ភ្នំពេញ៖ ម្ចាស់ផ្ទះកម្ពុជាបានឈ្នះមេដាយមាស ៣គ្រឿង ក្នុងការប្រកួតកីឡាតេក្វាន់ដូ ITF ជើងឯកអាស៊ាន នៅវិមានពហុកីឡដ្ឋានជាតិអូឡាំពិក នៅព្រឹកថ្ងៃទី២៨ ខែមិថុនា ឆ្នាំ២០២៥ ដែលជាថ្ងៃដំបូងនៃការប្រកួតពីថ្ងៃទី២៨-៣០ ខែមិថុនា ឆ្នាំ២០២៥។
មន្ត្រីសហព័ន្ធកីឡាតេក្វាន់ដូ ITF កម្ពុជាបានឱ្យដឹងថា ម្ចាស់ផ្ទះកម្ពុជា ដែលឈ្នះមេដាយមាស ៣គ្រឿង ក្នុងថ្ងៃដំបូងនេះដណ្តើមបានដោយកីឡាការិនី តូច ឧត្តម កីឡាករ ស៊ីវ សិរីបុត្រ និងកីឡាករ សិរី វឌ្ឍនាវង្ស លើវិញ្ញាសាសម្តែងឯកត្តជន។ នេះជាការប្រកួតថ្ងៃដំបូង ដែលមានវិញ្ញាសាសរុបទាំង៣ថ្ងៃចំនួន ១៤៥ លើប្រភេទវិញ្ញាសាឈុត U13 U15 U17 និងឈុតធំ។
ការប្រកួតកីឡាតេក្វាន់ដូ ITF ជើងឯកអាស៊ីអាគ្នេយ៍ លើកទី២ ឆ្នាំ២០២៥ នៅកម្ពុជានេះ មានប្រទេសចូលរួមសរុបចំនួន៦ រួមមាន៖ ម្ចាស់ផ្ទះ កម្ពុជា ឥណ្ឌូណេស៊ី ម៉ាឡេស៊ី ហ្វីលីពីន សិង្ហបូរី វៀតណាម និងកូរ៉េខាងជើង ដោយមានប្រតិភូគ្រូបង្វឹក កីឡាករ កីឡាការិនីសរុប ១៨៤នាក់។
ចំពោះពិធីបើកជាផ្លូវការនឹងធ្វើឡើង នៅរសៀលថ្ងៃទី២៨ខែមិថុនានេះ នៅវិមានពហុកីឡដ្ឋានជាតិអូឡាំពិក ដោយទទួលបានការអញ្ជើញផ្តល់កិត្តិយសពីឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈនឹងធ្វើសន្ទរកថាស្វាគមន៍ ក្នុងនាមជាម្ចាស់ផ្ទះ ក្នុងពិធីបើកការប្រកួតជាផ្លូវការនេះ៕
