បរទេស៖ នេះបើយោងតាមការចេញផ្សាយរបស់ L’Equipe បានអោយដឹងថាបន្ទាប់ពីកីឡាករដែលមានប្រាក់ឈ្នួលខ្ពស់ត្រូវបានអនុញ្ញាតអោយចាកចេញពីក្លឹប Bayern ធ្វើអោយកីឡាករ Coman សញ្ជាតិបារាំងបានសម្រេចចិត្តមិនបន្តស្នាក់នៅក្លឹបនេះទៀតទេ។ គាត់ត្រូវបានគេរំពឹងថានឹងចាកចេញពីក្លឹប Bundesliga មុនពេលទីផ្សារដោះដូរកីឡាករបិទនៅថ្ងៃទី៣០ ខែសីហា។
កីឡាករ Coman បាននៅ Bayern អស់រយៈពេល ៧ឆ្នាំ ប៉ុន្តែថ្ងៃរបស់គាត់នៅក្លឹបហាក់ដូចជាជិតបញ្ចប់ទៅហើយ បន្ទាប់ពីទទួលបានពានរង្វាន់ជាច្រើនជាមួយក្រុមនេះ។ របាយការណ៍បន្ថែមថាភាគី Premier League ចាប់អារម្មណ៍ទៅលើកីឡាករវ័យ២៨ឆ្នាំរូបនេះ ដោយក្នុងនោះរួមមាន Man City, Arsenal, Barcelona និង Al-Ahli បាននិយាយថាកំពុងតាមដានស្ថានភាពរបស់គាត់។
កីឡាករ Coman នៅសល់កុងត្រារយៈពេល ៣ឆ្នាំទៀតជាមួយនឹងក្លឹប Bayern ដូច្នេះគាត់ទំនងជាមិនចាកចេញសម្រាប់កិច្ចព្រមព្រៀងដែលមានតម្លៃទាបនោះទេ។ ការខ្ចីជើងអាចជាជម្រើសល្អជាង ប៉ុន្តែគេនៅតែត្រូវមើលថាតើនឹងមានអ្វីកើតឡើងបន្ទាប់សម្រាប់អតីតកីឡាករ Juventus ដែលបានបង្ហាញខ្លួនចំនួន ២៩៦ដង និងស៊ុតបញ្ចូលទីបាន ៦៤គ្រាប់សម្រាប់ក្រុម Bayern រហូតមកដល់បច្ចុប្បន្ន។
ប្រសិនបើកីឡាករ Coman ដែលបានបង្ហាញខ្លួនចំនួន ២ដង និងស៊ុតបញ្ចូលទីបានមួយគ្រាប់សម្រាប់ក្លឹប Bayern ក្នុងរដូវកាលនេះ មិនអាចផ្ទេរចេញទេនោះ គាត់អាចនឹងមានវត្តមានសម្រាប់ក្រុមរបស់លោក Vincent Kompany ក្នុងការប្រកួតទល់នឹងក្លឹប Freiburg នៅថ្ងៃទី១ ខែកញ្ញា៕
