ភ្នំពេញ៖ វីរកីឡាករ សាលី អ៊ូមើត បានដឹកនាំកីឡាករជម្រើសជាតិម៉ូតូទឹកកម្ពុជាមកដល់មាតុប្រទេសវិញហើយ កាលពីល្ងាចថ្ងៃទី១៣ ខែមិថុនា ឆ្នាំ២០២៤ ជាមួយការដណ្តើមបានលទ្ធផលល្អចំណាត់ថ្នាក់លេខ១ ចំនួន៣វិញ្ញាសា ចំណាត់ថ្នាក់លេខ២ (១វិញ្ញាសា) និងចំណាត់ថ្នាក់លេខ៣ (១វិញ្ញាសា) ក្នុងការប្រកួតកីឡាម៉ូតូទឹកជើងឯកអាស៊ី (ជុំទី១) នៅប្រទេសជប៉ុន ហើយកីឡាករឆ្នើមរបស់កម្ពុជារូបនេះបង្ហាញការតាំងចិត្តដ៏មោះមុតថា ខ្លួននឹងប្រឹងឱ្យអស់ពីសមត្ថភាព ដើម្បីនាំយកពានរង្វាន់ជើងឯកអាស៊ី និងពានរង្វាន់ពិភពលោក (World Series) មកទឹកដីកម្ពុជា។
វីរកីឡាករ សាលី អ៊ូមើត បានប្តេជ្ញាចិត្តយ៉ាងមុតមាំយ៉ាងដូច្នេះថា ៖«សម្រាប់ខ្ញុំផ្ទាល់ ដែលជាអ្នកដឹកនាំកីឡាករចូលរួមការប្រកួតផ្ទាល់ ខ្ញុំពិតជាសប្បាយចិត្តខ្លាំងណាស់។ ជាឧបសគ្គ គឺម៉ូតូទឹកមានលក្ខណៈចាស់ ដែលក្រុមជាងបានជួសជុលមួយយប់ទល់ភ្លឺ មិនបានដេក ហើយវាត្រូវបានជួសជុលឡើងវិញបានទើបអាចបន្តការប្រកួតបាន។ ខ្ញុំចង់ដណ្តើមពានរង្វាន់ជើងឯកអាស៊ី និងពាន World Series យកមកជូនជាតិកម្ពុជា។ ឆ្នាំនេះ ខ្ញុំតាំងចិត្តថា នឹងប្រឹងប្រែងហ្វឹកហាត់ឱ្យបានខ្លាំងក្លា ជាមួយសិស្សប្អូនរបស់ខ្ញុំ ហើយយើងខ្ញុំនឹងប្រឹងប្រែងឱ្យអស់ពីសមត្ថភាព ដើម្បីស្វែងរកស្នាដៃជូនប្រទេសជាតិយើង តាមរយៈការចូលរួមប្រកួតយកពានជើងឯកអាស៊ី និងពានរង្វាន់កម្រិតពិភពលោក World Serie។ ខ្ញុំប្តេជ្ញាថានឹងប្រឹងយកពានទាំងពីរនេះមកដឹកដីកម្ពុជាឱ្យទាល់តែបាន»។
កីឡាករម៉ូតូទឹកជម្រើសជាតិកម្ពុជាដ៏ឆ្នើមរូបនេះគូសបញ្ជាក់ទៀតថា ការចូលរួមប្រកួតកីឡាម៉ូតូទឹកជើងឯកអាស៊ី នៅក្រុងអូសាកា ប្រទេសជប៉ុន នាពេលេនះ គឺក្រុមជម្រើសជាតិម៉ូតូទឹកកម្ពុជាពិតជាទទួលបានលទ្ធផលល្អប្រសើរ ដោយកម្ពុជាបានបញ្ជូនកីឡាករទៅចូលរួមមានចំនួនតិចត្រឹម៥នាក់ ប៉ុន្តែកីឡាករយើងសុទ្ធតែទទួលបានលទ្ធផលល្អដូចៗគ្នា ហើយបានប្រកួតប្រជែងជាមួយកីឡាករខ្លាំងៗជាច្រើនប្រទេស។ ជាលទ្ធផល គឺម៉ូតូទឹកកម្ពុជាដណ្តើមបានលទ្ធផលល្អចំណាត់ថ្នាក់លេខ១ (៣វិញ្ញាសា) ចំណាត់ថ្នាក់លេខ២ (១វិញ្ញាសា) និងចំណាត់ថ្នាក់លេខ៣ (១វិញ្ញាសា)។ នៅក្នុងដំណើរវិលត្រឡប់មកដល់មាតុប្រទេសវិញទទួលបានការស្វាគមន៍យ៉ាងកក់ក្តៅពីឯកឧត្តម ណុះ ស្លេះ ប្រធានសហព័ន្ធកីឡាម៉ូតូទឹកកម្ពុជា និងតំណាងក្រសួងអប់រំ យុវជន និងកីឡា។
ការប្រកួតកីឡាម៉ូតូទឹកជើងឯកអាស៊ី នៅប្រទេសជប៉ុន (ជុំទី១) (Asian Championship) ឆ្នាំ២០២៤ មានកីឡាករមកពី១៧ប្រទេសចូលរួម ខណៈកម្ពុជាបញ្ជូនកីឡា៥នាក់ និងគ្រូបង្វឹក១ គ្រូជំនួយ១ និងប្រតិភូ២នាក់ មានវីរកីឡាករ សាលី អូម៉ើត, មីន ម៉ូស្តាន់, មីន អូស្មាន់, កៃវ៉ាន់ ស៊ីដែន និងកីឡាករសាលី ហ្វីលីន។ ជាលទ្ធផល វីរកីឡាករ សាលី អូម៉ើត លេខ១ វិញ្ញាសា Sport GP, កីឡាករ សាលី ហ្វីលីន ចំណាត់ថ្នាក់លេខ១ លើវិញ្ញាសា Expert Runabout 1100 Stock, កីឡាករ មីន អូស្មាន់ លេខ១ លើវិញ្ញាសា Novice Ski Stock, កីឡាករ កៃវ៉ាន់ ស៊ីដែន លេខ២ លើវិញ្ញាសា Novice Ski Stock, កីឡាករ មីន ម៉ូស្តាន លេខ៣ លើវិញ្ញាសា Novice Runabout 1100 Open។
គួរបញ្ជាក់ថា ការប្រកួតកីឡាម៉ូតូទឹកជើងឯកអាស៊ី នៅប្រទេសជប៉ុន គឺជាការប្រកួតជុំទី១ ហើយត្រូវបន្តនៅជុំផ្តាច់ព្រ័ត្រ នៅប្រទេសថៃ នាថ្ងៃទី១១-១៥ ខែធ្នូ ឆ្នាំ២០២៤។ ចំពោះការប្រកួតកីឡាម៉ូតូទឹកកម្រិតពិភពលោក (World Series) ត្រូវប្រកួតចំនួន៣ជុំ ដោយចាប់ផ្តើមនៅប្រទេសប៉ូឡូញ សម្រាប់ជុំទី១ នាថ្ងៃទី២៤-២៨ ខែកក្កដា ឆ្នាំ២០២៤។ ជុំទី២ ប្រកួតនៅទឹកដីសហរដ្ឋអាមេរិក ពីថ្ងៃទី០៧-១៣ ខែតុលា ឆ្នាំ២០២៤ និងជុំទី៣ ដែលជាជុំផ្តាច់ព្រ័ត្រ គ្រោងនឹងធ្វើឡើងនៅប្រទេសថៃ នាថ្ងៃទី១១-១៥ ខែធ្នូ ឆ្នាំ២០២៤ជាមួយនឹងការប្រកួតជុំផ្តាច់ព្រ័ត្រនៃជើងឯកអាស៊ីនេះដែរ៕
ប្រភព៖ AKP
