កីឡាករ និងកាលវិភាគនៃការប្រកួត ដោយចោទប្រកាន់ពួកគេថាបានធ្វើឱ្យប៉ះពាល់ដល់យុទ្ធនាការ Champions League និង Ligue 1 របស់ PSG។
ឥឡូវនេះតំបន់ប្រយុទ្ធរបស់ PSG នៅសល់តែកីឡាករវាយប្រហារសំខាន់ៗបីរូបប៉ុណ្ណោះ គឺ Goncalo Ramos, Khvicha Kvaratskhelia និង Barcola។ កីឡាករ Barcola សង្ឃឹមថានឹងធ្វើបានល្អពេលដែលមិត្តរួមក្រុមអវត្តមាន ដើម្បីបង្កើនឱកាសក្នុងការជាប់ជម្រើស ១១ នាក់ដំបូងសម្រាប់ព្រឹត្តិការណ៍ World Cup នៅឆ្នាំក្រោយ៕
