បរទេស៖ កីឡាករ Tomiyasu ត្រូវបាននិយាយថាបានត្រៀមខ្លួនរួចរាល់ក្នុងការចាកចេញពីក្លឹប Arsenal សម្រាប់ទីផ្សារដោះដូរនាខែមករា បន្ទាប់ពីបាត់បង់តំណែងជម្រើសដំបូងនៅទឹកដី Emirates។ នេះបើយោងតាមការចេញផ្សាយរបស់ Calciomercato បានអោយដឹងថាកីឡាករសញ្ជាតិជប៉ុនរូបនេះបានទទួលការចាប់អារម្មណ៍ពីសំណាក់ក្លឹប Napoli, Inter និង Juventus ដោយក្លឹបទាំងបីកំពុងពិចារណាលើការផ្ទេរនៅក្នុងទីផ្សារដោះដូរនាខែមករា។ ក្លឹប Arsenal នឹងអនុញ្ញាតឱ្យកីឡាករ Tomiyasu ចាកចេញក្នុងតម្លៃប្រហែល ២០លានអឺរ៉ូ។
កីឡាករ Tomiyasu បានអវត្តមានក្នុងការប្រកួត Pre-Season ហើយបានចាប់ផ្តើមរដូវកាល Premier League ជាមួយនឹងបញ្ហារបួសជង្គង់ទៀត។ គាត់នៅមិនទាន់ត្រលប់ទៅហ្វឹកហាត់ពេញលេញនៅឡើយទេ ប៉ុន្តែអាចនឹងត្រូវការពេលវេលា ដើម្បីអាចវិលត្រលប់មកកាន់ការជាសះស្បើយវិញ។ ក្លឹប Arsenal បានចុះហត្ថលេខាយកខ្សែការពារ Riccardo Calafiori នៅរដូវក្តៅពី Bologna ហើយការមកដល់របស់គាត់ទំនងជានឹងបង្ហាញពីដំណឹងអាក្រក់សម្រាប់ Tomiyasu ។
កីឡាករ Tomiyasu ធ្លាប់លេងនៅ Serie A ពីមុន ហើយអាចត្រូវបានលួងលោមអោយត្រលប់ទៅកាន់អ៊ីតាលីវិញ។ គាត់បានចំណាយពេល ២ឆ្នាំជាមួយក្លឹប Bologna មុនពេលចុះកុងត្រាជាមួយ Arsenal ក្នុងឆ្នាំ២០២១។
កីឡាករ Tomiyasu កំពុងបន្តការជាសះស្បើយរបស់គាត់ ហើយដូច្នេះនឹងមិនបង្ហាញខ្លួនក្នុងការប្រកួតថ្ងៃអាទិត្យរវាងក្លឹប Arsenal និងក្លឹប Machester City នៅ Etihad ក្នុងការប្រកួតដ៏ធំក្នុង Premier League នោះទេ៕
