ភ្នំពេញ៖ តាមរយៈការប្រកួតកីឡាសិស្សបឋមសិក្សា ជ្រើសរើសជើងឯកថ្នាក់ខេត្តកណ្តាល ប្រចាំឆ្នាំសិក្សា២០២៤-២០២៥ ដែលបានបិទបញ្ចប់ដោយជោគជ័យ កាលពីល្ងាចថ្ងៃទី១៧ ខែមីនា ឆ្នាំ២០២៥ មន្ទីរអប់រំ យុវជន និងកីឡាខេត្តកណ្តាលចម្រាញ់បានធនធានជ័យលាភី ដើម្បីប្រមូលផ្តុំហ្វឹកហាត់ ត្រៀមចូលរួមការប្រកួតកីឡាសិស្សបឋមសិក្សាថ្នាក់ជាតិ ក្រោមការរៀបចំរបស់ក្រសួងអប់រំ យុវជន និងកីឡា នាខែឧសភា ២០២៥ខាងមុខ។
ឯកឧត្តម នុត ពុធដារ៉ា អភិបាលរងខេត្តកណ្តាលតំណាងឯកឧត្តម គួច ចំរើន អភិបាលនៃគណៈអភិបាលខេត្តកណ្តាលបានលើកឡើងថា ការប្រកួតកីឡាសម្រាប់សិស្សបឋមសិក្សាជម្រើសជើងឯកថ្នាក់ខេត្ត ប្រចាំឆ្នាំ២០២៥ នាពេលនេះ គឺដើម្បីវាស់ស្ទង់កម្រិតបច្ចេកទេស និងជ្រើសរើសយកកីឡាករ កីឡាការិនី ដែលឆ្នើម និងមានទេពកោសល្យល្អមកប្រមូលផ្តុំហ្វឹកហាត់ ដើម្បីត្រៀមចូលរួមប្រកួតថ្នាក់ជាតិ នាពេលខាងមុខ។ វិស័យកីឡារបស់ខេត្តកណ្តាលមានការរីកចម្រើនគួរឱ្យកត់សម្គាល់ ដោយនេះគឺជាការយកចិត្តទុកដាក់ពីអាជ្ញាធរគ្រប់លំដាប់ថ្នាក់ លោកប្រធានការិយាល័យ អប់រំ យុវជន និងកីឡា នៃរដ្ឋបាល ក្រុង ស្រុក និងគណៈគ្រប់គ្រងគ្រឹះស្ថានបឋមសិក្សា ក្នុងខេត្តទាំងអស់ ដើម្បីរួមចំណែកអភិវឌ្ឍវិស័យអប់រំកាយ និងកីឡា ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា និតិកាលទី៧ នៃរដ្ឋសភា ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត ជាប្រមុខ ។
ឯកឧត្តមអភិបាលរងខេត្តបន្ថែមថា បើយើងឆ្លុះបញ្ចាំងមកការប្រកួតនេះវិញ ឃើញថាកីឡាករ កីឡាការិនីទាំងអស់បានយកស្មារតីសាមគ្គីភាព មកអនុវត្តក្នុងការប្រកួតនេះបានល្អប្រសើរ ទាំងសាមគ្គីក្នុងក្រុម និងរវាងក្រុម មួយទៅ ក្រុមមួយទៀតធ្វើឱ្យការប្រកួតនេះទទួលបានលទ្ធផលគួរជាទីមោទនៈ។ ចំពោះជ័យលាភីត្រូវស្គាល់ពីភារកិច្ចរបស់ខ្លួន គឺត្រូវធ្វើជាតំណាងឱ្យសិស្សបឋមសិក្សាទូទាំងខេត្តកណ្តាល ដើម្បីទៅចូលរួមប្រកួតកីឡាសិស្សបឋមសិក្សា ថ្នាក់ជាតិ ចាប់ផ្តើមពីថ្ងៃទី០២-១១ ខែឧសភា ឆ្នាំ២០២៥ នៅរាជធានីភ្នំពេញ។ ដូច្នេះក្មួយៗកីឡាករ កីឡាការិនី ទាំងអស់ត្រូវខិតខំប្រឹងប្រែងហ្វឹកហាត់បន្ថែមទៀតដើម្បីយកជ័យជម្នះជូនខេត្តរបស់យើង។
ជាមួយគ្នានេះ លោក ចេង សំអ៊ុល ប្រធានមន្ទីរអប់រំ យុវជន និងកីឡាខេត្តកណ្តាលបានជម្រាបជូនថា ការប្រកួតកីឡាសិស្សបឋមសិក្សាខេត្តមាន៥ប្រភេទកីឡា ដូចជាកីឡាបាល់ទាត់ បាល់ទះ បាល់បោះ អត្តពលកម្ម និងកីឡាប៉េតង់ ដោយមានក្រុមចូលរួមសរុប ៥០ក្រុម ស្រី ២០ក្រុម ស្មើនឹងកីឡាករ កីឡាការិនីសរុប ៥១៦នាក់ (ស្រី ១៩០នាក់)មកពីស្រុក-ក្រុងសរុបចំនួន១២នៃខេត្តកណ្តាល។
លោក ចេង សំអ៊ុល បានគូសបញ្ជាក់ថា ក្រោយបញ្ចប់ការប្រកួតនេះ គណៈកម្មការបច្ចេកទេសជ្រើសរើសបានកីឡាករ កីឡាការិនី និងក្រុមដែលដណ្តើមបានចំណាត់ថ្នាក់ជើងឯកថ្នាក់ខេត្ត ប្រចាំឆ្នាំសិក្សា ២០២៤-២០២៥ ហើយក្រុមកីឡាសិស្សបឋមសិក្សារបស់ខេត្តកណ្តាលនឹងត្រូវទៅចូលរួមប្រកួតកីឡាសិស្សបឋមសិក្សាថ្នាក់ជាតិ ដែលគ្រោងនឹងធ្វើឡើងពីថ្ងៃទី០២-១១ ខែឧសភា ឆ្នាំ២០២៥ នៅរាជធានីភ្នំពេញ ក្រោមការរៀបចំរបស់ក្រសួងអប់រំ យុវជន និងកីឡា ដែលនឹងមាន២៥រាជធានីខេត្តនឹងចូលរួមប្រកួតប្រជែងមេដាយ ក្នុងព្រឹត្តិការណ៍ដ៏ធំនេះ។ គួររម្លឹកថា កីឡាខេត្តកណ្តាលដណ្តើមបានចំណាត់ថ្នាក់លេខ២ ក្នុងចំណោម២៥រាជធានីខេត្ត ក្នុងការរប្រកួតសិស្សបឋមសិក្សាថ្នាក់ជាតិ កាលពីឆ្នាំ២០២៤ កន្លងទៅ៕
