ភ្នំពេញ៖ សហព័ន្ធកីឡាបាល់ទាត់ពិភពលោក (FIFA) បានប្រកាសពីលក្ខណៈសម្បត្តិគ្រប់គ្រាន់របស់កីឡាករបរទេសចូលសញ្ជាតិខ្មែរចំនួន៣នាក់ អាចលេងតំណាងឱ្យក្រុមបាល់ទាត់ជម្រើសជាតិកម្ពុជា។
នេះបើតាមការប្រកាសផ្លូវការរបស់សហព័ន្ធកីឡាបាល់ទាត់កម្ពុជា (FFC) តាមទំព័រផ្លូវការរបស់ខ្លួន កាលពីរសៀលថ្ងៃទី០៤ ខែធ្នូ ឆ្នាំ២០២៤។ FFC បានបញ្ជាក់ថា តបតាមសំណើររបស់សហព័ន្ធកីឡាបាល់ទាត់កម្ពុជា ជាមួយឯកសារដែលបានផ្ញើទៅចំពោះកីឡាករ ឃូលីបាលី អាបឌែល តាមរយៈសហព័ន្ធកីឡាបាល់ទាត់ពិភពលោក (FIFA) និងចំពោះកីឡាករ អូសិ តាកាកិ និង នេតូ រ៉ុនដុន តាមរយៈសហព័ន្ធកីឡាបាល់ទាត់អាស៊ាន (AFF) ត្រូវបានពិនិត្យឃើញថា មានលក្ខណៈបុគ្គលិកគ្រប់គ្រាន់ និងត្រូវបានអនុញ្ញាតឱ្យលេងតំណាងក្រុមជម្រើសជាតិកម្ពុជា។ ដូច្នេះចាប់ពីពេលនេះតទៅ កីឡាករចំណូលថ្មី ទាំង៣នាក់នេះ អាចលេងតំណាងឱ្យក្រុមជម្រើសជាតិកម្ពុជាបានជាផ្លូវការ ហើយនឹងត្រូវចូលរួមលេងក្នុងពានរង្វាន់ ASEAN Mitsubishi Electric Cup 2024 ខាងមុខនេះ។ FFC បានបើកការស្វាគមន៍កីឡាករ អូសិ តាកាកិ, នេតូ រ៉ុនដុន និងឃូលីបាលី អាបឌែល ជាផ្លូវការចូលមកកាន់ក្រុមជម្រើសជាតិកម្ពុជា។
សម្រាប់ការប្រកួតពានរង្វាន់ AFF Mitsubishi Electric Cup 2024 ក្រុមជម្រើសជាតិកម្ពុជា ដែលមានសមាជិកសរុបចំនួន២៦នាក់ត្រូវបានកោះហៅ និងប្រមូលផ្តុំហ្វឹកហាត់បានរយៈពេល៣ថ្ងៃហើយ នៅក្នុងសប្តាហ៍នេះ។ ព្រឹត្តិការណ៍នេះ មានការប្រកួតក្នុងផ្ទះ និងក្រៅផ្ទះ ដោយក្រុមកម្ពុជាត្រូវប្រកួតបើកឆាកពូលA នឹងត្រូវជួបម៉ាឡេស៊ី នាថ្ងៃទី០៨ ខែធ្នូ នៅពហុកីឡដ្ឋានជាតិអូឡាំពិក បន្ទាប់មកក្រុមកម្ពុជា ប៉ះសិង្ហបុរី, ប៉ះ ទីម័រខាងកើត និងចុងក្រោយបញ្ចប់ពូល ប៉ះម្ចាស់ផ្ទះថៃ នាថ្ងៃទី២០ ខែធ្នូ ឆ្នាំ២០២៤។ ចំពោះពូល B ក៏មាន៥ក្រុមដែរ រួមមាន៖ វៀតណាម ឥណ្ឌូណេស៊ី ហ្វីលីពីន មីយ៉ាន់ម៉ា និងក្រុមឡាវ។
យោងតាមបញ្ជីផ្លូវការរបស់ FFC ក្រោមការដឹកនាំរបស់គ្រូបង្គោលកម្ពុជា លោក Gyotoku Koji គឺមានកីឡាករចូលសញ្ជាតិខ្មែរចំនួន៣នាក់ ដែលប្រកបអាជីពក្នុងក្របលក្ខខណ្ឌលីគកំពូលកម្ពុជា ដូចជាខ្សែការពារ Ose Takaki (ជប៉ុន) និងខ្សែប្រយុទ្ធ Andres Neito (កូឡុំប៊ី) របស់ក្លឹបភ្នំពេញក្រោន និងខ្សែប្រយុទ្ធ Abdel Kader Coulibaly (កូឌឺវ័រ) ប្រធានក្រុម ISI ដង្កោសែនជ័យ។ ដូច្នេះសរុបកីឡាករចូលសញ្ជាតិ ក្នុងក្រុមជម្រើសជាតិកម្ពុជា លើកនេះមានចំនួន ៦នាក់ គឺមានខ្សែការពារជាតិ កាន់ ម៉ូ សញ្ជាតិដើមអាហ្វ្រិកខាងត្បូង មកពីវិសាខា, យូឌៃ អូកាវ៉ា សញ្ជាតិដើមជប៉ុន ក្លឹបភ្នំពេញក្រោន និង មីហ្ស៊ូណូ ហ៊ីការ៉ុ សញ្ជាតិដើមជប៉ុន មកពីក្លឹបព្រះខ័នរាជស្វាយរៀង៕
