បរទេស៖ ភាពតានតឹងបានផ្ទុះឡើងនៅពេលដែលកីឡាករ Mac Allister បានប៉ះទង្គិចជាមួយកីឡាករ Hincapie បន្ទាប់ពីការបង្កកំហុសទៅលើកីឡាករ Franco Mastantuono។ ខ្សែបម្រើរបស់ក្លិប Liverpool បានរុញខ្សែការពារសញ្ជាតិអេក្វាឌ័ររូបនេះ ហើយអ្នកទាំងពីរបាននិយាយប៉ះទង្គិចគ្នា មុនពេលត្រូវបានមិត្តរួមក្រុមបំបែក។ ទោះជាយ៉ាងណាក៏ដោយ កីឡាករ Hincapie ជាអ្នកឈ្នះចុងក្រោយនៅក្នុងទីលាន ដោយសារក្រុមអេក្វាឌ័រទទួលបានជ័យជម្នះលើក្រុមអាហ្សង់ទីន។
ក្រោយមក កីឡាករ Mac Allister បានឆ្លើយតបទៅកាន់ Hincapie នៅលើបណ្តាញសង្គម Instagram ដោយបានបង្ហោះរូបភាពដែលគាត់កំពុងរុញកីឡាកររបស់ Arsenal រូបនេះ ជាមួយនឹងចំណងជើងថា៖ «អ្នកមិនដូចនោះទេ!»។
ជម្លោះនេះបានបន្ថែមភាពចាប់អារម្មណ៍ទៅលើអ្វីដែលអាចក្លាយជាការប្រកួតប្រជែងថ្មីដ៏គួរឱ្យចាប់អារម្មណ៍បំផុតមួយរបស់លីគ Premier League។ កីឡាករ Hincapie បានចូលរួមជាមួយក្លិប Arsenal ពីក្លិប Bayer Leverkusen ក្នុងកិច្ចព្រមព្រៀងតម្លៃ ៤៥ លានផោន ខណៈដែលកីឡាករ Mac Allister គឺជាតួរអង្គដ៏សំខាន់សម្រាប់ក្លិប Liverpool ចាប់តាំងពីការមកដល់របស់គាត់។ ដោយសារកីឡាករទាំងពីរគឺជាកីឡាករស្នូលក្នុងការប្រយុទ្ធគ្នានៅតំបន់បម្រើសម្រាប់ក្លិបរបស់ពួកគេ ការប៉ះទង្គិចគ្នាយ៉ាងក្តៅគគុកនៅកម្រិតអន្តរជាតិនេះអាចនឹងបន្តដល់ប្រទេសអង់គ្លេសនៅក្នុងការប្រណាំងដណ្តើមពានរង្វាន់លីគ។
កីឡាករទាំងពីរនឹងមិនអាចប្រឈមមុខគ្នានៅក្នុងលីគ Premier League បានទេរហូតដល់ខែមករា នៅពេលដែលក្លិប Arsenal ធ្វើជាម្ចាស់ផ្ទះទទួលក្លិប Liverpool នៅកីឡដ្ឋាន Emirates។ ទន្ទឹមនឹងនេះ កីឡាករ Mac Allister នឹងត្រលប់មកលេងឱ្យ Liverpool វិញទល់នឹងក្លិប Burnley នៅថ្ងៃអាទិត្យ ខណៈដែលក្លិប Arsenal ត្រូវប្រកួតទល់នឹងក្លិប Nottingham Forest នៅថ្ងៃសៅរ៍៕
