ភ្នំពេញ៖ លោក ប៉ាល់ ជីវ័ន គ្រូបង្វឹកក្រុមជម្រើសជាតិតេក្វាន់ដូ ITFកម្ពុជា និងជាមន្ត្រីអាជ្ញាកណ្តាល-ចៅក្រមកីឡាតេក្វាន់ដូ ITF ក្នុងការប្រកួតកីឡាឧត្តមសិក្សា និងមធ្យមសិក្សាបច្ចេកទេសថ្នាក់ជាតិ ឆ្នាំ២០២៤ បានគូសបញ្ជាក់ពីផលប្រយោជន៍សំខាន់មួយចំនួន ក្នុងការផលិតធនធានកីឡាករ កីឡាការិនីជានិស្សិតថ្មីៗបន្តវេន ហើយក៏ជាឱកាសបង្កើនគុណភាពដល់ក្រុមជម្រើសជាតិ ត្រៀមទៅប្រកួតតេក្វាន់ដូ ITF ជើងឯកអាស៊ី នៅប្រទេសឥណ្ឌា នាខែសីហា ឆ្នាំ២០២៤ដែរ។
លោក ប៉ាល់ ជីវ័ន បានលើកឡើងថា ការប្រកួតកីឡាតេក្វាន់ដូ ITF នៃកីឡាឧត្តមសិក្សា និងមធ្យមសិក្សាបច្ចេកទេសថ្នាក់ជាតិ ឆ្នាំ២០២៤នេះមានមានកីឡាករ ៣២នាក់ និងកីឡាការិនី២០នាក់សរុប ៥២នាក់មកពី៨សាកលវិទ្យាល័យ ដោយមានវិញ្ញាសាសរុបចំនួន១៣។ ការប្រកួតនេះគឺជាការដកស្រង់បទពិសោធន៍របស់កីឡាករ កីឡាការិនីមកពីគ្រឹះស្ថានឧត្តមសិក្សា ហើយសហព័ន្ធកីឡាជាតិ ក៏ដូចជាក្រសួងអប់រំ យុវជន និងកីឡានឹងអាចជ្រើសរើសបាននូវធនធានបន្តវេនផងដែរ។ ជាមួយគ្នានេះ កីឡាករ កីឡារិនីជម្រើសជាតិតេក្វាន់ដូ ITF កម្ពុជា ដែលមានខ្លះជានិស្សិត ក៏បានចូលរួមប្រកួតក្នុងព្រឹត្តិការណ៍កីឡាឧត្តមសិក្សា ដើម្បីបង្កើនគុណភាពបច្ចេកទេស ត្រៀមឆ្ពោះទៅចូលរួមប្រកួតប្រជែងមេដាយជូនជាតិ ពីការប្រកួតតេក្វាន់ដូ ITF ជើងឯកអាស៊ី នៅប្រទេសឥណ្ឌា នាខែសីហា ឆ្នាំ២០២៤ផងដែរ។
នៅក្នុងព្រឹត្តិការណ៍កីឡាឧត្តមសិក្សា និងមធ្យមសិក្សាថ្នាក់ជាតិនេះ ក្រៅពីការផលិតធនធានកីឡាករ កីឡាការិនីជានិស្សិតថ្មីៗបន្តវេន ក៏ជាការប្រកួតមួយដ៏សំខាន់ក្នុងការវាស់ស្ទង់គុណភាពរបស់អត្តពលិកជម្រើសជាតិមួយចំនួនផងដែរថាតើចំណុចណាដែលនៅខ្វះខាត ហើយត្រូវហ្វឹកហាត់បំពេញបន្ថែម មុនពេលចេញទៅប្រកួតអន្តរជាតិកម្រិតអាស៊ី នៅប្រទេសឥណ្ឌា។
បន្ថែមពីលើនេះ គ្រូធំជម្រើសជាតិតេក្វាន់ដូ ITF កម្ពុជារូបនេះក៏បានសំណូមពរដល់បណ្តាសាលវិទ្យាល័យនានា ដែលមិនទាន់ចូលរួមលើប្រភេទកីឡាក្វាន់ដូ ITF សូមចូលរួមប្រកួត ក្នុងព្រឹត្តិការណ៍ដូចគ្នានេះ នាឆ្នាំក្រោយៗទៀត ដើម្បីជំរុញឱ្យចលនានិស្សិតរបស់យើងបានចូលរួមបច្ចេកទេសសមត្ថភាពលើប្រភេទកីឡាឱ្យបានច្រើន ដើម្បីជាធនធានសម្រាប់ជាតិនាថ្ងៃខាងមុខបន្តទៀត។
សម្រាប់សមាសភាពក្រុមជម្រើសជាតិតេក្វាន់ដូ ITF ប្រចាំឆ្នាំ២០២៤ មានសរុបចំនួន ១៥នាក់ ក្នុងនោះអត្តពលិកជានិស្សិតមាន៩នាក់។ ក្នុងអំឡុងពេលនេះ គឺជាការហ្វឹកហាត់បំប៉នបច្ចេកទេស ហើយនៅអំឡុងពាក់កណ្តាលខែកក្កដា ឆ្នាំ២០២៤ ទើបជម្រើសសមាសភាពអត្តពលិកឆ្នើមត្រៀមទៅប្រកួតជើងឯកអាស៊ី នៅឥណ្ឌា នាខែសីហា ឆ្នាំ២០២៤។
ជាចុងក្រោយ លោក ប៉ាល់ ជីវ័ន បានថ្លែងអំណរគុណចំណោះក្រសួងអប់រំ យុវជន និងកីឡា តាមរយៈនាយកដ្ឋានរៀបចំ និងគ្រប់គ្រងព្រឹត្តិការណ៍កីឡា ដែលរៀបចំការប្រកួតកីឡាឧត្តមសិក្សា និងមធ្យមសិក្សាថ្នាក់ជាតិនេះឡើង ក្នុងការជំរុញឱ្យយុវជន ក៏ដូចជានិស្សិតតាមសាកលវិទ្យាល័យនានាបានចូលរួមលេងកីឡា ស្របតាមគោលនយោបាយរបស់រាជរដ្ឋាភិបាលកម្ពុជា «ប្រជាជនម្នាក់លេងកីឡាមួយប្រភេទប្រចាំជីវិត»៕
ប្រភព៖ AKP
