បរទេស៖ កីឡាករ Bellingham ត្រូវបានគេរំពឹងថានឹងអវត្តមានរហូតដល់ចុងខែតុលា បន្ទាប់ពីគាត់បានវះកាត់ស្មារបស់គាត់កាលពីខែសីហា។ ទោះជាយ៉ាងណាក៏ដោយ ខ្សែបម្រើរូបនេះបានវិលត្រឡប់មកប្រកួតវិញមុនកាលកំណត់ ហើយបានលេងឱ្យក្លិបក្នុងការប្រកួត La Liga ពីរលើកចុងក្រោយរបស់ពួកគេទល់នឹងក្រុម Espanyol និង Atletico Madrid។ ប៉ុន្តែនៅពេលដែលលោក Tuchel បានប្រកាសក្រុមជម្រើសជាតិអង់គ្លេសចុងក្រោយកាលពីថ្ងៃសុក្រ ឈ្មោះរបស់ Bellingham ត្រូវបានបាត់បង់ ជាមួយគ្នានោះក៏មានឈ្មោះកីឡាករ Jack Grealish ដែរ ដែលបានវិលត្រឡប់ទៅរកទម្រង់លេងល្អវិញចាប់តាំងពីផ្លាស់ទៅក្រុម Everton ក្នុងលក្ខខណ្ឌខ្ចីជើងពីក្រុម Manchester City។ ចំណែកឯតារាឆ្នើមរបស់ក្រុម Arsenal កីឡាករ Bukayo Saka វិញ បានវិលត្រឡប់ទៅក្នុងបញ្ជីឈ្មោះក្រុម Three Lions វិញ។
ឥឡូវនេះ កាសែត Marca រាយការណ៍ថា គឺកីឡាករ Bellingham ផ្ទាល់ដែលបានស្នើសុំលោក Tuchel ឱ្យដកគាត់ចេញពីក្រុម សម្រាប់ការប្រកួតជម្រុះទល់នឹងក្រុម Wales និង Latvia នៅចុងខែនេះ។ របាយការណ៍បានបន្ថែមថា ខណៈពេលដែល Bellingham បានលេងទល់នឹង Atletico និងបានលេងក្នុងការប្រកួត Madrid Derby កាលពីចុងសប្តាហ៍មុន គាត់មានអារម្មណ៍ឈឺចាប់ខ្លះៗ ហើយដឹងថាគាត់មិនទាន់ត្រៀមខ្លួនរួចរាល់ ១០០% សម្រាប់ការប្រកួតនោះទេ។ ជាលទ្ធផល គាត់បានស្នើសុំលោក Tuchel កុំឱ្យដាក់គាត់នៅក្នុងក្រុមសម្រាប់ហ្គេមខែតុលា។
កាសែត Marca ក៏បានអះអាងផងដែរថា Bellingham នឹងធ្វើការស្តារឡើងវិញនៅទីក្រុង Madrid ក្នុងអំឡុងពេលសម្រាកអន្តរជាតិ ហើយនឹងធ្វើ “ការហ្វឹកហាត់ Pre-Season ខ្នាតតូច” ក្រោមការដឹកនាំរបស់លោក Xabi Alonso អំឡុងពេលពីរសប្តាហ៍នោះ។ ជំរំក្រុមជម្រើសជាតិអង់គ្លេសយល់ពីស្ថានភាពរបស់ Bellingham ហើយបានផ្តល់ភ្លើងខៀវឱ្យគាត់ស្នាក់នៅជាមួយក្រុម Los Blancos ដោយសារពួកគេមានអារម្មណ៍ថា ការបង្ខំកីឡាករអាចនឹង “ផ្តល់ផលអវិជ្ជមាន”។
ក្រុមរបស់លោក Tuchel នឹងលេងមិត្តភាពទល់នឹងប្រទេសជិតខាង Wales នៅថ្ងៃទី ៩ ខែតុលា ដែលការប្រកួតនោះនឹងធ្វើឡើងនៅកីឡដ្ឋាន Wembley Stadium។ ក្រុមទាំងពីរបានជួបគ្នាចុងក្រោយនៅ World Cup ឆ្នាំ ២០២២ ហើយក្រុមអង់គ្លេសទទួលបានជ័យជម្នះក្នុងការប្រកួត ៧ លើក ចុងក្រោយរវាងគូប្រជែងចាស់ទាំងពីរនេះ — ដោយក្រុម Wales ទទួលបានជ័យជម្នះចុងក្រោយកាលពីឆ្នាំ ១៩៨៤។ បន្ទាប់មក ក្រុមអង់គ្លេសនឹងធ្វើដំណើរទៅកាន់ប្រទេស Latvia សម្រាប់ការប្រកួតជម្រុះ World Cup ចុងក្រោយរបស់ពួកគេនៅថ្ងៃទី ១៤ ខែតុលា៕
