ភ្នំពេញ៖ លោក ខេស៊ី បាណេត នាយកវិទ្យាស្ថាន ខេមអេដ និងជាអនុប្រធានកីឡាចំបាប់កម្ពុជាគូសបញ្ជាក់ថា ក្រោមការជំរុញទឹកចិត្តពីឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា វិទ្យាស្ថានខេមអេដកំពុងបង្កើនគុណភាពលើប្រភេទកីឡាចំនួន១០របស់ខ្លួន និងកំពុងបន្ថែមលើគោលដៅអភិវឌ្ឍកីឡាមួយចំនួនទៀត ដូចជាកីឡាចំបាប់ និងហែលទឹកជាដើម។
នេះជាការលើកឡើងរបស់លោក ខេស៊ី បាណេត នៅក្នុងឱកាសបិទការប្រកួតកីឡាបាល់បោះបុរស-នារី ពានរង្វាន់ខេមអេដ ឆ្នាំ២០២៤ (CamEd Men’s & Women’s Basketball Tournament 2024) ដែលបានបិទបញ្ចប់ដោយជោគជ័យ កាលពីល្ងាចថ្ងៃទី១០ ខែវិច្ឆិកា ឆ្នាំ២០២៤ នៅទីលាន Platinum Sport Center រាជធានីភ្នំពេញ។
នាយកវិទ្យាស្ថាន ខេមអេដ និងជាអនុប្រធានសហព័ន្ធកីឡាចំបាប់កម្ពុជា លោក ខេស៊ី បាណេត សង្កត់ធ្ងន់ថា ៖«ក្រោមការជំរុញគាំទ្រ និងការលើកទឹកចិត្តពីឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡាទទួលបន្ទុកកីឡា គឺគ្រប់សាកលវិទ្យាល័យ គ្រឹះស្ថានឧត្តមសិក្សា រួមទាំងវិទ្យាស្ថាន ខេមអេដ តែងតែបានបញ្ជូលកម្មវិធីអភិវឌ្ឍកីឡាជាច្រើន ក្នុងកម្មវិធីសិក្សា ដើម្បីផ្តល់ឱកាសដល់និស្សិតទទួលបានការបណ្តុះបណ្តាលកីឡា ដើម្បីត្រៀមការប្រកួតកីឡាឧត្តមសិក្សាថ្នាក់ជាតិ នាឆ្នាំ២០២៦»។
ក្នុងការប្រកួតកីឡាឧត្តមសិក្សាថ្នាក់ជាតិ ឆ្នាំ២០២៤កន្លងទៅនេះ ក្រុមបាល់បោះ ខេមអេដ ដណ្តើមបានជើងឯករងទូទាំងប្រទេស ខណៈក្រុមបាល់បោះនារីក៏ទទួលបានជើងឯករងទូទាំងប្រទេសផងដែរ។ ជាមួយនឹងការខិតខំហ្វឹកហាត់ និងការរៀបចំការប្រកួតប្រចាំឆ្នាំរបស់ខេមអេដ លោករំពឹងថា ក្រុមបាល់បោះបុរស-នារីរបស់ខ្លួននឹងបន្តការខិតខំពង្រឹងគុណភាពបច្ចេកទេស ដើម្បីប្រជែងជើងឯក ការប្រកួតកីឡាឧត្តមសិក្សាថ្នាក់ជាតិ នាឆ្នាំ២០២៦ខាងមុខ។ បច្ចុប្បន្ន វិទ្យាស្ថានខេមអេដកំពុងពង្រឹងគុណភាពលើប្រភេទកីឡាចំនួន១០ ហើយឆ្នាំនេះក៏មាននិស្សិតជាច្រើនបានចូលរួមលេងលើប្រភេទកីឡាជឺជីតស៊ូ គុនដាវ និងកំពុងបំផុសស្មារតីឱ្យនិស្សិតរបស់ខ្លួនលេងកីឡាមួយចំនួនបន្ថែមដូចជាកីឡាចំបាប់ និងហែលទឹកជាដើម។
ចំពោះការប្រកួតបាល់បោះ ពានរង្វាន់ ខេមអេដ ឆ្នាំ២០២៤នេះ ត្រូវលោក ខេស៊ី បាណេត បន្ថែមថា នេះជាឆ្នាំទី១០ ដែលខេមអេដបានរៀបចំការប្រកួតកីឡាបាល់បោះ បុរស-នារី ដោយនៅឆ្នាំ២០២៤នេះមានកីឡាករ កីឡាការិនីជានិស្សិតខេមអេដចំនួន ១៩៨នាក់ចូលរួមប្រកួតប្រជែង (កីឡាករ មាន ១០៣នាក់ និងកីឡាការិនី ៩៥នាក់។ ចំពោះគុណភាពបច្ចេកទេសរបស់កីឡាករ កីឡាការិនីមានការរីកចម្រើនខ្លាំងជាបណ្តាឆ្នាំមុនៗ ដោយបង្ហាញថា ពួកគេបានពុះពារឧបសគ្គ និងទំនុកចិត្តខ្លួនឯងខ្លាំង ក្នុងការប្រកួតប្រជែងនេះ បន្ទាប់ពីទទួលបានការបណ្តុះបណ្តាលហ្វឹកហាត់ពីគ្រូបង្វឹក។
លោក ខេស៊ី បាណេត គូសបញ្ជាក់ថា ៖«ខេមអេដ ជាវិទ្យាស្ថានបណ្តុះបណ្តាលជំនាញគណនេយ្យ ប៉ុន្តែយើងបានលើកទឹកចិត្តឱ្យនិស្សិតចូលរួមលេងកីឡា ដើម្បីសុខភាព មិត្តភាព និងសាមគ្គីភាពដោយសារតែការលេងកីឡាជាផ្នែកមួយដ៏សំខាន់ ក្នុងការគួបផ្សំគ្នាគ្នាឱ្យជីវិត និងការសិស្សាទទួលបានភាពជោគជ័យ ព្រមទាំងបំផុសស្មារតីឱ្យពួកគេចេះធ្វើការជាក្រុម ចេះពុះពារដើម្បីបទពិសោធន៍ល្អៗ និងចេះធ្វើការក្រោមសម្ពាធ ទោះបីជាមានការលំបាកយ៉ាងណាក្តី»។
គួរបញ្ជាក់ថា ការប្រកួតបាល់បោះបុរស-នារី ពានរង្វាន់វិទ្យាស្ថាន ខេមអេដ ឆ្នាំ២០២៤ មាននិស្សិតចូលរួម ១៩៨នាក់ ចែកចេញជា ២៩ក្រុម ក្នុងនោះមានបុរស ១៥ក្រុម ចែកចេញជា៤ពូល និងក្រុមនារី ១៤ក្រុម ចែកជា ៤ពូលដូចគ្នា។ តាមរយៈការប្រកួតប្រជែងយ៉ាងស្វិតស្វាញ គណៈកម្មការបច្ចេកទេសសម្រិតសម្រាំងបានម្ចាស់ជ័យលាភីក្រុម និងឯកត្តជន ទាំងផ្នែកបុរស និងនារី ប្រចាំឆ្នាំ២០២៤នេះ ប្រកបដោយគុណភាពផងដែរ៕
