បរទេស៖ កីឡាករ Antony បានចូលរួមជាមួយ United នៅរដូវក្តៅឆ្នាំ២០២២ បន្ទាប់ពីបានចាប់អារម្មណ៍យ៉ាងខ្លាំងជាមួយនឹងទម្រង់លេងរបស់គាត់នៅក្លឹប Ajax ។ យ៉ាងណាមិញ ទម្រង់លេងរបស់គាត់ជាមួយក្លឹបបិសាចក្រហមគឺមិនសូវមានការចាប់អារម្មណ៍ឡើយ។ កីឡាករសញ្ជាតិប្រេស៊ីលរូបនេះបានធ្លាក់ចេញពីក្រុម ក្រោមការដឹកនាំរបស់លោក Ruben Amorim ក្នុងរដូវកាលនេះ ហើយបានសម្រេចចិត្តចូលរួមជាមួយក្រុម Real Betis របស់ La Liga ក្នុងកិច្ចសន្យាខ្ចីជើងរយៈពេលខ្លី។
កីឡាករ Antony មានទម្រង់លេងល្អសម្រាប់ក្រុម Real Betis ក្នុងរដូវកាលនេះ ហើយក្នុង ២២ប្រកួតគាត់រកបាន ១៣គ្រាប់សម្រាប់ក្រុម ដែលវាតិចជាងតែ ៤គ្រាប់ក្នុងការបង្ហាញខ្លួនរបស់គាត់ ៩៦ដងអោយក្លឹប United។ អតីតតារាឆ្នើមរបស់ក្លឹបបិសាចក្រហមលោក Pallister បានណែនាំកីឡាករ Antony ឱ្យស្នាក់នៅ Real Betis ហើយចូលរួមជាមួយក្រុមរបស់លោក Manuel Pellegrini លើការផ្ទេរដោយឥតគិតថ្លៃ។
ថ្លែងទៅកាន់ Football Espana លោក Pallister បាននិយាយថា “ខ្ញុំមិនបានមើលការប្រកួតជាច្រើននៅទីនោះទេ ប៉ុន្តែខ្ញុំបានលឺរឿងដែលគាត់ធ្វើបានល្អ។ ពេលគាត់នៅ Man United រឿងមួយដែលខ្ញុំអាចនិយាយបានអំពី Antony គឺគាត់មិនដែលគេចវេស ឫលាក់បាំង។ ទោះបីជាគាត់ពិបាកក៏ដោយ គាត់តែងតែព្យាយាម”។
“វាច្បាស់ណាស់ថាបរិយាកាសផ្សេងគ្នាគឺសាកសមនឹងគាត់។ គាត់ស្ថិតនៅក្រោមសម្ពាធច្រើននៅ Old Trafford ហើយគាត់ហាក់ដូចជាសប្បាយចិត្តជាងនៅ Real Betis ជាកន្លែងដែលគាត់ស៊ុតបញ្ចូលទីបានច្រើន។ ហើយដោយសារតែរឿងនេះ ខ្ញុំគិតថាមានលទ្ធភាពពិតប្រាកដដែលកិច្ចព្រមព្រៀងមួយត្រូវបានសម្រេច ហើយគាត់ស្នាក់នៅទីនោះ – ខ្ញុំមិនប្រាកដថា Antony នឹងចង់ត្រលប់ទៅ Man United” ។
“ប៉ុន្តែទោះបីជាមិនបានក៏ដោយ គាត់បានដាក់ខ្លួនឯងនៅក្នុងទីផ្សាដោះដូរ ហើយនេះនឹងក្លាយជាចេតនារបស់ Man United ។ កីឡាករ Marcus Rashford បានធ្វើវា ហើយ Jadon Sancho ពួកគេបានប្រសើរឡើងទាំងអស់។ ពួកគេទាំងអស់ធ្វើបានប្រសើរឡើងនៅឆ្ងាយពី Old Trafford ដែលជាកន្លែងអ្នកមិនត្រូវបានយកចិត្តទុកដាក់ ជាពិសេសនៅពេលដែលអ្វីៗដំណើរការមិនល្អ”។
ប្រសិនបើរបាយការណ៍ជុំវិញ Antony ត្រូវបានគេជឿជាក់បាននោះ ខ្សែបម្រើស្លាបប្រេស៊ីលមិនមានគម្រោងបន្តនៅ United នៅរដូវកាលនេះទេ ខណៈដែលគាត់សង្ឃឹមថានឹងចាកចេញពីក្លឹប។ សម្រាប់ Real Betis មានភាពមិនច្បាស់លាស់ទាក់ទងនឹងលទ្ធភាពដែលពួកគេអាចបង់ថ្លៃ ដែលក្លឹបបិសាចក្រហមបានទាមទារ៕
