បរទេស៖ ទោះបីជាស្ថានភាពហិរញ្ញវត្ថុរបស់ពួកគេមានកម្រិតក៏ដោយ ក៏ក្លឹប Barcelona នៅតែចាប់អារម្មណ៍ក្នុងការផ្ទេរយកកីឡាករ Cancelo ដដែរ។ នេះបើយោងតាមការចេញផ្សាយរបស់ Daily Star បានអោយដឹងថាក្លឹបយក្សកាតាឡានបានត្រៀមរួចរាល់ក្នុងការចំណាយ ៧លានផោន ជាថ្លៃខ្ចីជើង និង ១៨លានផោនផ្សេងទៀតជាតម្លៃផ្ទេរអចិន្ត្រៃយ៍នៅពេលបញ្ចប់លក្ខខណ្ឌខ្ចីជើង។ ក្លឹប Manchester City កំពុងសម្លឹងរកមើលការលក់រូបគាត់នៅក្នុងរដូវក្តៅនេះ ពួកគេបានត្រៀមខ្លួនរួចជាស្រេចក្នុងការចរចា ខណៈដែលពួកគេចង់បានប្រាក់ប្រហែល ២៥លានផោន សម្រាប់ការលក់ Cancelo ។
ផ្ទុយទៅវិញ បើយោងតាមការចេញផ្សាយរបស់ Mundo Deportivo អះអាងថាក្លឹប Barcelona មិនទាន់ត្រៀមខ្លួនរួចជាស្រេចក្នុងការចំណាយប្រាក់មួយកាក់មួយសេនលើថ្លៃខ្ចីជើង ហើយកំពុងស្វែងរកការផ្ទេរ Cancelo លើកិច្ចព្រមព្រៀងខ្ចីជើងមួយផ្សេងទៀតដែលពួកគេនឹងទទួលខុសត្រូវលើប្រាក់ឈ្នួលរបស់កីឡាករ។ យុទ្ធសាស្ត្រនេះស្របទៅនឹងឧបសគ្គហិរញ្ញវត្ថុដែលក្លឹបមាន និងតម្រូវការដើម្បីធ្វើប្រតិបត្តិការជាមួយនឹងស្ថានភាពហិរញ្ញវត្ថុជាក់ស្តែង។
ដូចគ្នានេះក្លឹប Barcelona ក៏ចាប់អារម្មណ៍ចង់បានកីឡាករ Felix ក្នុងលក្ខខណ្ឌខ្ចីជើងដោយមិនមានតម្លៃបន្ថែម។ ទោះជាយ៉ាងណាក៏ដោយក្លឹប Atletico Madrid ដូចជាក្លឹប Man City កំពុងពិចារណាលើការផ្ទេរមួយដើម្បីរំលោះតម្លៃកិច្ចសន្យារបស់កីឡាករ Felix ។ កុងត្រារបស់កីឡាករជាមួយនឹងពួកគេមានសុពលភាពដល់ឆ្នាំ២០២៩ ដែលផ្តល់ឱ្យពួកគេនូវអានុភាពក្នុងការចរចា។
ក្លឹបយក្សអ៊ីតាលី Juventus និង Inter កំពុងតាមដានយ៉ាងដិតដល់នូវស្ថានភាពរបស់ Cancelo ខណៈដែលពួកគេត្រូវការខ្សែការពារពេញលេញ ដើម្បីពង្រឹងតំបន់ការពាររបស់ពួកគេ ហើយកត្តានេះបានបង្កជាបញ្ហាស្មុគស្មាញសម្រាប់ក្លឹប Barcelona។ វានឹងក្លាយជារឿងគួរឱ្យចាប់អារម្មណ៍មួយនៅប៉ុន្មានសប្តាហ៍ក្រោយនេះ ព្រោះវានៅតែត្រូវបានគេមើលឃើញពីរបៀបដែលក្លឹបយក្សអេស្ប៉ាញដោះស្រាយ ដើម្បីទទួលបានកីឡាករដែលពួកគេចូលចិត្ត និងមានការប្រុងប្រយ័ត្នផ្នែកហិរញ្ញវត្ថុ ដោយប្រកាន់ខ្ជាប់នូវគោលការណ៍ណែនាំដ៏តឹងរឹង Financial Fair Play (FFP) នៃ La Liga ៕
