ភ្នំពេញ៖ សហព័ន្ធខ្មែរកីឡាហាប់គីដូបានរៀបចំមហាសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅឆ្នាំ២០២៥ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) កាលពីថ្ងៃទី១៦ ខែមីនា ឆ្នាំ២០២៥ជាមួយនឹងការដាក់គោលដៅធំៗចំនួន២ សម្រាប់ឆ្នាំ២០២៥។
លោក គួច ហុងជៀក ប្រធានស្តីទី សហព័ន្ធខ្មែរកីឡាហាប់គីដូ បានលើកឡើងថា សម្រាប់ទិសដៅក្នុងឆ្នាំ២០២៥នេះ សហព័ន្ធមានគោលដៅធំៗចំនួនពីរ ដែលជាភារកិច្ចត្រូវបំពេញ ហើយភារកិច្ចធំៗទាំងពីរនេះ គឺសហព័ន្ធប្តេជ្ញាចិត្តសម្រេចឱ្យបានតាមផែនការ ដែលបានគ្រោងទុក ដោយទី១.គឺគ្រោងនឹងបញ្ជូនអត្តពលិកចូលរួមការប្រកួតនៅអន្តរជាតិ នៅប្រទេសឥណ្ឌូណេស៊ី ដើម្បីបង្ហាញវត្តមានកីឡាករកីឡាការិនី និងនាំយកមេដាយមកជូនជាតិ។ ទី២.នឹងរៀបចំការប្រកួតជ្រើសរើសជើងឯកថ្នាក់ជាតិ លើកទី៣ ប្រចាំឆ្នាំ២០២៥ ដើម្បីចម្រាញ់ឱ្យបានធនធានឆ្នើមៗ មកបំប៉នគុណភាពបច្ចេកទេសបន្ថែម ក្នុងគោលដៅជំរុញអភិវឌ្ឍសមត្ថភាពឱ្យពួកគេក្លាយជាអត្តពលិកមានសក្តានុពល។
ជាមួយគ្នានេះ លោកប្រធានស្តីទីក៏បានអំពាវនាវដល់វិស័យឯកជន និងសប្បុរសជននានា សូមចូលរួមជួយដល់សហព័ន្ធខ្មែរកីឡាហាប់គីដូ ដើម្បីឱ្យសហព័ន្ធមានធនធានថវិកា សម្ភារ ក្នុងការបណ្តុះបណ្តាលគ្រូបង្វឹកចៅក្រម និងអាជ្ញាកណ្តាល ពិសេសគឺជួយផ្តល់លទ្ធភាពឱ្យសហព័ន្ធបានបញ្ជូនកីឡាករកីឡាការិនីនៅចូលរួមប្រកួតនៅក្រៅប្រទេស ដើម្បីវាស់ស្ទង់កម្រិតបច្ចេកទេស និងដណ្តើមយកមេដាយមកជូនជាតិ។ លោក គួច ហុងជៀក បានចាត់ទុកថា វិស័យឯកជន និងសប្បុរសជនតែប៉ុណ្ណោះ ដែលមានលទ្ធភាព និងធនធានជួយរួមចំណែកអភិវឌ្ឍន៍កីឡាវិស័យកីឡាបាន ហើយប្រសិនបើគ្មានការជួយឧបត្ថម្ភពីវិស័យឯកជននោះទេ វិស័យកីឡាក៏មិនអាចរីកចម្រើនទៅមុខកើតដែរ។
ក្នុងឱកាសមហាសន្និបាតនេះ លោក គង់ ចាន់ធីណា ជម្រាបជូនអំពីការខិតខំប្រឹងប្រែងរបស់សហព័ន្ធ កីឡាករ កីឡាការិនី ដែលសម្រេចបានលទ្ធផលគួរជាទីមោទនៈ ក្នុងឆ្នាំ២០២៤ កន្លងទៅ ហើយក៏បានបង្ហាញផែនការយុទ្ធសាស្ត្រ ក្នុងឆ្នាំ២០២៥នេះផងដែរ។ សហព័ន្ធខ្មែរកីឡាហាប់គីដូបានខិតខំប្រឹងប្រែងយ៉ាងខ្លាំងនៅក្នុងការអភិវឌ្ឍ ដើម្បីឈានឆ្ពោះទៅរកសក្តានុពល ដូចប្រភេទកីឡាសក្តានុពលមួយចំនួន បើទោះបីជួបបញ្ហាប្រឈមមួយចំនួន ដោយកង្វះថវិកាលើការបណ្តុះបណ្តាលធនធានកីឡាករ គ្រូបង្វឹក អាជ្ញាកណ្តាល ចៅក្រម និងការញ្ជូនកីឡាករទៅប្រកួតនៅក្រៅប្រទេសជាដើមក្តី។ ប៉ុន្តែបើទោះបីជា សហព័ន្ធជួបបញ្ហាប្រឈមបែបនោះក្តី ក៏សហព័ន្ធខិតខំកៀរគររកសប្បុរសជន និងកៀរគរថវិកាពីសមាជិករបស់ខ្លួន ក្នុងការបង្កើតបានជាវគ្គបណ្តុះបណ្តាលខ្លី នៅក្នុងស្រុក និងបញ្ជូនទៅចូលរួមវគ្គនៅក្រៅប្រទេស។ បន្ថែមពីនោះ សហព័ន្ធក៏បានដឹកនាំកីឡាករ កីឡាការិនីចេញទៅប្រកួតនៅក្រៅប្រទេស ដោយទទួលបានមេដាយត្រឡប់មកវិញជូនជាតិផងដែរ។
អគ្គលេខាធិការ លោក គង់ ចាន់ធីណា បានប្តេជ្ញាចិត្តថា បើទោះបីជាការបោះជំហានរបស់សហព័ន្ធមានការអភិវឌ្ឍយឺតជាងសហព័ន្ធផ្សេងៗដោយប្រឈមនឹងកង្វះថវិកាក្តី ក៏គណៈកម្មាធិការប្រតិបត្តិសហព័ន្ធនៅតែបន្តដំណើររួមគ្នារិះរកគ្រប់មធ្យោបាយ ដើម្បីឱ្យសហព័ន្ធកីឡាមួយនេះអាចបន្តសកម្មភាពចូលរួមទាំងការប្រកួតថ្នាក់ជាតិ និងអន្តរជាតិ៕
