ភ្នំពេញ៖ ប្រតិភូ គ្រូបង្វឹក កីឡាករ កីឡាការិនីសរុប ២២នាក់បានវិលត្រឡប់តាមរថយន្តក្រុងមកដល់មាតុប្រទេសវិញ កាលពីព្រលប់ថ្ងៃទី១៦ ខែកក្កដា ឆ្នាំ២០២៤ ក្រោយឈ្នះមេដាយសរុប១៧គ្រឿងពីការប្រកួតអន្តរជាតិ នៅប្រទេសវៀតណាម ដោយទទួលស្វាគមន៍យ៉ាងកក់ក្តីពីលោកស្រី ហង់ ស៊ីមន អគ្គលេខាធិការ តំណាងលោកជំទាវ ញ៉ែម មរកត ប្រធានសហព័ន្ធកីឡារាំកម្ពុជា នៅមជ្ឈមណ្ឌលជាតិហ្វឹកហ្វឺនកីឡា។
លោក សូវ តុង នាយកបច្ចេកទេសសហព័ន្ធកីឡារាំកម្ពុជាទទួលបន្ទុកប្រធានប្រតិភូគូសបញ្ជាក់ថា មេដាយសរុបចំនួន១៧គ្រឿងរបស់កម្ពុជា ដែលដណ្តើមបាននេះ ក្នុងនោះគឺមានមេដាយមាស៤ ប្រាក់៦ និងសំរឹទ្ធ៧គ្រឿង ហើយអត្តពលិកកម្ពុជាក៏បានជាប់ចំណាត់ថ្នាក់លេខ៤ លេខ៥ និងលេខ៦ ក៏ទទួលបានលិខិតសរសើរផងដែរ។ បើទោះបីជានេះជាសមិទ្ធផលមេដាយ ដែលកើតចេញពីការខិតខំប្រឹងប្រែងរបស់កីឡាករ កីឡាការិនីរាំកម្ពុជាយកមកជូនជាតិ ពីព្រឹត្តិការណ៍អន្តរជាតិ នៅប្រទេសវៀតណាម ដែលមាន២៦ចូលរួមបែបនេះក្តី ក៏លោកមើលឃើញពីចំណុចខ្វះខាតមួយចំនួន ដែលយើងត្រូវបន្តការខិតខំហ្វឹកហាត់ឱ្យបានខ្លាំងក្លាបន្ថែមទៀត ដើម្បីសម្រួចឆ្ពោះទៅចូលរួមការប្រកួតអន្តជាតិនានា នាពេលខាងមុខ ជាពិសេសគោលដៅចូលរួមប្រកួតកីឡាស៊ីហ្គេម លើកទី៣៣ នាឆ្នាំ២០២៥ខាងមុខ នៅប្រទេសថៃ។
លោក សូវ តុង គូសបញ្ជាក់បន្ថែមយ៉ាងដូច្នេះថា ៖«បើទោះបីជាបេសកកម្មអន្តរជាតិរបស់កម្ពុជា នាពេលនេះបានជួបការខ្វះខាតថវិកាក្តី ក៏យើងនៅតែប្រឹងប្រែងចូលរួមប្រកួតអស់ពីលទ្ធភាព ដើម្បីប្រទេសជាតិរបស់យើង ឱ្យមានកិត្តិយស កុំឱ្យចាញ់ប្រទេសជុំវិញយើង។ សហព័ន្ធកីឡារាំកម្ពុជាត្រូវបានបង្កើតឡើងក្រោយគេ ប៉ុន្តែទឹកចិត្តរបស់យើងទាំងអស់គ្នាត្រូវតែតស៊ូធ្វើឱ្យបានល្អ ដោយលះបង់ទាំងពេលវេលា ថវិកា របស់អាណាព្យាបាល និងកីឡាករ កីឡាការិនី រួមទាំងថ្នាក់ដឹកនាំសហព័ន្ធ ដើម្បីឱ្យពួកគាត់បានចូលរួមប្រកួតដកពិសោធន៍»។
ជាមួយគ្នានេះ កីឡាករជម្រើសជាតិកីឡារាំកម្ពុជា ជុំ លីហៀង ដែលជាម្ចាស់មេដាយមាស ១គ្រឿងលើវិញ្ញាសាឯកត្តជនបានបង្ហាញក្តីរីករាយ ដែលខ្លួនបានដណ្តើមបានមេដាយមាសយកមកជូនជាតិ ក្នុងវិញ្ញាសា ដែលមានកីឡាករអន្តរជាតិចូលរួមប្រកួត៣៤នាក់។ «ខ្ញុំបានចូលរួមប្រកួតអន្តរជាតិបែបនេះ ២លើក ហើយនេះជាមេដាយមាសទី២របស់ខ្ញុំ។ ខ្ញុំនឹងបន្តការខិតខំប្រឹងប្រែងហ្វឹកហាត់ ដើម្បីដណ្តើមមេដាយជូនជាតិ នាព្រឹត្តិការណ៍អន្តរជាតិនានា នាពេលខាងមុខបន្តទៀត»។
កីឡាករមកពីក្លឹបកីឡាក្រសួងការពារជាតិរូបនេះបន្ថែមថា ខ្លួនមិននឹកស្មានថា ខ្លួនអាចដណ្តើមបានមេដាយមាសបែបនេះឡើយ ដោយ ជុំ លីហៀង បានមើលឃើញថា កីឡាករអន្តរជាតិនានាចូលរួមសុទ្ធតែមានសមត្ថភាពខ្លាំងៗជាងខ្លួន។ បើទោះបីជា កីឡាករ ជុំ លីហៀង ឈ្នះមេដាយមាសជូនជាតិបែបនេះក្តី ក៏ម្ចាស់មេដាយមាសរូបនេះយល់ឃើញថា សមត្ថភាពខ្លួននៅមានកម្រិត ហើយមានឆន្ទៈខ្ពស់ ក្នុងការខិតខំដុសខាត់សមត្ថភាពហ្វឹកហាត់បន្ថែមទៀត ដើម្បីត្រៀមប្រកួតអន្តរជាតិ នាពេលខាងមុខ។
គួរបញ្ជាក់ថា កីឡាករ កីឡាការិនីជម្រើសជាតិ និងថ្នាលកម្ពុជា២០នាក់បានឈ្នះមេដាយសរុប ១៧គ្រឿង ក្នុងនោះមេដាយមាស ៤ ប្រាក់៦ និងសំរឹទ្ធ៧ ដណ្តើមបានពីការប្រកួត WDSF World Challenge Cup Rising Star Latin & Standard 2024/WDSF International Open Latin & Standard 2024/KTOC Cup 2024 នៅទីក្រុងហូជីមិញ ប្រទេសវៀតណាម ដោយមាន២៦ប្រទេសជុំវិញពិភពលោកចូលរួម ពីថ្ងៃទី១៣-១៤ ខែកក្កដា ឆ្នាំ២០២៤។ មេដាយមាស៤គ្រឿងរបស់កម្ពុជា ដណ្តើមបានដោយកីឡាករជម្រើសជាតិ ជុំ លីហៀង មេដាយមាស១ គ្រឿង, កីឡាការិនីជម្រើសជាតិ សាន រ៉ូហ្សា មេដាយមាស១គ្រឿង និងកីឡាករថ្នាល ឡុង ចំណូល ឈ្នះមេដាយមាស២គ្រឿង៕
