បរទេស៖ នេះបើយោងតាមការចេញផ្សាយរបស់ TEAMtalk បានអោយដឹងថានៅទីបំផុតក្លឹប Chelsea អស់ការអត់ធ្មត់ជាមួយនឹងកីឡាករ Mykhailo Mudryk ដែលមានតម្លៃផ្ទេរ ៨៩លានផោន ខណៈដែលពួកគេគ្រោងនឹងលក់ខ្សែបម្រើស្លាបក្នុងទីផ្សារដោះដូរកីឡាករបន្ទាប់ក្នុងខែមករា។ កីឡាករជម្រើសជាតិអ៊ុយក្រែនបានជួបការលំបាកក្នុងការប្រកួតក្នុងក្របខណ្ឌ Premier League នៅរដូវកាលនេះ ដោយបានចំណាយពេលត្រឹមតែ ៦១ នាទីនៅលើទីលានក្នុងការប្រកួតលីក។
ប្រភពដដែលបានអះអាងដែរថា វាមិនទំនងថាក្រុមតោខៀវនឹងអាចចែកផ្លូវជាមួយកីឡាករជាអចិន្ត្រៃយ៍នោះទេ ដោយសារក្លឹបជាទូទៅមិនចំណាយច្រើនក្នុងទីផ្សាររដូវរងា។ ក្លឹប Marseille របស់ Ligue 1 ត្រូវបានគេរាយការណ៍ថា បានបង្ហាញចំណាប់អារម្មណ៍លើកីឡាកររូបនេះ ខណៈដែលពួកគេសម្លឹងមើលការចុះហត្ថលេខាលើខ្សែប្រយុទ្ធក្នុងលក្ខខណ្ឌខ្ចីជើង។
កាលពីខែមុន Enzo Maresca បានសម្តែងការខកចិត្តរបស់គាត់ចំពោះទម្រង់លេងមិនល្អរបស់ Mudryk ហើយជាមួយនឹងការមកដល់របស់ Pedro Neto និង Jadon Sancho ក្នុងអំឡុងពេលរដូវក្តៅ កីឡាករវ័យ ២៣ឆ្នាំបានធ្លាក់ចេញពីជម្រើសកីឡាករ ១១នាក់ដំបូង។
ក្រុមនៅភាគខាងលិចទីក្រុងឡុងដ៏ នឹងត្រលប់មកវិញក្នុងការប្រកួត Premier League នៅថ្ងៃសៅរ៍ ខណៈដែលពួកគេប៉ះ West Ham នៅកីឡដ្ឋាន London៕
