ភ្នំពេញ៖ កីឡាករចំបាប់ជម្រើសជាតិកម្ពុជា ហេង រ័ត្នថា បានឈ្នះដាយមាសទី១ជូនជាតិ ក្នុងការប្រកួតកីឡាចំបាប់ជើងឯកអាស៊ីអាគ្នេយ៍បូកអូសេអាស៊ី នៅរសៀលថ្ងៃទី២៨ ខែកញ្ញា ឆ្នាំ២០២៤ នៅប្រទេសថៃ បន្ទាប់ពីប្រជែងឈ្នះកីឡាករ American Samoa ដោយពិន្ទុ ១១-០ នៅវគ្គផ្តាច់ព្រ័ត្រ។
លោក ខេស៊ី បាណេត ប្រធានសហព័ន្ធកីឡាចំបាប់អាស៊ីអាគ្នេយ៍ និងជាអនុប្រធានសហព័ន្ធកីឡាចំបាប់កម្ពុជាបានប្រាប់ពីប្រទេសថៃមកថា នេះជាមេដាយមាសទី១របស់កម្ពុជា ដែលដណ្តើមបានដោយកីឡាករ ហេង រ័ត្នថា លើវិញ្ញាសាចំបាប់សេរី ក្នុងប្រភេទទម្ងន់ ៩២គីឡូក្រាម។ មេដាយមាស១គ្រឿងនេះបានធ្វើឱ្យកម្ពុជាបង្កើនបានមេដាយសរុបបណ្តោះអាសន្ន ៧គ្រឿង បន្ទាប់ពីឈ្នះមេដាយសំរឹទ្ធ៦គ្រឿង កាលពីថ្ងៃទី២៧ ខែកញ្ញាម្សិលមិញ។
លោក ខេស៊ី បាណេត គូសបញ្ជាក់ថា កីឡាករចំបាប់កម្ពុជា ហេង រ័ត្នថា មុនឈ្នះមេដាយមាស គឺបានឆ្លងយកឈ្នះកីឡាករនូវែលសេឡង់ ១០-០ពិន្ទុដែរ។ នេះគឺជាមេដាយមាសទី១របស់កម្ពុជា និងមេដាយសំរឹទ្ធ៦គ្រឿងទៀត សរុប៧គ្រឿង គិតត្រឹមរសៀលថ្ងៃទី២៨ ខែកញ្ញានេះ មុនបិទបញ្ចប់ការប្រកួតផ្លូវការ នាថ្ងៃទី២៩ ខែកញ្ញា ឆ្នាំ២០២៤។ បេសកកម្មអន្តរជាតិរបស់កីឡាករ កីឡាការិនី និងអាជ្ញាកណ្តាលកម្ពុជា ដែលចូលរួមប្រកួត Southeast Asian championship & Oceania 2024 នេះទទួលបានការឧបត្ថម្ភទាំងស្រុងពីលោក ខេស៊ី បាណេត អនុប្រធានសហ័ន្ធកីឡាចំបាប់កម្ពុជា និងជានាយកវិទ្យាស្ថានខេមអេដ៕
