ព្រះសីហនុ៖ ឯកឧត្តម តាក វណ្ណា តំណាងរាស្ត្រមណ្ឌលខេត្តព្រះសីហនុ និងលោក ម៉ាង ស៊ីណេត អភិបាលរងខេត្តព្រះសីហនុ បានអញ្ជើញបិទការប្រកួតកីឡាវាយសីជ្រើសរើសជើងឯក ធីអ័រ ហូប ឆ្នាំ២០២៤ TR Hope Badminton Championship 2024 កាលពីរសៀលថ្ងៃអាទិត្យ ទី០២ ខែមិថុនា ឆ្នាំ២០២៤ នៅក្លឹប TR Hope មានទីតាំងស្ថិតនៅភូមិ៣ សង្កាត់ លេខ១ ក្រុងព្រះសីហនុ។
លោក ថោង វីរ៉ូ ប្រធានក្លឹបកីឡា TR Hope Badminton Champoinship 2024 បានធ្វើរបាយការណ៍សង្ខេបអំពីការប្រកួតកីឡាវាយសីប្រចាំឆ្នាំ២០២៤ មានរយៈពេលពីរថ្ងៃ គឺចាប់ផ្តើមពីថ្ងៃទី០១ ដល់ថ្ងៃទី០២ ខែមិថុនា ឆ្នាំ២០២៤ និងមានកីឡាករ កីឡាការិនីមកពីបណ្តាក្លឹបវាយសីចំនួន១៦ មានដូចជា ក្លឹបកីឡាវាយសីរបស់ព្រះរាជាណាចក្រកម្ពុជាចំនួន១២ក្លឹប ក្លឹបកីឡាវាយសីមកពីប្រទេសថៃចំនួន១ក្លឹប មកពីស្ថានទូតឥណ្ឌូនេស៊ីចំនួន១ក្លឹប និងក្លឹបរបស់ខេត្តព្រះសីហនុ២ក្លឹប ដែលមានកីឡាករ កីឡាការិនីចូលរួមប្រកួតចំនួន ១៥០នាក់ ដោយប្រកួតលើវិញ្ញាសារចំនួន៨ មានដូចជា ១. វិញ្ញាសារវាយ គូរបុរសកម្រិតខ្ពស់ LEVELA ២. វិញ្ញាសារវាយគូបុរសកម្រិតមធ្យម LEVELB ៣. វិញ្ញាសារវាយគូបុរសអាយុ ៥០ឆ្នាំឡើង ៤.វិញ្ញាសារវាយគូនារី ៥. វិញ្ញាសាវាយគូចម្រុះបុរស នារី ៦. វិញ្ញាសារវាយទោលកុមាអាយុ ១៣ឆ្នាំ ៧. វិញ្ញាសាវាយទោលកុមារក្រោម ១៨ឆ្នាំ និង៨. វិញ្ញាសារវាយទោលកុមារក្រោម ៩ឆ្នាំ។
ការប្រកួតកីឡានេះមានគោលបំណងអភិវឌ្ឍវិស័យកីឡាវាយសីក្នុងប្រទេសកម្ពុជាឱ្យក្លាយជាកីឡាកម្រិតខ្ពស់ដូចប្រទេសអភិវឌ្ឍន៍ជឿនលឿនក្នុងវិស័យកីឡាវាយសី បង្កើនគុណផលរបស់កីឡាករ កីឡាការិនី បង្កើតមិត្តភាពរវាងក្រុមកីឡាវាយសីក្នុងប្រទេស ក៏ដូចជាកីឡាករអន្តរជាតិ បណ្តុះបណ្តាលកុមារចាប់ពីអាយុ ៩ឆ្នាំ និងផ្តល់ឱកាសបង្ហាញពីសមត្ថភាពរបស់យុវជនកម្ពុជា ព្រោះកីឡារស់ក្នុងសន្តិភាព។
ជាមួយគ្នានេះដែរ លោក ម៉ាង ស៊ីណេត អភិបាលរងខេត្តព្រះសីហនុ បានអញ្ជើញបិទ និងបំពាក់មេដាយ ជ័យលាភីជូនដល់កីឡាករ កីឡាការិនី ក្នុងការប្រកួតកីឡាវាយសី ជ្រើសរើសជើងឯកអន្តរជាតិ TR Hope ឆ្នាំ២០២៤ (TR Hope Badminton Championship 2024) ព្រមទាំងបានស្វាគមន៍ និងថ្លែងអំណរគុណចំពោះវត្តមានប្រតិភូកីឡាមកពីប្រទេសថៃ និងមកពីក្លឹបនានាក្នុងព្រះរាជាណាចក្រកម្ពុជា ក្នុងការប្រកួតនោះ។ បច្ចុប្បន្នវិស័យកីឡានៅកម្ពុជា បានដើរតួនាទីយ៉ាងសំខាន់ក្នុងសង្គម ខណៈវិស័យកីឡានេះមានការរីកចម្រើនយ៉ាងខ្លាំងគួរឱ្យកត់សម្គាល់ ក្នុងនោះក៏មានប្រភេទកីឡាវាយសីផងដែរ និងត្រូវបានយកចិត្តទុកដាក់ពីសំណាក់ប្រមុខថ្នាក់ដឹកនាំរាជរដ្ឋាភិបាលកម្ពុជា។
លោកអភិបាលរង បានគូសបញ្ជាក់ថា កីឡាវាយសី ជាកីឡាមួយប្រភេទដែលបានផ្តល់អត្ថប្រយោជន៍យ៉ាងសំខាន់ដល់សុខភាពមនុស្ស ជាពិសេសយុវជនរបស់យើងមានដូចជា ១. ភាពស្អាតសមសួន នៃរាងកាយ តាមរយៈសកម្មភាពជាច្រើនដូចជា ដើរ ហក់ លោត ដើម្បីវាយគ្រាប់សី។ សកម្មភាពនេះជួយដុតបំផ្លាញជាតិខ្លាញ់ធាត់បានយ៉ាងប្រសើរ ។ ២. ធ្វើឱ្យសាច់ដុំរឹងមាំ៖ ការលេងកីឡាវាយសីរៀងរាល់ថ្ងៃ នឹងពង្រឹងសាច់ដុំឱ្យរឹងមាំ ការបញ្ចេញសកម្មភាពច្រើនធ្វើឱ្យគ្រប់កន្លែង នៃរាងកាយធ្វើចលនាបានល្អ។ ៣. បង្កើនភាពរហ័សរហួន នៃការដើរចុះឡើងដោយផ្តោតលើទីតាំងគ្រាប់សី និងការវាយ តបតទៅដៃគូ ជំរុញឱ្យរាងកាយធ្វើចលនាបញ្ចេញសកម្មភាពច្រើនមានភាពរហ័សរហួន និងស្មារតីវាងវៃ ។ ៤. កាត់បន្ថយហានិភ័យពីជំងឺប្រចាំកាយមួយចំនួនដូចជា សម្ពាធ ឈាមខ្ពស់ ជំងឺទឹកនោមផ្អែម ជំងឺបេះដូងជាដើម។ កីឡាប្រភេទនេះជួយឱ្យសុខភាពបានប្រសើរ និងកាត់បន្ថយការទៅជួបពេទ្យ។ ៥. បង្កើនភាពរីករាយ បន្ធូរអារម្មណ៍តានតឹងបានយ៉ាងល្អប្រសើរ មិនត្រឹមតែមានប្រយោជន៍ល្អសម្រាប់រាងកាយប៉ុណ្ណោះទេ កីឡាវាយសីជួយបន្ធូរអារម្មណ៍តានតឹងបានយ៉ាងល្អជួយធ្វើឱ្យខួរក្បាលរបស់យើងមានអារម្មណ៍ប្រសើរឡើងវិញ។
ទន្ទឹមនឹងនេះ លោកអភិបាលរងខេត្ត បានកោតសរសើរ និងថ្លែងអំណរគុណចំពោះគណៈកម្មការរៀបចំការប្រកួត និងគណៈប្រតិភូកីឡា ជាពិសេសក្លឹបកីឡា TR Hope Badminton and GYM Training Club ខេត្តព្រះសីហនុ បានខិតខំយកអស់កម្លាំងកាយចិត្ត ប្រាជ្ញា ស្មារតី និងបច្ចេកទេសដើរតួនាទីយ៉ាងសំខាន់ក្នុងការដោះស្រាយរាល់បញ្ហាប្រឈមនានា និងបានធ្វើឱ្យដំណើរការ នៃការប្រកួតកីឡាវាយសីនៅលើទឹកដីនៃខេត្តព្រះសីហនុ ប្រព្រឹត្តទៅប្រកបដោយសុក្រឹតភាព និងទទួលបាននូវលទ្ធផលយ៉ាងល្អប្រសើរ ព្រោះកីឡារស់ក្នុងសន្តិភាព យើងទាំងអស់គ្នាគប្បីលេងកីឡាឱ្យបានយ៉ាងតិច១ ប្រភេទកីឡា ដើម្បីសុខភាពខ្លួនយើង។
លោកអភិបាលរងខេត្ត ក៏បានធ្វើការអំពាវនាវដល់យុវជនត្រូវចៀសឱ្យឆ្ងាយពីគ្រឿងញៀន ពីក្រុមក្មេងទំនើង និងចូលរួមគោរពច្បាប់ចរាចរណ៍ផ្លូវគោកឱ្យបានគ្រប់គ្នា ព្រោះគ្រោះថ្នាក់ចរាចរណ៍ជាឃាតករមួយដែលឆក់យកអាយុជីវិតរបស់យើងគ្រប់ពេលវេលា ប្រសិនបើយើងមិនមានការប្រុងប្រយ័ត្ននោះទេ និងព្រមទាំងបាននាំយកថវិការបស់រដ្ឋបាលខេត្តព្រះសីហនុ ចំនួន ៥លានរៀល ឧបត្ថម្ភជូនការប្រកួតកីឡាវាយសីនេះផងដែរ៕
ប្រភព៖ AKP
