ភ្នំពេញ៖ កីឡាករបាល់ទាត់ជម្រើសជាតិកម្ពុជា វីរៈ ដារ៉ា មិនជាប់ពាក់ព័ន្ធនឹងករណីសង្ស័យលើការប្រព្រឹត្តនូវទង្វើរៀបចំកំណត់លទ្ធផលទុកជាមុន ដោយករណីសង្ស័យនេះនៅក្នុងការប្រកួតជាផ្លូវការរវាងក្រុមជម្រើសជាតិកម្ពុជាជាមួយក្រុមជម្រើសជាតិសិង្ហបុរី កាលពីថ្ងៃទី១១ ខែធ្នូ ឆ្នាំ២០២៤ ក្នុងព្រឹត្តិការណ៍ ASEAN Championship Mitsubishi Electric Cup នៅទីលាននៃកីឡដ្ឋានជាតិ (National Stadium) ប្រទេសសិង្ហបុរី។
នេះបើយោងតាមសេចក្តីប្រកាសព័ត៌មានរបស់សហព័ន្ធកីឡាបាល់ទាត់កម្ពុជា ដែលបានចេញកាលពីល្ងាចថ្ងៃទី០៥ ខែមីនា ឆ្នាំ២០២៥។ សេចក្តីប្រកាសព័ត៌មាននេះបានបញ្ជាក់ថា ក្រោយពីអាជ្ញាធរមានសមត្ថកិច្ចបានតាមដាន និងស៊ើបអង្កេតតាមសមត្ថកិច្ចជំនាញរួចរាល់ និងរួមផ្សំដោយការស្រាវជ្រាវរបស់គណៈកម្មការសុចរិតភាពរបស់សហព័ន្ធកីឡាបាល់ទាត់កម្ពុជា ទៅតាមនីតិវិធីជាក់លាក់ និងដោយការយកចិត្តទុកដាក់ជាមួយនឹងអង្គភាពជំនាញក្រៅប្រទេសមួយចំនួនកន្លងមកបានបង្ហាញលទ្ធផលជាអវិជ្ជមានរួមគ្នាថា៖ កីឡាករជម្រើសជាតិ វីរៈ ដារ៉ា ពុំមានអ្វីពាក់ព័ន្ធទៅនឹងការសង្ស័យទាំងអស់នោះទេ។
ខ្លឹមសារបស់សេចក្តីព័ត៌មាននេះបានឱ្យដឹងទៀតថា ផ្ទុយទៅវិញ កំហុសដែលកើតឡើង នាពេលនោះ គឺជាកំហុសបច្ចេកទេសនៃការលេងដោយអចេតនាប៉ុណ្ណោះ។ សូមបញ្ជាក់បន្ថែមថា រាល់ករណីមន្ទិលសង្ស័យទាំងឡាយណាដែលកើតមានអំឡុងពេលដំណើរការនៃការប្រកួត សហព័ន្ធកីឡាបាល់ទាត់កម្ពុជានៅតែបន្តធ្វើការស៊ើបអង្កេត ស្រាវជ្រាវ ដើម្បីរក្សាបាននូវសុចរិតភាពរនៅក្នុងវិស័យបាល់ទាត់នៅកម្ពុជា។
ទន្ទឹមនឹងការចាត់វិធានការ និងដើម្បីទប់ស្កាត់បញ្ហាដូចខាងលើ សហព័ន្ធកីឡាបាល់ទាត់កម្ពុជាបានដាក់ចេញនូវវិធានការ ដែលបានប្រកាសជូនក្នុងមហាសន្និបាតលើកទី១៩ របស់ខ្លួន កាលពីថ្ងៃទី០១ ខែមីនា ឆ្នាំ២០២៥ លើការបែងចែក ភាគលាភដែលបានមកពីការលក់សំបុត្រនៃការរៀបចំប្រកួតរបស់ក្រុមជម្រើសជាតិ បន្ទាប់ពីដកចំណាយលើប្រតិបត្តិការណ៍ និងពន្ធ ផ្តល់ជូនផ្នែកពាក់ព័ន្ធចំនួន ០៤ គឺ៖ សហព័ន្ធកីឡាបាល់ទាត់កម្ពុជា ២៥% សមាគមក្លិប (កីឡាករជាប់ក្នុងក្រុមជម្រើសជាតិ) ២៥% ក្រុមជម្រើសជាតិ ២៥% សុខុមាលភាព ២៥%៕
